香港食住難

老老實實，香港樓價租金超高，而且遠遠超過市民負擔水平，已經難以被當做新聞。

其實香港食物價格亦非常之離譜，位於尖沙咀天星碼頭，同樣外賣一個軟雪糕，麥當奴快餐賣港幣$5，東海堂餅店賣港幣$28，而味道我覺得根本差不多，甚至未能發現有任何重大分別。實實在在令人難以置信。

你走入一間五星酒店，軟雪糕可能要港幣$50，不過酒店其實再提供一個享用環境，價錢比較貴，我可以理解。東海堂和麥當奴，兩個軟雪糕都以外賣為主，而必要時麥當奴其實可以堂食，東海堂只能夠外賣，連環境因素都未講得上。

題外話，當然我會承認，我味覺嗅覺（兩個感官其實相連）都一般。十幾年前重返校園讀心理學，據聞地球所有人可以分開兩大類：大約有三份之二，味覺嗅覺敏銳，通常會非常享受各種不同類型食物；餘下三份之一，味覺嗅覺遲鈍，所以對飲食要求未必會太高，例如我。

言歸正傳，就算剔除味道，香港飲食價錢近十年上升得特別快，我可以輕易再舉其他例子。例如去便利店買飲品，幾年前見到日本原裝入口，一支500ml，要港幣$15左右，覺得好奢侈，所以只會選擇本地貨，港幣$6至$7就有交易。亦只不過五年左右，今時今日去便利店，本地貨都要港幣$10至$12，我覺得我好應該買日本貨，因為五年來價錢始終如一。

又題外話，其實日本飲品、酒店以至大部份物價，根本二十年都未變過，去旅行支出有變，其實只不過匯率有變。當然去台灣旅行，魯肉飯價錢，亦都二十年未變過。

又言歸正傳，最後一點，其實去舊區或者老人區，幫襯小店，香港人仍然可以用港幣$3至$5買到500ml飲品，不過要犧牲時間車費，至於一般鬧市，已經被便利店壟斷，飲品價錢短短幾年由港幣$6升至$10，其實因為租金狂升。

事到如今，香港連鎖餐廳食一碟叉燒飯，竟然可以賣港幣$50甚至$70，而法定最低工資，時薪仍然未夠港幣$40，香港人又會講同一句說話：一切都因為土地問題。