如何保護自己的隨身智能裝置

相信對於好多人黎講，對於自己每日都使用嘅手提電話、平板電腦或者智能手錶，都會作出一定嘅保護，例如手機殼、螢幕保護貼等等。但市面上琳琅滿目嘅種類，到底怎樣才是最適合保護？加上好多令人聽起上嚟就覺得好厲害嘅文字，例如：9H、抗藍光、康寧玻璃、支援Qi無線充電等等各式各樣字眼，其實絕大部份都只係一些取巧嘅詞語，甚至乎根本完全沒有作用。雖然你可以話係誤導消費者，但係又有幾多消費者會清楚知道自己購買的東西到底係有咩作用？不如就等我今日同大家好簡略咁說明市場上常見嘅誤導。

係開始之前，首先要同大家講嘅就係我沒有受到任何廠商嘅邀請或者合作（當然我希望會有，有興趣嘅絕對歡迎找我Www），咁所以之後會講嘅部份品牌將會用“Ｏ”取代個別品牌當中的名字。

螢幕保護貼／Mon貼

相信講起保護貼，我相信全世界96%嘅人都會為自己嘅電子儀器貼上保護貼。至於點解我好肯定唔係100%？因為我身邊真係有幾個朋友無貼保護貼。

其實市面上保護貼種類真係琳琅滿目，五花八門嘅種類都有，常見嘅有：9H玻璃、康寧玻璃、抗藍光、抗油性、抗水性、防偷窺等等。不過係講唔同特性之前，首先大家要明白一樣連製造商都會取巧嘅事實。例如目前市場上佔有率最高嘅Apple，去年所推出的 iPhone 13 系列以及 Apple Watch Series 7 系列，兩者都係宣傳使用藍寶石玻璃作為螢幕，而且發佈會及廣告中亦都有提及藍寶石玻璃係可以抗撞擊、十分堅硬。雖然藍寶石玻璃相比一般玻璃有更堅硬嘅表現，但係玻璃始終係玻璃，都總會有脆弱老化嘅一刻，所以即使係宣傳非常抗撞擊等，但其實可能只係普通嘅門角或者跌落地下已經足以令到玻璃碎裂。而佢指嘅堅硬其實主要係指可以抵抗硬度嘅衝擊，例如用鉛筆在螢幕上面寫字唔會令到螢幕碎裂（雖然我都好肯定唔會有天才用鉛筆在螢幕上面寫字）。而保護貼當中嘅9H其實都係一樣道理，H是指莫氏硬度（因為呢一方面實在太科學，有興趣就自己去維基百科了解），所以其實9H是指可以抵抗撞擊物的硬度，而不是可以抵擋任何衝擊。康寧玻璃亦都係因為以耐用同保護力強出名，但其實亦都係異曲同工之妙，所以就不作額外解說。

至於抗藍光、抗油性、抗水性這一些特性，其實都唔可以話係無用，不過只係作用不大。電子儀器所發出嘅藍光雖然對眼睛可能會有一定程度上嘅影響，但係相比起使用抗藍光的保護貼，係一個光線充足嘅環境下使用電子儀器，可能已經比使用抗藍光的保護貼優秀。至於抗油性、水性這些，其實正常情況下，大部份螢幕保護貼基本上都有這些功能，唔需要額外重視，只是因為大部份人都覺得列出更多功能，感覺上更厲害，所以這一種取巧完全是應對一些什麼也不懂得的消費者。

防偷窺保護貼方面，我自己目前正在使用這類型的保護貼。應該點講，係唔係特別好用？其實我又唔覺得，但係相比普通透明的保護貼， 防偷窺貼係私隱上面絕對係更勝一籌。當然，手提電話唔係太能夠感覺出黎，但如果係使用平板電腦等螢幕比較大的電子儀器，防偷窺貼絕對係一個比較有感覺嘅保護貼，所以我覺得效果都係因人而異。

