2020年度F1賽季回顧

首先同大家講句唔好意思先，因為如果你係因為標題而想用一篇文章時間回顧整季F1的話，我只可以講我無能為力。今次主要係同大家回顧今季我個人認為值得大家回顧/深入了解的事情，因為主要係我個人認為，所以可能會有大量主見和偏見，敬請原諒。

首先就講下車隊，有三隊車隊我覺得值得講下，分別係：平治、法拉利同威廉士。

先講平治，其實當賽季過咗一半嘅時候，七屆車廠世界冠軍基本上已經毫無懸念；不過我想講嘅唔係車廠，而係有如瑞士鐘錶準確的pit crew。雖然今季賽事他們並沒有好似Red Bull 咁做出2秒內嘅pit stop，不過一直就甚少出錯，大部分時間都可以做到3秒內完成。不過，正如鐘錶也會有無電同需要抹油嘅一刻，係今季第八站，即是意大利大獎賽，如果大家仲記得，我想講嘅就係咸美頓紅燈入pit。雖然我唔係想講係車手定pit crew要負責任，但呢種可以避免嘅低級錯誤係唔應該會發生；另外我想講就係尾二站巴林第二場比賽，當然，Russell嘅表現絕對值得囉冠軍，不過只可以算天意弄人，但人為因素也少不免。正所謂：均速轉後追，一定唔會衰，雖然終於可以成功係F1生捱中第一次成功取得分數同最快圈速的額外一分，但賽後平治領隊 Toto Wolf 都話第二次 pit stop 係可有可無。我個人覺得果刻入pit，我相信主要係想避免再一次發生類似今季英國銀石第一場比賽爆軚嘅情況出現，始終如果真係出現爆軚情況，我諗 Russell 未必有咸美頓咁有經驗可以捱到返pit stop。雖然最後都係因為爆軚問題而需要再次入pit換軚，不過今季由頭到尾都真係有不少車手投訴今年 Pirelli 所提供嘅車軚有好多大大小小唔同嘅問題。總括嚟講，作為一支世界冠軍車隊，而且更加是七屆世界冠軍，車手和戰車實力絕對高人一等，但竟然可以一季犯兩次不會在其他隊伍出現嘅低級失誤，我覺得係有少少自滿，要犯過錯才可以知道自己才是真正的百分百完美車隊。

之後講法拉利，如果你係一個法拉利迷，我相信你今季應該係絕對失望。無他嘅，由上而下到見唔到法拉利有鬥心。由排位賽到正賽，大家都睇得出已經係得過且過，入到Q3已經算係奇蹟。當然，戰車研發係一個好大嘅問題，呢個係一個現場改變唔到嘅事實，但正所講：爛船都有三斤釘，車唔掂，人嘅士氣也可算是一種動力，但大家今季見到最多嘅應該都係法拉利pit stop 破紀錄，係破最慢嘅記錄嘅時候，我相信大家都已經心灰意冷。當就算平治換軚失誤都只係用咗30秒左右嘅時候，法拉利今季竟然可以多次做出多次超過35秒嘅pit stop，甚至60秒嘅pit stop 都屢見不鮮，而且只是換軚，沒有換其他物品；另外，如果大家今季有睇，其實就已經可以見到多次 Vettel 問用Plan B 定 Plan C，然後車隊答轉頭覆你，之後 Vettel 用大量四字真言回應，之後仲可以問返 Vettel 轉頭你想用咩Plan，其實我相信大家都睇得出，法拉利今季由上到下都已經無心戀戰。員工士氣低落固然係一個好嚴重嘅問題，但始終解鈴還須繫鈴人，我哋作為局外人，當然無辦法知道士氣低落嘅原因，不過希望嘅係出年2021年可以見到有所改變。不過，連法拉利領隊Mattia Binotto 都話最少要2022年F1大改先有機會重振雄風，我諗2021年我哋都只可以見到法拉利同今年情況差唔多。

最後就講吓威廉士，由2014年開始就已經變成陪跑份子，而且今季車隊連一分都無。不過我就唔係想講今季威廉士車隊表現，（當然今季DNF比率雖然比Hass低，但成績比其他車廠差，而且失誤情況又經常出現，不過呢啲都係後話。）我比較想講嘅係而係賣盤。一間曾擁有九次世界冠軍車隊，七次車手世界冠軍，43年參加F1嘅經典英國家族經營車隊，而且曾經有過許多創新兼成功的F1發明，但最終都係因為經濟問題而賣盤收場。作為一個車迷，我係覺得十分惋惜，不過正如人生一樣，唔如意嘅事十常八九，依家賣盤我相信點都好過結業收場。相信大家都知道F1絕對係一個無底深淵，如果不能勝出比賽，絕對係一個燒錢嘅行為，以現時車隊情況，基本上係沒有任何財力同其他車隊鬥，現在唯有期待2021年F1引入Budget cap 財務支出上限之後威廉士車隊有機會係F1賽事中有分。至於冠軍，我相信緣份到了就自然有機會；不過又咁講，大家對Russell 呢個年輕人嘅表現有目共睹，如果2021年威廉士車隊架戰車有進步的話，Russell 有無可能可以為威廉士囉到分呢？我個人希望呢件事係會發生。

