補番推介：本田小狼與我

請注意，本評論比較着重於本田小狼與三個女主角相似的地方，如果想看12集動畫內容或者其他方式的評論，請稍移玉步到關聯作品。

作為一個喜歡賽車運動的人，我相信對於本田呢個名字應該唔會陌生。F1有紅牛-本田車隊；MotoGP有 Repsol Honda。但我今日要講嘅絕對唔係呢兩隊車隊，而係要講一套本田有份出資嘅動畫：《本田RC213VS與我》，呀打錯，唔好意思，係《本田小狼與我》先啱。

作為一個一直都抗拒睇異世界番嘅人黎講，每季要揀睇嘅番其實已經少咗一部份，當然係輕鬆好多，唔洗花多眼亂（千祈唔好同我講我全部都要，我個肝會罷工先）。當初睇到呢套CM嘅時候，其實真係無乜好感。唔係話畫風唔靚，只係同我平時睇開百合工房嗰啲有好大出入，不過當初見到＂本田＂兩個字就諗住睇一集都無妨。結果睇完第一集，我就覺得夜道雪把聲好可愛（錯重點，我淨係想講：點解我要用24分鐘去睇本田廣告雜誌Www 連最後製作委員會都見到本田個名

咁簡單講吓個故事先，成個故事就係講一個叫小熊嘅女仔買咗一部本田小狼，之後如何結交新朋友同如何和朋友一起生活、上學的故事。係啦，講完啦，呢度就係12集大約嘅內容。多謝大家睇到呢度，可以撳返上一……

咁我當然就梗係唔會咁膚淺啦，既然你都睇到呢度，唔爭在睇埋落去……

睇呢套之前，如果你問我識本田啲咩車，我諗我淨係可以答到你兩樣嘢：六屆MotoGP世界冠軍Marc Márquez 駕駛嘅RC213V同F1 紅牛車隊用嘅本田引擎，其他嘅產品真係唔識。當初未睇之前心入邊真係有個疑問，就係點樣喺可愛嘅妹子入面介紹本田小狼。睇完第一集之後，先至知道原來本田有生產咁多唔同類型嘅電單車。（錯重點x2）其實睇完第一集之後真係覺得畫風唔係一時三刻可以接受到，同埋開頭中同結尾用嘅色彩完全唔同，開頭算係比較暗淡，之後去到中段就會開始慢慢變成彩色，就好似慢慢將心入邊嘅雪慢慢溶化咁樣。咁其實今次對於《株式會社スタジオKAI》黎講都算係一種幾唔同風格嘅作品，上一季（2020年1月）佢有賽馬娘Pretty Derby 第二期，今季（2020年4月）就有本田小狼，兩種截然不同嘅題材。係賽馬娘，我哋可以見到佢基本上要畫到一個妹子有幾萌完全唔係問題；但係本田小狼比較注重喺細節同埋色彩變化，令到人物畫風比較普通，甚至乎可以話係奇怪。

曾經有人講過，呢三個女主角就好似係將三架唔同嘅本田小狼擬人化。其實我覺得佢真係一啲都無講錯。

先講最最最重要嘅女主角：小熊。自從買架一架中古嘅本田小狼之後，可以睇到佢嘅生活完全改變咗。遺憾嘅係由小說到動畫都無講佢考車經歷，不過都無傷大雅。其實雖然擁有小狼前嘅篇幅唔多，但係可以睇得出佢係擁有小狼之前嘅生活基本上只係得過且過，活得一日得一日，唔係話佢對生活無怨言，只係已經麻木晒。不過自從佢開始咗電單車生涯之後，我哋完全感受到佢嘅變化。如果有去過日本一啲比較鄉下嘅地方旅行，你就會好容易見到本田小狼嘅蹤影，由送拉麵店嘅店員駕駛，到郵差叔叔送信純熟迅速送出都係要倚靠小狼左穿右插咁送達。小熊果種堅毅不屈、無論面對咩困難同挑戰都可以輕鬆自如嘅精神，其實真係好似佢買個架本田小狼咁。其實我地係動畫第四集同原作小說第四卷第37話開始，我地都到小熊嘅心境變化。雖然兩者內容都大不唔同，不過可以睇得出小熊無論發生咩事都好，就算面對咩困難同挑戰都好，例如落雨或者地震過後不適合行車的道路，都想盡力將物件送到需要嘅人手上，彷彿就像本田小狼一樣，只要有道路能夠行走，就可以大地任我行，無論點樣都可以去到你到達嘅目的地。

