當老人家遇上LTE

即使快樂（佢哋）的痛（我哋）

大家經常都會聽都或者睇到，喺Facebook或者Baby Kondom之類討論區、有關兒童同埋青少年上網嘅問題。有啲濕鳩專家甚至建議，屋企唔好裝寬頻，56k上網已經好足夠。

除咗呢類極端戇鳩離地意見之外，一般正常意見，普遍都會認為，作為家長，應該好好保護青少年同兒童，唔好俾佢哋接觸一啲有問題嘅資訊。

但係大家有冇諗過，留意啲𡃁仔𡃁妹上網睇乜玩乜，有冇sexting有冇做/搵ptgf之餘，其實我哋都應該留意一吓，我哋嘅長輩，究竟上網睇嘅啲乜？

我唔係話我哋啲老母姨媽姑嗲們去做ptgf；至於老豆們有冇去搵ptgf呢，亦不在本話題討論之列。我想講嘅係，喺呢個科技進步到每人都有一部smartphone嘅年代，究竟我哋啲長者們，平時接收緊同傳閱緊一啲乜嘢資訊呢？

我既然咁樣問得，就梗係有故講啦。

是咁的，我有個阿姨，六十幾歲，移民加拿大多年。其實我同佢，一直咁多年嘅聯絡，都係久唔久嘅長途電話同埋email；唔太密，亦唔會斷。

我阿姨後生嗰陣，並唔係C9。相反，佢係事業型女性，八十年代連卡佛嘅buyer；香港某幾個名牌，係佢當年有份引入嘅。換句說話嚟講，佢係「潮人」，亦係我早年嘅服裝指導；我嘅第一個Burberry袋就係佢送嘅。

唔知係幾時開始，我阿姨買咗部iPhone。亦唔知幾時開始，佢開咗個WhatsApp account。但係我好清楚，我嘅惡夢，大約三年前開始。

因為三年前嘅某一日，我阿姨喺個WhatsApp度add咗我。自嗰日開始，我部手機就永無寧日。每日無論任何時間，我都會接收到大量佢老人家「無私分享」嘅「有用資訊」。

我係一個好怕用instant messager傾計嘅人。我覺得，有咩緊要嘅，應該用電話或者email傾，大家四四六六拆掂佢。啲唔係太緊要嘅嘢，就一句起兩句止，大家笑完就算。無啦啦喺個IM度，有句冇句咁吹水；講真，好煩。

而且，我係一個揸筆搵食嘅人。我寫字，係suppose收錢或者另類等價交換，例如claps、likes etc。要我冇啦啦喺個IM度篤到手指頭都倔，但又冇乜得著，我實在唔太熱衷呢類溝通。

講返轉頭。我哋呢族人大部份都已經移居海外；其實個組織係好鬆散嘅，既唔會有而家好興嘅「家族group」，甚至連穩定嘅連繫都冇。所以我嘅海量長輩圖，就只有一個來源。

我一直以為，以我阿姨咁潮嘅往績，佢就算send長輩圖俾我，都應該係Oscar de la Renta 2018 F/W嘅runway show、今期Vogue嘅封面、金喜善嘅Fendi廣告、或者Paris Fashion Week 2018嘅精華等等。老老豆豆，你潮開㗎嘛！就算上咗年紀都應該繼續潮㗎啦！你睇吓Elton John！你睇吓Karl Lagerfeld八十幾歲人out過未？

點知佢用大量「大榴槤」資訊嚟洗我手機memory。我嘅感覺，就好似親眼見到村上隆去羅湖城買老翻LV一樣，唔知應該點俾反應。

我有留心咁讀過佢send過嚟嘅嘢，大部份係醫療養生有關嘅資訊。其實人到咗某個年紀，關心自己同埋身邊親友嘅健康，都係好正路嘅心態。但問題係，佢share嘅所謂「健康資訊」，十居其九都係一啲以訛傳訛嘅錯誤健康資訊。

點錯法我唔舉例喇，否則又寫多兩三千字都未寫完。你是但上去ETtoday求其搵篇有關醫療嘅文章，或者求其搵篇嚴浩嘅嘢嚟睇啦。講真，起碼錯咗八成。

除咗我之外，我老婆亦都面對過同樣問題。喺佔中嘅時期，我外母轉發咗好多，海外藍絲挖苦佔中嘅圖文俾佢；兩母女亦因此輕輕齬齟。

對於好似我外母呢啲老人家嚟講，佢哋最鍾意嘅，就係有CCTVB標誌嘅長輩圖，因為喺佢哋嗰輩人眼中，CCTVB就係道路真理生命：「無線新聞都係咁講啦，仲有假嘅咩？！你班廢青仲唔係收美國錢搞亂香港？！」

其實，比起關心啲𡃁仔𡃁妹嘅上網，我覺得我哋應該更加要關心一吓，究竟我哋啲老豆老母，平時接收緊啲咩資訊。究竟佢哋個世界，同我哋個世界，係咪in sync嘅？定係已經俾大陸五毛不斷流水作業式製作嘅「資訊」，完全接管咗佢哋嘅互聯網世界？

終於，喺上星期日，我阿姨爆seed，一口氣send咗廿六個msg俾我。當日我個手機係咁震，我老婆係咁問我「邊個搵你呀」。忍耐，終於到咗極限；於是我係咁倚「哽」咗佢一句：

然後，一個星期，我再冇收過任何佢嘅message。

忍到三年先出口，其實我已經算好忍耐力。聽聞佢個女我表姐，晨早已經block咗佢。我表姐經常要飛，你可以想像到，當佢data roaming嗰陣收到長輩圖嘅反應。

但係一場親戚，呢鑊究竟點收科呢？我睇唔透。