iPhone 14 水晶球預測

係預測開始之前都用呢個抱怨幾句先。雖然 Apple 係今年啱啱過去嘅 WWDC 上面正式發表大家期待已久嘅全新晶片：M2。但係，相比起目前頂級版本正在販賣嘅 M1 Pro、M1 Max、M1 Ultra 版本，Apple 並沒有明確表示到底全新的 M2 晶片是比它們性能更強勁還是比較衰弱。雖然官方沒有釋出任何數據作參考，但是根據 Apple 官方網站的比較，目前已知的是 M2 晶片比上述三項晶片性能都比較弱（雖然係比較弱，但係都足以完勝 Intel 同 AMD）。而且如果是打算購入MacBook 的朋友，如果你是選擇最頂規配備的 M2 版本的 MacBook，你會發現 MacBook Pro 比 MacBook Air 還要便宜 $400 左右，所以如果真的是有打算購買 M2 晶片的 MacBook 配最頂級配置，不妨考慮有風扇協助散熱的 MacBook Pro 版本，不過遺憾嘅係如果是要求買 MacBook Pro 的版本，將會附送一條令人又愛又恨的 Touch Bar，我個人是非常習慣使用所以沒有太大感覺，但是亦都有不少人表示希望要傳統的鍵盤，所以真的是見仁見智。另一方面，如果純粹購買 MacBook Air 版本，你獲贈的只會是一個 35W 的雙USB是插頭；而 MacBook Pro 版本則是配備標準的65W變壓器，所以就自行考慮實際使用情況再作決定。不過如果真的有大量影音需求或者需要運行3D運算（例如：AutoCAD、Final Cut Pro等等）絕對建議回去選擇 M1 Pro、M1 Max、M1 Ultra 版本，因為性能一定被全新的 M2 強大。

係開始預測之前都要作出一個不負責任嘅聲明：目前所有已知嘅來源都係源自網上，與實際發表的產品可能有所出入～

正式取消 iPhone mini 系列

相信如果大家有留意開近幾年 iPhone 嘅新聞，就會唔難發現 mini 系列嘅手機嘅購買人數跑輸預期，甚至乎比同系列嘅 iPhone SE 系列更為慘淡。始終如果想享受細螢幕的使用者，應該會直接考慮 iPhone SE，唔單止價錢比較平，而且也能夠享受 Apple 最新的 A15 晶片，所以一直購買iPhone mini 系列嘅人為之極少數。所以其實自從去年 iPhone 13 發佈會之後，已經有消息傳出自從今年 iPhone 14 系列開始將會全面取消 mini 系列嘅手機，直接以 iPhone SE 系列取代。

既然將會取消 mini 版本的 iPhone，就會有全新系列取代。根據目前已知消息透露，今年同往年一樣也會有兩個系統：iPhone 14 和 iPhone 14 Pro 系列。iPhone 14 Pro 和 Pro Max 的尺寸不變；而 iPhone 14 除了原本的 6.1 吋版本外，將會推出全新的 6.7 吋版本，暫時知道好大機會會命名為 iPhone 14 Max。相比起 iPhone 14 Pro Max， iPhone 14 Max 雖然螢幕是一樣大細，但中間所採用的硬件將會和 iPhone 14 一樣。換句話說，我們將會見到 Pro 版本同普通版本都會有兩部一模一樣大細的手機推出。

瀏海正式消失

自從 iPhone X 系列發佈之後，大家對於瀏海設計由一片嘩然變成而家已經逐漸接受。雖然相比起 Android 陣營已經開始逐漸採用螢幕下隱蔽鏡頭設計，iPhone 彷彿仍然停留在上一個世紀，但其實大家都明白為什麼 iPhone 目前仍然不考慮設置螢幕下的鏡頭。主要原因都係因為目前並沒有一個技術既可以唔影響螢幕顯示的像素，又唔會影響鏡頭畫質，所以 iPhone 仍然採用瀏海設計仍然是理解。雖然 iPhone 13 系列已經相比起 iPhone 12 系列瀏海縮小了20%，但是仍然佔去螢幕上方的一大半位置，餘下大約左右各四份一的位置用來看不同的資訊。

iPhone 14 同 iPhone 14 Max 如無意外將會繼續採用類似 iPhone 13 的瀏海設計；而 iPhone 14 Pro 同 Pro Max 則預計採用感嘆號式鏡頭設計，根據目前已流出的設計圖，大約是將感嘆號向右轉90度方式呈現。雖然我覺得有變化係一件好事，但係如果以目前已流出嘅設計圖來睇，的而且確係消失了瀏海，但係相比之下，由於與螢幕頂部有一段距離，而且相比起iPhone 13 系列的瀏海，感覺上比現時相機鏡頭的位置還要更低，雖然缺少了瀏海的遮蔽，但是彷彿會掩蓋螢幕更多的比例，令到上面的空位變成浪費。不過實際係點我諗都要等發佈會出嚟睇完效果先知係唔係真係美觀。

