《字縛》雜誌第三期|我「受」你
【作者:@珮妍媽媽🌱 ,12年全職主婦,育有一女被評自閉症及智障,現以善養方式與她一起在家實踐自主生活。】
作品簡介:
我愛你為主題。深入描述一份與身俱來、發自內心、不離不棄、不增不減的無條件愛。
【主編摘句:「你的美.是我的內在插曲」】
我受你.不一定要你受我
我自願.今生只受你一個
你不受.也改變不了我的
不知道.為什麼我只受你
我眼中.一直只能盛載你
我可以.為你改變我自己
但不是.變得我不受自己
而是我.得越來越受自己
我才能.知道怎樣去受你
我此生.或許是來找你的
所以我.腦海中就只有你
我雙眼.一秒間就認出你
我雙耳.只為你聲音打開
我雙唇.想與你的再相逢
我的話.一直留著告訴你
我脈膊.在訴說我很想你
我雙臂.是為了能擁抱你
我雙腳.能為你走千里路
我的笑.從來都是因為你
我的淚.也只會為你而流
我的念.總是為你而盤旋
我知道.你過往經歷過的
我珍惜.有你的所有回憶
我走過.一切有你的足跡
我沒法.在睡夢中丟下你
我已經.完全離不開了你
我甘心.陪伴你生生世世
我願意.與你同哭也同笑
我願意.支持你及安撫你
我願意.接納你只做自己
我願意.為你的存在歡呼
你的笑.是我的內在太陽
你的淚.是我的內在風浪
你的手.是我的內在温暖
你的話.是我的內在聲音
你的美.是我的內在插曲
你在哪.我便渴望我在哪
你在睡.我便渴望能相見
你在吃.我便渴望能看見
你在怒.我便渴望讓你笑
你在悲.我便渴望與你悲
你失落.我會默默陪伴你
你崩潰.我會靜聽你吐嘈
你脆弱.我會不語給你肩
我眼裡.你的一切都珍貴
我眼裡.能受你是我榮幸
我眼裡.你就是獨一無二
我眼裡.你是我我也是你
我眼裡.不完美的你也美
我盼望.你知道我的存在
只因為.你與我本是相同
![](https://imagedelivery.net/kDRCweMmqLnTPNlbum-pYA/prod/embed/945597db-cb93-4553-bdc6-14d3f0a3a5ca.jpeg/public)
好興奮第一次投稿《字縛》。
第一次知道有限制性寫作呢樣野。
第一次知道原來可以用廣東話白話文嚟寫文章。
依家「咸」覺自己好似俾人幫我戴咗個后冠咁。
自己成個人忽然間即刻變得華麗同自滿咗好多!
我好多謝《字縛》,俾我喺呢個人生裡面能夠有呢個機會喺度用自己嘅母語去寫文章,而且仲被熱烈鼓勵用這種與我呢個人分唔開的文化特質一齊亮相,講講下都覺得好感動好光榮。喺世界上仍然用廣東話嚟日常溝通嘅地方應該所淨冇幾喇!用廣東話白話文嚟寫文章投稿應該唔會有啩,我真係唔係好知㗎,淨係覺得用白話文投稿好鬼有趣,又好鬼有挑戰性,而且仲可以玩中英文混合添,簡直覺得自己變咗一條喺海裡面可以亂咁游水嘅大鯨魚,有啲為所欲為嘅「咸」覺,覺得有啲霸道式嘅安全感咁,可能因為知道可能唔會有人會叉到我錯字或者直接話我唔啱,所以覺得越嚟越興奮好玩。鯨魚呢刻喺我「 」裡面,正正代表咗既特別、通殺、贏硬嘅狀態。
老實講,我自己從未喺現實生活中親眼見過鯨魚,全部對佢嘅認知都只係喺書度或者紀錄片度睇到嘅,對我嚟講嗰啲圖片同描述嘅都只係一大堆嘅資料輸入,印象一啲都唔深刻。自己感覺依家喺香港讀書就係咁,只係紙上談兵,完全冇趣味,超悶,個個同學仔都呆坐喺個位度聽阿蛇同Miss講書,冇嚟表情,粒聲唔出,真係覺得好淒涼,冇哂自由,其實都唔知識唔識同識幾多,而且仲要間唔中郁啲就考試測驗,睇吓你有冇聽書温書,但係好多考嘅又冇喺生活用到喎,都唔知啲大人點諗嘅,考完公開試之後,個個都等唔切要掉哂啲書,完全只係為咗要攞成績先至死記入腦,完全違背咗教育嘅初心,覺得真係好無謂。唉!細細個讀書就已經要好似坐監咁,日日坐喺課室,連小息嗰陣都唔可以太大聲講嘢,又唔俾啲細路跑下,真係好唔人道㗎。有啲怪獸家長仲覺得俾仔女越早返學坐定定適應社會係好事,可以坐定粒六入到一條龍嘅有名學校,唔駛咁頻撲,真係R哂頭,都唔知講乜好喇!
廣東話係我由細到大嘅母語,亦係我最自在嘅語言。其實我自己都好鍾意呢種語言,因為講出嚟嘅嘢意思可以好貼切又得意,講出嚟嘅音調又好特別好盞鬼好過癮,所以我同阿囡珮妍講嘢嗰陣,都會不自覺講好多得意嘅白話文嚟玩。
以下係珮妍最鍾意聽我講嘅白話文音,依家佢都已經識講㗎喇:
顏色嘅有:紅噹噹、黃噤噤、青BB、姣婆藍、鴨屎綠、黑萌萌、白賴曬
形狀嘅有:圓姑碌、長賴賴、短切切、三尖八角
質地嘅有:尖筆甩(尖)、掘擂槌(鈍)、鞋熠熠(粗糙)、滑脫脫(滑)
位置嘅有:角落頭
身體姿勢嘅有:返轉身、扒喺度、另轉面、倒樹沖、掉轉頭
份量嘅有:did咁dur(很少)、冚唪唥(全部)
身型嘅有:肥嘟嘟、瘦猛猛
味道嘅有:酸微微、甜爺爺、苦過弟弟、辣到飛起
觸感嘅有:濕𣲷𣲷(濕又黏)、黐立立(黏黏的)、肥冧冧(油膩)、乾爭爭(很乾沒水份)
![](https://imagedelivery.net/kDRCweMmqLnTPNlbum-pYA/prod/embed/d979465f-9bae-4d87-9d96-759bd76ecfae.png/public)
【註:因版面暫時無法以設色形式排版,特以截屏形式將作者不同顏色編輯的稿件發出。】