之後就講吓佢嘅第一個朋友：禮子。佢由最初嘅MD90變成之後嘅CT110，不過無論係邊一架都好，我哋都見到佢係改裝性能方面嘅熱衷程度完全唔輸俾無限Www 對於佢來講，我諗大家對佢嘅印象都係好狂野同豪邁。其實都無她嘅，無論係原作小說黨定係動畫黨都好，我諗對佢最深刻嘅印象就係騎本田小狼上富士山。雖然以前真係可行，甚至乎可能只係一件好普通嘅事，大約20分鐘就可以攻頂；但現在除非有特別批准，否則都難以再現。不過亦都可以睇得出就係呢啲近付瘋狂嘅行為，彷彿就好似介紹本田小狼嘅多種可塑性。正如上面介紹小熊咁講，如果只係想要日常生活嘅代步車，本田小狼絕對勝任有餘；但係如果你想進行大規模嘅改造，甚至乎想去極地探險，本田小狼都係勝任有餘，而且更加係可以創造出與別不同嘅改造，想要有幾浮誇都得（前提係要你銀包有返足夠厚度

最後就講下最後會一個女主角：椎。其實一開頭佢更加似係一個不起眼嘅女主角，要去到第六集文化祭之後先至開始比較多嘅劇情係關於佢。不過好彩嘅係原作小說後面都有比較多嘅篇幅關於佢嘅內容。咁其實你睇到呢度都可能會問我：喂咁佢同本田小狼有咩關係？我其實開頭都有咁樣諗，甚至乎我喺度寫佢果陣都反問番自己有乜關係？但其實當我再睇返原作小說果陣，我就明白其實作者可能想係佢身上再帶出本田小狼其實本身就係一架咁唔起眼嘅電單車（當然係係日本），對於好多人來講，本田小狼係成日會見到攞嚟做各式各樣送貨用途嘅電單車，但唔會特別去留意，正如椎一樣。難聽啲咁講，就算原著小說無咗佢，可能都唔會太影響整體小説嘅閱讀性；但如果一直都只係圍繞小熊同禮子嘅故事，彷彿就好似會爭咁啲嘢，所以佢嘅存在就好似本田小狼一樣，已經融入左去大家生活入面，如果少咗椎，彷彿就好似會失去咗啲嘢，但係又講唔出少咗啲乜咁。

我知道我咁樣講好似好奇怪，呢套作品嘅題材其實係真係好少見，但係我就係偏偏鍾意睇呢啲咁冷門題材嘅人。當然你可以話佢係一套賣萌妹子嘅番，但其實如果你睇返原作小說入邊作者寫嘅獨白，你呢隻會明白作者當初寫呢本小說嘅原因絕對唔係因為想靠妹子宣傳，而係因為為咗紀念本田小狼生產超過一億架。咁所以正如我上面咁講，其實作者係以擬人化嘅方式將本田小狼呢個一億分之一，或者叫一億分之三嘅故事呈現喺我哋眼前。

最後亦都希望大家可以慷慨解囊喺下面拍五下手，支持我繼續創作嘅原動力，多謝。當然亦都歡迎喺下面繼續討論，我知道今次嘅風格同以前嘅推介或者其他人嘅評論完全唔同，不過，我始終比較想用小狼作主導，而不是動漫作主導（土下座