A16 將繼續成為地上最強嘅晶片

去年推出嘅 iPhone 13 系列，雖然都係採用 A15 晶片，但是最大分別是 Pro 版本採用沒有閹割五核心的版本，以普通的 iPhone 13 則採用了閹割了一個核心四核心的版本。雖然聽起上黎好似會稍微影響效率，但其實正常一般使用情況下完全難以感受分別。當然，係玩一些大型遊戲或者 AR、VR 場景當中可能會有分別，但其實對於大部份正常使用者來講都唔會感受到很大分別，所以我當時都係決定直接買沒有閹割嘅版本，感覺上可以比較耐用。

今年嘅 iPhone 14 系列，預計只會在 Pro 系列上面採用全新 A16 晶片，而 iPhone 14 和iPhone 14 Max 只會繼續採用 A15 晶片，當然是沒有閹割的五核心版本。不過就算是採用A16 晶片，但係根據好多報道，今年 A16 晶片可能仍然是採用 5 奈米嘅製程，並不是與外界預期一樣改用 3 奈米製程，而且以蘋果唧牙膏嘅方式，今年 A16 晶片相比起去年的 A15 晶片相差應該只有少部份升幅，保守估計升幅不會大過10％；甚至乎可能會好似 Apple Watch Series 6 同 Apple Watch Series 7 嘅情況，只有極少量嘅升級，然後重新命名。不過就算 A15 或者A16 都好，其實我相信絕大部份一般使用者都分唔到當中嘅分別，所以我覺得揀自己最適合嘅就已經可以。不過又咁樣講，即使只係極少量嘅升級，但係相比起其他廠商製造嘅晶片，Apple 製造嘅晶片絕對仍然可以穩坐地上最強嘅寶座。

相機規格終於有望提升

自從 iPhone 6s 相機規格上升至 1,200 萬像素之後，至今為止已經再無任何升級。不過根據目前 AutoCAD 3D 設計圖顯示，今年 iPhone 14 Pro 系列嘅相機模組將會更加之大，而且將會有望成為有史以來相機模組最突出嘅 iPhone。（ iPhone 14 和 iPhone 14 Max 目前並沒有任何跡象顯示也會更新相機排列方式和模組，仍然是雙魚眼設計）

如果網絡消息來源沒有錯誤，今年 iPhone 14 Pro 系列相機像素將會提升至 4,800 萬像素，而且感光元件亦都會擴大，對於絕大部份使用者來講聽起上黎好似好犀利，但實際上我相信Apple唔一定會給你選擇提供 4,800 萬像素嘅相片，始終牽涉到晶片嘅運算過程，所以好大機會拍攝那一刻係 4,800 萬像素，但係經過軟件修改之後像素或者會有所刪減，不過既然肯升級，我相信一般消費者都唔會理佢最後出來的影像是多少萬像素。不過值得留意嘅係，今年相機模組比去年 iPhone 13 Pro 系列相機模組增加了大約10%，在 Pro Max 上沒有太大問題，但如果在 Pro 機型上面，因為更大嘅相機鏡頭模組，有機會影響到 MagSafe 外置電池，如果以依家知道嘅設計，加上如果是使用 Apple 原裝垃圾到一個點嘅 MagSafe 外置電池，有機會導致都未能完全覆蓋，換句話來說就是會突出一小部份，不過我諗到時係點都係要等實際發佈先至知道。

全面改用Type-C

隨着歐盟通過新法例，強制所有電子產品均需改用 USB Type-C 作為連接，iPhone 如無意外亦都需要跟隨，放棄只有 USB 2.0 速度嘅 Lightning 接口。自從去年推出 ProRes 攝錄之後，雖然畫質上面有一定程度上嘅提升，但同時亦都代表每一段影片所佔嘅容量亦會增加，但係根據目前 iPhone 嘅傳輸速度，無論係 Lightning、AirDrop 定係上傳到 iCloud等等，速度都係比 Type-C 慢，所以 ProRes 對於實際使用有一定程度上嘅影響，所以亦都一直有呼聲希望可以改用傳輸速度更快嘅 Type-C 作為連接埠。

但係大家都知道 Apple 係一間出名唧牙膏嘅公司，我相信唔到明年生效前嘅一刻 iPhone 都好難全面更改使用 Type-C 作為連接。不過，如果以我個人嘅見解，有一半機會我們可以率先係 iPhone 14 Pro 系列上面可以見到有 Type-C 連接口嘅出現，畢竟對於購買比較高端嘅電子產品，Apple 往往會為呢一類用家提供最新嘅科技，例如 iPad Pro 上面最先採用的 Type-C，直至近年才逐漸下降至其餘 iPad 產品。所以我相信就算有都好，都一定會係最貴嘅機型上出現先。

