憑感覺才是高度有翠的王道

2021/3/16

最終嘅醫學意見原來係要憑自己去感覺。咁憑感覺是咪可以做醫生？憑自信就可以考警察？

科學委員會主席劉宇隆喺《立場新聞》專訪中認為，

科興疫苗的數據「唔完整」，未成熟，「青咇咇就摘落來」。但他仍堅持，自己言盡於此，打唔打，大家自己決定。他說這也是自己多年來行醫的理念，「有人話我痴線，I do what I like，I show you how I live，what you do is (of) your own choice!」

世界上有啲嘢如果「青咇咇就摘落嚟」，係會食壞人死人的。番茄就係一個好例子。未成熟番茄裡面所含嘅毒素，唔會因為高温煮熟而被破壞。即係，點樣整色整水，都重係會殘留對人體有害嘅毒。

主席，發表如此嚇到人個心都離一離嘅偉論之前諗一諗好嗎？好彩我暫時無心血管問題，咪得聽完呢段空氣震盪，連針都未打就嚇到乘鶴歸去就唔抵啦。我相信喺呢個緊張時刻，唔會有人介意做乜諗嘢㗎，或者您唔出聲唔回應反而更加幫到忙。。家陣社會已經有好多驚弓鳥型嘅羊群，正常人都唔會想繼續多落去，變成羊城。人心惶惶，份份工都唔容易打，香港人當然明白。請教你，係希望從你專業角度嘅意見可以令升斗市民知道更多有關訊息，做羊群都起碼知道自己係隻羊先得㗎。之不過萬萬估唔到原來專貴又專業嘅意見係咁模稜兩可。所以有學識但本身無腦無 guts，就點包裝點修飾點 hard sell，都似個未熟嘅番茄咁囉。

政府朝令又夕改，有理由相信有人因為憑感覺就認為自己怕死，旗未舉定就提住腿縮定沙。喂，我專重您跟大隊，但係請您虛心學下點樣能夠跟貼啲，會冇咁突兀礙眼。做唔到前胸貼後背春運式咁死跟，係唔會到彼岸的。

又似買完莊先至嚟做個諗樣，所以隻手扶乩（no offense to this traditionally specific career）咁喺公家枱面來回掃。可能手指會冇咗，但 no big deal，或者會頒個獎讚揚您高度有翠。無有錯，呢一種光榮，比起被美國制裁人士念念有詞嘅光榮勁好多，但願您能依然故我，個朵自此又響又香。

What you say is of your own choice. To me you are just a joy，嗚呼哀哉嗰哉，to be more exact！