請你好好放低你個ego

想分享下一件童年往事。

我細細個已經係個好多意見同好多野講既人（簡稱多管閒事），而我從小習弦樂，小學時有玩學校orchestra，有日指揮提出左一個我覺得好有問題既改動，我即時表達自己反對既意見，指揮一聽到就話：「我而家有問你意見咩？」

我當堂啞左，好似被人狠狠地摑左一巴咁。

細個個陣最大既感覺就係「無面」，無咁多深入思考，而家大個左諗番，當下應該係覺得自尊被踐踏了，被奚落了。

但係一句咁既野點解會踐踏到我自尊？

因為過大既「我」。

「我」姐係個ego，過大既ego簡單黎講就係：我我我我我我我我我我我我我我我我我我我我我我我我我⋯⋯

好多人都係ego大過天，但除非你有番咁上下斤兩，不然你既ego只係累人累己，而恰巧世界上叻人係佔唔多population，平庸既人先係世界大多數，大家都好大機會係one of the平庸既人，咁你ego放到咁大做乜呢？

我join左唔同既「黃絲」group，每日都見到好多人急不及待要出黎發表意見，因為放得自己太大，佢地睇唔清自己有幾多斤兩，有啲人直頭覺得自己看透世事，出謀獻策，以致於一堆「捉鬼」、鬧人「扮黃」、鬧人「伸手黨」每日發生，而做呢啲野佔據左佢地大部分既時間，所有既精力都係攞黎去拗啲「我咁醒無可能睇錯既」既野（但又唔係真係醒喎）。其實有時間不如去閱讀多幾篇有用文，睇下書同電影，沉著一點思考下，多學習，修煉專長。

你唔出聲都唔會對個世界有咩影響的，其實無人想知你點睇的。

呢樣野唔止「黃絲」有，放諸於大部份人同群體都一樣，幾乎係人性黎。舉兩個例子：啲facebook group成日有人特登出post話群組「太政治化」喇所以要退群；有次參與業主大會有個睇落年邁70既阿伯走上台大大聲話一定唔會揀後生參選人，都係個句：

無 人 想 知 呀（幻想下周星馳對住個海嗌個幕）。

我知，原來自己係咁唔重要既呢個事實好難接受，亦好難接受原來自己既意見係no one really cares，但係當你肯放低少少個ego去睇下個世界有幾大時，你會知道你只係一粒微塵，你既意見唔重要係好正常，你而家既不安、難受情緒都只係好minor。而喺你想發脾氣屌鳩我講野刻薄之前，不如諗下點解自己會有呢個情緒，嘗試將所有野都放低，停一停，觀照下你既自我。

For 抗爭-wise：抗爭之前你首先係一個人 ，你必定要去認識自己，清楚知道自己有乜問題，先可以做好一個人，簡稱係「革自己的命」。如我之前既文所講：先自我檢討，追求自我成長，再去講回饋群眾。

講到呢到，咁我地而家可以做既係咩？謙卑做人，在自己專長上默默耕耘（無既你快啲去發掘！！！），少說話，多做事。做左幾多野唔洗同人交待，唔需要掌聲同喝彩，唔需要好多心心同like，因為我地決定做乜都係與人無尤。將「我」放低，抗爭如是，拍拖如是，番工如是，做人父母如是。

曾經見過某小隊投稿[1]，提起《Batman: The Dark Knight》入面Joker講既野，再quote埋DC個Joker既對白，大概意思就係唔想成為condom、佢地做左好多野無人理等等。而我想講既係，Bruce Wayne為了大局，寧願背負殺死Harvey Dant既罪名，隱世八年，佢從來無去怪過其他人，無去怪Gotham既人唔支持自己，無去怪人地唔珍惜自己既付出，只係默默咁做自己認為應該要做既事 —— 我希望大家都可以從Batman身上學到「無我」，奉獻既精神同信念，而唔係只在Joker身上自我投射同尋求人格缺陷既認同感。

成功不必我在，功成定必有我。放下ego，認真做事，共勉。

參考資料：
[1] 蜘蛛小隊 於PPRN的讀者投稿
https://www.facebook.com/…/a.133481744682…/154130589284741/…

延伸閱讀：
抗爭之前你首先係一個人
https://medium.com/@lifesabitxh.13…/抗爭之前你首先係一個人-222d7523a2a1

革命是在殘軀中仍能奉獻幾多 — 本民前無名手足字https://www.facebook.com/1546925482228025/posts/2536063456647551/?d=n

Facebook:
https://www.facebook.com/lifesabitxh/photos/a.118784416193411/166960881375764/?type=3&theater

Medium:
https://medium.com/@lifesabitxh.13…/請你好好放低你個ego-3c91d73a0401

#做人好難