講完車隊，之後就講下今季比賽。

今季賽事我相信對每一個工作人員黎講都係近年黎最辛苦嘅一季。今季賽事本應三月係澳洲開季，不過因為疫情而取消。本身取消比賽係無可口非，但大會公佈取消嘅日期係比賽前兩日。其實咁樣某程度上可見 FIA 緊急應對方面出現問題，不過亦都有傳聞係因為背後牽涉大量賠償引致太遲公佈，至於係咩原因引致當然我哋都係無從得知，不過我相信果刻每位工作人員失望嘅感覺絕對比每位車迷大。

跟住去到意大利法拉利第一千場紀念賽事，係相隔1400日2016年巴西站之後再一次以出現兩次紅旗情況，仲要係一場內有兩支紅旗出現，當然呢個事件係極度唔尋常。第一支紅旗出現嘅時候就係喺重新起步嗰陣後面四架車大炒，正如事後好多車手都有講就係賽會越嚟越遲着綠燈，雖然咁樣可以保留賽事可觀性，但係另一方面呢個安全問題就越來越大，過去無發生主要係因為車手小心。但正所謂意外，意料之外，車手都只係一個人，都總會有一兩次犯錯／出錯嘅時候，結果就引致今次意外。雖然賽後大會表示無車手需要為呢個意外負上全部責任，但係我個人覺得要付上最大責任應該就係大會本身，始終賽事可觀性同車手安全上面要取得平衡我相信係唔容易，但既然可以避免發生嘅意外，點解要令到佢發生？至於另一個意外就只可以算係 Stroll 唔好彩，始終機件故障唔係車手可以控制到嘅範圍。至於今場作為紀念法拉利第一千場參加F1賽事嘅比賽，雖然兩架法拉利戰車都攞唔到頭三，但係以佢哋嘅實力可以入到頭十名有積分攞已經好好，我相信係好多法拉利車迷眼中，咁樣嘅成績已經可以收貨。

至於去到九月尾左右，有一單都幾令人遺憾嘅消息傳出，就係Honda 於2022年後將會再一次退出F1引擎供應，係歷史以來第四次宣布退出F1。當然，2022年之後 Red Blue 引擎供應到而家都仲係迷，不過亦都令人諗到就係自從2014年進入 V6 Turbo 混能引擎年代之後，一直就由平治奪冠到而家，基本上其他廠商都只係陪跑。雖然2022年係F1大改之年，但Honda 決定提早離場，某程度上亦都代表 V6 Turbo 混能引擎只有極少數廠商可以駕輕就熟，簡單啲講即係只要成功研發，就可以壟斷F1賽事。我個人當然係希望可以係有身之年見到 Honda可以第五次回歸F1，畢竟百花齊放總好過單打獨鬥，賽績優秀。

之後就返到去闊別九年嘅土耳其賽道，又係一場今季非常之精彩嘅賽事，精彩嘅地方除咗車手嘅表現，更加重要嘅就係賽道本身。如果大家仲記得，當時賽道管理局為咗迎合F1回歸土耳其，專程係比賽四個星期重鋪賽道，加上之後一直缺乏比賽，令到賽道上嚴重缺乏抓地力。叧一方面，去到比賽之前工作人員不知道什麼原因，在每天賽事開始前均會向賽道灑水，令到賽道嘅抓地力變到得返零。最後亦都因為比賽週末落雨，正所謂：濕滑嘅路面就有濕滑嘅司機，所以由自由練習時段、排位賽到正賽，我哋見到嘅係一次又一次賽車喺地面上畫東甩，由咸美頓到 Max Verstappe，基本上都無一避免。不過今場嘅結果都有啲意外，首先就係一條半乾濕軚可以行到超過50個圈已經算係一種創舉，大家賽後都應該見到車軚已經變成光頭軚，距離爆軚只係一步之隔；另一個意外就係法拉利嘅 Vettel 竟然可以喺離開法拉利之前重上頒獎台，而且仲要係九年前攞冠軍嘅地方，雖然今次佢攞唔到冠軍，但我諗對佢來講應該係離開法拉利之前最振奮人心嘅一次。

