《2022年過得幾好》

「話咁快又一年⋯⋯」以往嘅我都係咁諗，雖然人老咗有啲年份真係會混淆，但係今年我又唔覺得過得特別快。

望返2022年我到底搞過啲乜先。首先年頭我嘗試開個IG寫乃木坂，寫咗1個月左右就停咗。原因之前講咗，就係除咗寫齋藤飛鳥個篇有個靈魂喺度之外其他都係有形無實，而且準備素材嘅功夫比我想像中要花更多時間。

2、3月嘅時候，大家都要WFH。可能因為多咗時間可以諗嘢，又或者因為反省完乃木坂IG嘅失敗，個人好執著於「靈魂拷問」呢樣嘢。於是我又喺3月左右開始喺IG度打咗幾篇自己心入面一直都諗𡁵嘅疑問同煩惱。後來覺得IG打字無得save好麻煩，於是5月走咗去Matters度開個account寫吓嘢，，差唔多1個星期就寫1篇。然後將積咗幾年以來嘅心聲、想法、同埋想嘗試嘅題材都抒發得7788，就停咗落嚟。

而喺寫𡁵嘢嘅4月尾，值住同媽子「借第一期消費券用第二期還返」嘅操作，我迎接咗我嘅愛機 - Sony RX100M6。以前我都買過幾部相機嘅，不過都係因為特價貪平就買咗。到真係用落嘅時候，唔係覺得重就發現唔夠用。當我收到消費券嘅一刻，我諗𡁵到底應該買Macbook定相機。不過屋企電腦又唔係打唔到機，所以就決定買相機。

當睇完好多段Youtube講買機同埋唔同model嘅取捨，加埋我為買相機呢個決定畫咗好幾次Mind Map之後（我每次有諗法同打算都會畫Mind Map），終於敲定買呢部機。結果今年帶佢出去影相嘅次數，應該多過我以前帶相機出去嘅總和（諗返真係浪費咗唔少錢）。買呢部機，可以話係2022年我第一個做得最好嘅決定。

然後到咗7月，我終於跟咗阿妹去上泰拳堂。無錯係終於，因為講話要跟講咗應該有兩年（可能更多）。去上堂嘅原因，就係9月要做兄弟，要減肥。（無錯兩個月嘅時間真係無可能有咩成果。）記得星期日上完第一堂，第二日落床都嗌哂救命，落樓梯簡直係酷刑一樣（笑）。不過第二堂之後，我就無呢個問題。同埋我深深感受到，我都好鐘意打拳嗰種攰到喘晒氣、個人散哂嘅感覺。就好似做MC上台講嘢之前，個心跳到就嚟飛出嚟、對手都震埋嘅緊張。喺呢啲時候，我會好感受到自己「活著」嘅感覺。（但請唔好叫我玩過山車等刺激嘅機動遊戲，我會覺得嗰啲係「驚」wwww。）

上咗1個月，我就即刻加碼1個星期上兩堂，除咗周末會夾阿妹嘅時間，自己都開始平日夜晚上堂。到最後阿妹「傷出」，我都無停到自己繼續上，仲帶多兩個朋友。打拳係2022年第二個最好嘅決定。

到咗9月，上咗兩個月左右，我就發現兩個樽頸位。第一個就係我到咗個減肥平台期（個兄弟係同我咁講），第二個就係體力拍馬都追唔上啲師兄師姐，特別係踢腿轉腳嗰度單腳支撐唔到幾耐，我諗都係對腳嘅耐力差同埋個人真係重得滯。我記起一個朋友靠行山成功減肥，想有樣學樣。不過我完全係行山新手，所以我決定㨂啲易行嘅山嚟行（我覺得更靠近係遠足）。

既然會去郊外，當然要把握機會拎埋相機影相。RX100嘅輕便令我唔會抗拒行山帶相機，加埋M6嘅200倍變焦，令到我可以影到更多我想嘗試影嘅相。（唔係鱔稿，真心推。）我將上泰拳堂嘅時間改為盡可能平日夜晚上兩堂，周末如果無落雨都會行一次山。雖然年尾而家又到咗第二個平台期，但係我都成功再瘦3、4kg，我終於唔洗留鬚都見到自己個下巴wwww！

行山係我今年做得最好嘅第三個決定。唔只因為幫咗我突破第一個平台期，更重要嘅係呢個活動好符合我個人嘅興趣同理念。第一係可以做運動：減肥呢樣嘢暫時都係隨遇而安，最緊要係新冠面前我覺得係拼𡁵個人身體嘅底子，做多啲運動促進吓血液循環，又可以練吓對腳嘅耐力，打拳時容易跟得上。

第二就係做緊運動嘅同時又可以影相：一開頭我揀嘅路線咁啱多數都係望到海嘅地方，取景上嚟唔算太難。但當去到近期行多咗唔同地方之後，我就開始要諗吓唔同嘅取景，同埋要提升對自己部相機嘅熟練度。影得多咗之後，我開始subscribe埋lightroom，嘗試吓執相，執執吓嘅同時又產生咗關於「直出」同「執相」嘅諗法，無論係睇嘢定諗嘢都多咗一個角度。

第三就係行山會攰：就好似我上面咁講，攰、緊張令我覺得我自己「活著」。同埋我因為自己一個人行比較多（我好怕因為影相而要同行嘅人等我好耐），所以行到幾攰都係自己鼓勵自己「畀啲掙扎」。我好中意呢個信念，因為佢陪住我渡過咗我好多大大小小嘅難關。無論係考A Level前study leave先開始溫書、遇到問題煩惱想放棄思考、前面仲有幾百級樓梯要行完先過到座山返屋企，我都係同自己講：「畀啲掙扎，唔好放棄。」

第四就係行山除咗交通費、茶水之外，幾乎唔使洗錢，又可以達到大量kill time嘅效果，符合我嘅個人理念（係我嘅理念入面，人生就係kill time，重點在於係咪有自我意識嘅kill time）。個cost咁低而帶嚟咁多嘅好處同滿足，我覺得真係無得輸。

上面講嘅大部分都係自己嘢，今年亦都同好多人有好好嘅相遇同埋開心事！有同另一伴共諧連理嘅、有新增家庭成員嘅、有認識更多新朋友嘅、有搵返啲失而復得嘅、有飲咗好多唔同whisky嘅，有係咁玩唔同boardgame嘅（Yo係時候開始瘋狂玩boardgame啦！）、又有成日都唔介意我去做電燈膽痴餐嘅（笑）⋯⋯總之真係多到數唔哂！多謝大家對小弟嘅包容同遷就！

睇返今年過得幾好，多咗啲新興趣，又去埋期待已久日本中部了。本身今個月想開始pick up返啲日文，但係始終人太懶，返到屋企掛住睇Youtube同乃木坂都無乜心機拎起本書。唯有又係搵定張紙搵定枝筆慢慢睇吓有咩辦法wwww。

今晚飛鳥就要從乃木坂畢業了，老實講個心都仲係有啲忐忑。雖然我唔會放棄追乃木坂，但諗到佢唔係度以後無咁易喺啲節目見到佢總係有啲憂心。不過無辦法，總有一日佢要從乃木坂畢業。作為鳥推希望佢可以做到佢自己想做嘅事，身體健康一切安好就非常之好了。當然，我都希望可以抽到飛鳥嘅畢業con！

希望嚟緊2023年都可以過得幾好！