「俑」的疑惑

呢期興講「始作俑者」，我都趁呢個機會講下我一直對呢個成語嘅疑惑。

呢幾日大家都應該好清楚，「始作俑者」來自《孟子・梁惠王上》：

仲尼曰：『始作俑者，其無後乎！』為其象人而用之也。

意思亦好似好清楚：孟子話孔子講過：邊條友第一個搞俑葬嘅，就應該絕子絕孫！

但商人一直有人牲祭祖嘅習慣，傳到去春秋，變成用人俑陪葬，其實係文明進步嘅表現，點解搞到要咒人生仔無丁丁咁惡毒？再睇埋《禮記・檀弓下》就更R頭：

孔子謂「為芻靈者善」，謂「為俑者不仁」，不殆於用人乎哉？

「芻靈」即係草扎嘅人形公仔，估計無眼耳口鼻，係而家紙扎公仔前身。點解草扎就善，但人俑就同人牲差唔多？

另外，孟子句中「象人」[1] 可以係名詞。《周禮・春官・冢人》：

及葬，言鸞車象人。

象人，木偶人、泥人，即一般所理解嘅「兵馬俑」、「唐俑」之類。然則孟子講嘅「俑」，就唔係我哋一般理解嘅「象人」，噉兩者有乜分別呢？

再分析個「俑」字。首先，「俑」只有小篆，據講小篆係戰國晚期秦國丞相李斯整理出來。早李斯幾百年嘅孔子，當時連字都未有，噉佢點講「始作俑者」呢句說話出來？點傳到去畀孟子？

而意思呢？《說文解字・人部》: 『俑，痛也』，我睇見真係頭痛，完全九唔搭八。但亦見到至少到東漢，「俑」都唔係解「人俑」。

查《康熙字典》，則見到宋《集韻》、元《韻會》等解「俑」為「從葬木偶」。另《註》：

俑則設機發動，全似人，能踊躍也。

「俑」係機械人，識跳架喎，春秋時咁高科技？？

再分析字型，「亻」旁加個「甬」。噉「甬」係乜來呢？查字典：

金文「甬」表示一種車器。彔伯簋「金甬」，郭沫若認為即金鈴，也就是鑾鈴。

「甬」即係以前馬車上嘅叮噹。噉「俑」照計應該係⋯⋯人型嘅叮噹？細思極恐喎⋯⋯堅定流呢？

小弟真心唔明，呢個問題喺心入面都有一段時間，懇求高明指教。

1. 象人到東漢時，亦指祭禮中戴假面具嘅人，見《漢書・卷二二・禮樂志》：「常從倡三十人，常從象人四人。」