性愛自修室：回到16歲

呢個時勢，可以有樣嘢令人好好放鬆實在唔容易。適逢人心惶惶之際，《Sex Education 2》上架，納悶時，豪不猶豫，一口氣煲晒，睇完心情有所釋放。雖未稱得上大愛，但起碼睇到會心笑，又打從心底裡覺得悒。

第2季，雖冇比第1季差，但都冇特別出色。純粹係講埋上一次未講完嘅故事。雖則，到最後都仍然要鋪出第3季⋯⋯

今集，主角Otis、阿當Adam、女主角Maeve 明顯比上集有所成長，其中尤其鍾意Otis 嗰條線。Otis 比同年齡嘅人規矩，總係想做好人，但又因為咁為難自己又為難咗身邊嘅人，最終不得已做咗「壞人」。事情往往就係咁，唔會因為你循規蹈矩就可以令一切相安無事。加上，作為一個16歲嘅學生，思前想後太多，只會猛拖青春後腿。如果16歲呢個年紀都冇勇氣做到，鍾意就追，討厭就推開，長大成人後，就更加唔使旨意做得到。趁重可以做自己，儘管去做，哪怕得失自己同別人，年輕人絕對擁有無上限嘅寬容額度，請不顧一切，持著所擁有嘅本錢，盡情揮霍。一味守著個龍唔進攻，唔係唔得，但要接受無法感受入波嘅痛快。 其中特別鍾意 Ola 撇 Otis時講嘅一句：「你說你得好好想想，你認為這很困難，這不該那麼困難的， Otis，我們才16歲。」

Adam 係一個好有趣又超貼近你我嘅角色，外表高大強悍，但內心脆弱到連自己都唔知覺，唔鍾意解釋，喜歡自得其樂，做無聊嘢，古靈精怪。佢做嘅嘢，永遠介乎喺「啱」同「錯」、「做到」同「做唔到」之間，盡管如此，仍然會去試。呢種人，總係嘗試盡力，嘗試做好，但又唔敢去到咁盡，畀少少油又收返，硬係有嘢做做下覺得唔對路，硬係Keep唔到狀態，然後就畀籍口自己，嘗試為自己解釋點解只能夠做到呢步。

但說穿了就係，重未搵到一樣會令自己發光嘅事物。 好多人都似阿當，可以求其就求其，咁啱呢排有運咪相信自己多少少，但最後原來乜嘢都Build Up 唔到⋯⋯

又好彩，Adam 有佢嘅小Talent ，敢於正視自己嘅心理包袱，開口爭取自己想要嘅嘢。Adam唔係廢人，只要對人或對生活重有Passion，都絕對唔係廢人。

然後有啲私心好鍾意嘅位係⋯

Otis媽媽被拒絕時，播嘅《Mystery of Love》（From Call Me By Your Name），呢首歌真係不得了⋯加埋Gillian嗰下演得咁好，真係又令我諗返起Elio 望著堆火個落魄樣，唔洗講嘢，唔使拿埋口面，都完全Feel到佢有幾痛，嗰份感覺有幾重⋯

同時，我又好鍾意Alex，尤其係佢同Otis 之間極Pure嘅友誼。唔知點解，明明友情係無分年齡階層，但總係覺得人大咗講「友誼」呢個Term好Old School⋯ 同另一伴講「我愛你」又冇問題，但同朋友講「友誼萬歲」或「FriendForever」又咁尷尬。Alex同Otis 嘅情誼，好比套戲裡任何一段Friendship 嚟得更真誠 同坦白，又或者真係如黃子華講：「女人嘅友情真係好脆弱」，睇男仔之間嘅友情會更加令人渴望。

雖則，16歲嘅愛情同友情都唔應該會搞到咁複雜，但切合需要，考慮到廿幾歲步入三字嘅人會唔知醜撳入去睇，都唔會話睇到尷尬同無管戙，反而重會喺呢班年青人身上學到少少嘢。