尾三巴林站，我只可以講句：乜又係你呀 Kvyat。兩次意外，佢都有份；不過又咁講，兩次意外佢都避無可避。其實今站比賽，就算唔係F1車迷都好，我相信大家都只記得 Grosjean 撞到防護牆爆炸著火，

呢個亦都係近年以來F1 最恐怖嘅意外之一，我絕對唔係啲咩物理學家，而且我物理嘅程度只係去到中三，所以我唔可能會揣測點解會發生咁大火，我只可以肯定油缸係元兇之一；不過我想講嘅係，現代F1嘅安全設備已經比幾十年前提升咗好多，但係點解架車仲會爆炸著火，同埋點解車手做足安全措施，手同腳都會二級燒傷。當然我唔係專家，答唔到呢啲問題，但係亦都不禁令人反思就係佢每一場車每個車手喺度比賽嘅時候，其實佢哋每一次都係冒着生命危險出賽。今年嘅F1賽車應該係有記錄以來最快速度嘅賽車，究竟係追求速度嘅時候FIA要點樣保障返車手安全，我諗呢個亦都會成為FIA未來幾年重點改善嘅方向，畢竟今次好彩，唔代表下一次會安然無恙，當然我哋更加唔希望見到又再多一次類似意外發生；至於第二場巴林賽事，正如我上面咁講，只可以算係 Russell 時辰未到。

總結來講，今季賽事真係令人又驚又喜，大量精彩嘅爬頭，亦都有唔少令人目定口呆嘅意外，例如爆住軚贏冠軍同贏完分站冠軍之後下一場DNF。不過正如人生一樣，凡事總有起有跌，機會黎到嘅時候You cannot talk，但機會未到嘅時候，只可以當時辰未到，唔係話車手唔夠努力，只係運氣都係比賽嘅一部分。今季賽事同時亦都破咗好多記錄，至於有啲咩記錄被打破相信大家都已經知道，不過有一個記錄依家都仲未被打破，就係車手領先最多圈數紀錄，現時最高領先圈數係5111圈，由米高舒麥加保持；而咸美頓係5099圈，不過我相信呢個紀錄下季開賽就會好快被打破。

最後，我相信好多人都想知道嘅問題，就係Red Blue 嘅 Albon 2021年去留問題。好遺憾，直至到目前我寫嘅呢一刻為止（2020年12月18日 下午四時五十六分）都仲未有任何正式消息公佈，不過已經有外電報導最快將會於星期五公佈由 Perez 取代 Albon 成為 Reb Blue 2021年 F1 比賽二號車手。

我相信Red Blue 手上有關 Albon嘅數據一定比我哋多（廢話），不過亦都某程度上證實咗一個都市傳說，就係：使用Honda 引擎一嘅賽車絕對唔係個個可以輕易駕馭。最佳例子就係今季嘅MotoGP，衛冕冠軍Marc Márquez 因傷而退出整季賽事；而隊友兼細佬嘅 Álex Márquez 雖然都係駕駛由Honda 提供嘅RC213V，但成績截然不同，亦都令到今季 Repsol Honda 失去最佳車隊同最佳車廠。講返 Álex Márquez 今季表現，有兩次DNF，三次完成比賽但未能得分，但可以連續兩星期以亞軍企上頒獎台。當然，每項運動運氣當然唔少得，但人為因素都少不免，Honda 引擎其實係一副十分優質嘅引擎，更加重要嘅我相信係車輛與車手嘅結合，簡單啲講即係人車合一。正所謂：硬淨唔一定實得，軟弱唔一定實唔得，如果可以馴服 Honda 引擎，就可以係由人控制架車，例如 Marc Márquez 同 Max Verstappen，甚至可以囉到分站冠軍；但如果唔可以馴服 Honda 引擎，就變咗係由車控制返個人，例如 Álex Márquez 同 Albon，企上頒奬台又得，完成比賽但未能得分又有可能，甚至DNF都有可能，真正一面天堂一面地獄，力拼僅敗，鬥心損壞。我個人就當然希望 Albon 明年可以繼續上場，始終Albon 都仲係F1 二年生，如果繼續努力，我相信係可見將來上頒奬台囉分站冠軍係絕對有可能，不過前提係要改善比賽期間不穩定嘅表現。

至於電視直播方面，到目前為止，FOX SPORT 亞洲地區 F1 同 F2 賽事直播合約到 2021年賽季結束／年末，所以大家應該可以放心，不過就未知道會唔會繼續有廣東話評述。

最後最後，如果想討論，歡迎大家一起留言討論，之後希望可以大家拍五下手，支持下我繼續創作嘅原動力（土下座