天災麽？

我唔想倖災樂禍咁，但完全明白網民對鄭州水災感受，反而頂唔順有人（特別屎塔笨教徒，好彩有 Phyllis Luk 唔係）不斷話天災咋，氣候變化咋（環保L而漠視制度問題又只係屎塔笨），完全冇提嚴重傷亡係人禍。我國內友人特意提温州動車出軋意外十年了，已經冇乜人記得，當時結論係雷擊導致訊號系統出錯，又係個天嘅錯，然後件事只係歷史上嘅小小意外，死咗嘅人只係一個數字。人嘅尊嚴只係垃圾。香港以前仲可以為南丫島海難追查真相，但唔知以後會唔會只係尋釁滋事。

好多人已經寸所謂千年一遇其實又如何，然後水壩排洪可以唔通知下游，然後明知紅色警戒地鐵仍運行、隧道不封閉！又話用咗500億建設海綿城市，東京都心圈都只係用咗250億嚟防止水浸，諗到有幾多錢袋咗係貪官到。再講猛起水壩其實有幾多科學論證，最終又係大工程幫貪官揾多啲錢。

我原先只係心諗猶疑寫唔寫，但我上述國內朋友講佢女兒去美國讀書都要返國內打科興，低估女兒嘅愛國心，我覺得好恐怖，成日宣傳多難興邦，成日講自己係受害者（包括列強侵略、阻礙發展），完全唔去反省制度問題，然後又產生一批冇獨立思考嘅小粉紅。依家個劇本係想香港咁，我抗拒只能發一點微聲。