電池將會變得更加耐用？

每一年iPhone發佈會，電池容量一定係為人垢病，而且一定會用大量華麗的數據掩蓋電池實際容量大細。相比起 Android 陣營，iPhone 彷彿自成一國，雖然所用的電池容量比較細，但是因為有着良好的軟件配合，而且更為慳電的晶片核心，使歷代 iPhone 也可以有更長的使用時間。

如果根據目前已知嘅設計，今年嘅電池應該除了 iPhone 14 Max 會有較大的電池之外，其餘版本的電視應該會和去年發佈的 iPhone 13 系列相差不會太大，畢竟今年內部零件有所改變（部份零件模組變大），難以放進比較大嘅電池。雖然電池可能都有好多唔同嘅黑科技，可以令到一塊細小的電池可以有更強嘅續航力，但遺憾嘅係根據目前已知，唔單止電池容量沒有提升，iPhone 14 Pro 版本更有可能因為遷就其他硬件模組的設計，有機會使用比 iPhone 13 Pro 更細容量的電池以放進 iPhone 內，所以當 iPhone 14 發佈嘅時候，今年電池嘅容量大細絕對有機會比 iPhone 13 系列為差。

將會採用鋁合金？

每一年除了電池之外，另一個為人垢病嘅問題就係重量。近幾年嘅 iPhone，特別係 Pro 系列，因為使用更耐用嘅材料（聲稱），所以採用醫用級不鏽鋼。雖然真係好靚，但係好容易令到手指模印在上面。如果只係單單手指模印，搵塊眼鏡布清潔絕對唔係問題。但最大問題係不鏽鋼嘅重量，令到整個 iPhone 13 Pro 系列嘅重量達到歷年之冠。

其實一直都有傳，Apple 一直都在較細嘅裝置上採用唔同嘅物料以測試耐用程度，最好嘅例子就當然係 Apple Watch 系列（有興趣嘅可以睇返我之前選購 Apple Watch 時候嘅文章）。每一年發佈會之前，其實大家對於 iPhone 嘅設計都唔難以先睹為快，但係 iPhone 用料往往就要等到發表一刻先至知道。每一年基本上都可以聽到話今年一定會轉用較為輕嘅鋁合金材料。結果就好似狼來了這個故事，等到今年知道沒有便說下一年一定有。我自己覺得，今年iPhone 如果真係迎來大規模更改設計，例如放入咁大的相機模組、瀏海設計更動種種更新之後，外框嘅材質應該唔會再係更改，始終成本係一個考慮。其實由 Apple Watch 已經可以知道，鋁合金版本和不鏽鋼版本嘅價錢相差真係好大，所以如果今年咁多設計再要改埋採用鋁合金，今年嘅 iPhone 一定會賣到上天價，雖然對公司業績絕對係有幫助，但係高昂嘅價錢可能亦都嚇跑唔少打算購入嘅人士，所以我覺得 Apple 唔會敢冒咁大個風險。就算真係採用鋁合金都好，我覺得最快都要等出年 iPhone 15 Pro 系列先至會開始逐漸改採用。

售價

黎都最後，當然要同大家講最關心嘅問題：售價。如果根據根據蘋果嘅作風，iPhone 14 的售價應該和今年 iPhone 13 售價一樣。但是之後便是尷尬的一點，如果以 Apple 階級式的價錢定位，而且 iPhone 14 Pro 和 iPhone 14 Pro Max 嘅價錢唔改變情況之下，iPhone 14 Max 應該只會和 iPhone 14 Pro 相差不足數百元的價錢，對於 Apple 的銷售絕對是一大影響。加上今年也算得上 iPhone 的大改之年，而且不斷有消息傳出 Apple 有意在美國以外的地方也推出自家的月租 iPhone 計劃，所以可以預計今年 iPhone 嘅售價將會成為歷史新高，而且根據外媒推算，大約平均會加價 100 美金，大約$800港紙左右。

預計售價：（以美元定價）
iPhone 14：＄799
iPhone 14：＄899
iPhone 14：＄1099
iPhone 14：＄1199

所以，如果真係唔係最新科技嘅使用者來講，等9月 iPhone 14 發佈會之後，如果 iPhone 14 真的和預期一樣，沒有任何特別升級，真心建議考慮回購 iPhone 13 Pro，唔單止係一個比較化算嘅選擇，而且比 iPhone 14，iPhone 13 Pro 更有多一個鏡頭可以用。今日就預測到呢度先，下星期六再見。