My little detour - 《終於有晴天》

今朝早餐好滿意， 係飽肚又好食嘅pancake。

不過返學就麻麻地， 阿老師越嚟越無心機教咁， 同人吹水又吹得耐， 上堂又成日掛住望電話， 問題又唔係成日識得答， 今日嘅30分鐘break, 佢break完30分鐘後仲吹15分鐘水先上堂， 搞到我都無咩心機。 所以我今日send左個email 比Paula表示想換老師試下， 另外再問佢有無活動schedule。 點知平時秒回嘅佢竟然無覆過我。btw, 講開又講， 呢間homestay其實伙食唔算差丫， 我今日晏晝有一塊煎牛扒做餸， 雖然係un D, 但成塊算係咁。

之後見天氣咁好， 好想出去行下， 今日心中有悶氣， 所以決定去個近近地的山仔 ‘Cerro El Baul’ look out望下， 仲順手帶埋note上去懶係享受大自然讀書樂。 其實呢到唔難行又唔斜， 而且只有一條路， 上上下仲有不止一架車問要唔要載我 （其中一架係警車）， 但我真係好想行下。 雖然景色唔係話絕靚， 但呼吸下新鮮空氣都好開心。 不過行行下好似有厚雲， 而此時又發覺我個charger竟然叉唔到電， 眼見得返80%電(而家電話的電去得好快，加埋影下相呀望下地圖，80%都絕對唔穩陣) 我都諗緊好唔好繼續行， 因為呢到6點開始黑， 唔夠7點就黑齊， 一陣落返嚟天黑無燈我咪好大鑊！不過諗諗都有唔少車係我身邊經過， 又難得無落雨， 所以都繼續往上行。

其實由出門口到抵達山頂都係個幾鐘的時間。 不過山頂無咩特別， 而我又驚電話無電， 所以影左陣相就回程了。 落嚟嘅時候比上山大霧， 的霧飄住都幾浪漫。 行行下有架車停低， 司機同我講左一輪嘢， 靠估應該問我係咪落山， 佢哋 (一家大細, 有男有女)話載埋我好唔好， 見天氣轉差又行雷， 所以呢個人情我都唔推了， 佢地好好， 只係我西班牙文一句都講唔出🤣🤣🤣。(但係呢，往後先聽到話獨自行呢個山其實幾危險，因為屢有打劫/強暴之類0既事發生)

佢地送到我去山腳， 然後我只係偷偷影左佢架車一張相做紀念。 跟住為左奬勵自己， 我應承請自己飲Q2可樂， 影左poster張相比老闆睇諗住實無死， 點知枝可樂嚟到都係咁大枝， 然後佢收左我Q3, 我確認唔係Q2咩， 原來佢睇錯左。 不過玻璃樽蓋已開都無謂換， 係驚要去廁所啫， 點知老闆好好， 佢送左塊朱古力比我賠不是， 大客氣了， 不過真係令我心情更上一層樓。 順帶一提， 落到嚟原來依然藍天， 所以我決定返homestay前再去 La Torre超巿兜個圈。不過都係咩都無買就返去了。之後行經麥當勞，竟然喺門口見到一張亞洲人面孔，一問之下原來係日本人，我哋仲交換左電話添!

好彩我7:45入廚房高一亮相， 原來homestay的其他住客今晚唔係到食， 而Ellie亦以為我一齊出， 所以最後我地係食炒蛋frijole併tortilla做晚餐。

已用：Q3

Q3可樂 （加送朱力）