另一個好多人都煩惱嘅問題就係，到底應該選擇玻璃定係塑膠貼？玻璃相對上可以提供更好嘅保護性，但係容易碎裂，如果你係一個經常跌電話嘅人，玻璃保護貼絕對係一個經常性開支，長遠來講絕對唔係一個化算之選；塑膠貼雖然不能抵抗任何衝擊，但係由於是塑膠質地，往往能夠提供比玻璃更順滑的手感，而且價格比玻璃便宜，所以我相信大部份人都有過選擇困難症。我自己覺得，畢竟用家係你自己，我唔可以話邊一種適合你就一定要用，始終每個人嘅生活情況唔同。不過無論係選擇邊一類型都好，千祈唔好選擇太過便宜或者來路不明嘅保護貼，例如在台灣夜市購買的便宜保護貼、或者香港鴨寮街平到你唔信嘅玻璃保護貼。因為這些來路不明嘅保護貼絕對唔單止唔能夠起到任何保護作用，更有機會因為保護貼成品質素參差，影響日常使用或之後更換。（因為始終是用膠水黏貼，大部份劣質保護貼有機會會殘留膠水在螢幕上面）

手提電話我個人是極度建議貼保護貼保護，不管是玻璃還是塑膠，有總比沒有好，畢竟現在維修電話的螢幕費用真的不便宜。至於平板電腦，我個人覺得可能一般嘅塑膠保護貼已經足夠，雖然安全性一定比玻璃保護貼差，但畢竟平板電腦面積比手提電話大，日常使用主要都是辦公室或者居家為主，會親吻大地嘅機會相對上會手提電話低，所以我個人覺得可能只係貼最普通嘅膠貼保護螢幕，避免螢幕刮花其實已經足夠。另外一樣現今大部份人都配備嘅智能手錶，其實保護貼我覺得反而比較需要，甚至乎比手提電話更加重要。因為螢幕相對上比較細，但是始終帶係手腕，日常生活會俾人撞到或者撞到其他物件機會一定比手提電話高，所以保護貼絕對能夠保護螢幕避免刮花。但是，例如 Apple Watch Series 7 系列，Samsung Galaxy 21 等等配備曲面螢幕的電子儀器，雖然都可以貼保護貼，但係相對上絕大部份保護貼都只可以保護正面，彎曲嘅地方難以保護。即使部份廠商已推出配合外型的保護貼，可以完全覆蓋，但始終礙於天生問題，所以即使貼上好快都會因為曲面而鬆脫，所以至今為止仍然未有一個合適的解決方法。如果只是貼在正面，千萬不要以為保護貼與曲面螢幕之間不會感受到空隙，那一條空隙絕對是會影響觸感的，所以面對曲面螢幕，選擇自己喜歡的方法就好了。

背貼

除了正面嘅保護貼之外，背貼亦都係有唔少人選擇。相比起螢幕保護貼五花八門嘅選擇，市場上絕大部份嘅背貼都只有塑膠選擇。不過相比之下，會貼背貼的人比較少，始終大部份人都覺得無需要，因為大部份人都會選擇用手機殼而不會裸機使用。

如果是決定不使用手機殼，直接接觸手提電話的背面，背貼當然啦是一個減少手指模的方法。而且近年手提電話背面用上古靈精怪的材質，越來越容易沾上手指紋，不使用手機殼嘅情況之下，好似美觀嘅方法只有背貼。

但如果是使用手機殼，其實我是絕對不建議貼背貼。應該調返轉咁講，除非你係一個成日會拆個手機殼出來清潔的人。如果唔係，背貼與手機殼之間的空隙會成為一部吸塵機。當你拆除手機殼嘅時候，你就會見到有一條由塵埃而成嘅道路，所以都咪話唔嘔心。而且另一方面，近年無線充電嘅普及，絕對都係一個問題。因為大部份廠商嘅測試都係沒有使用任何配置手機殼和背貼嘅情況下測試，當然是輕鬆面對各種挑戰。但回到消費者實際使用嘅場景，絕大部份人為了安全都會加裝手機殼，如果再加上背貼，使用無綫充電時或者手提電話核心高速運轉時的發熱量絕對是難以散開，長遠有機會對電池造成進一步損壞。

總結來講，背貼彷彿就變成了一項沒有用途的東西，除非你係裸機使用派，否則絕對唔建議貼背貼。

鏡頭保護貼

近幾年，相信大家購買新嘅手提電話都總會有一個滿意嘅地方，就係背後嘅鏡頭越來越突出，而且突出嘅程度就黎可以將手提電話變成搖搖板，所以鏡頭保護貼近幾年亦都算係一個新嘅副產品。

當然啦，唔理係Apple、Samsung定係其他牌子，如果相機模組有損壞或者碎裂，維修費絕對係天價。而且如果不幸嘅係你正在使用 iPhone 系列，相機模組碎裂，即使有購買AppleCare+，你仍然需要支付一定昂貴嘅維修金額，而且是整部手機更換而不是作出維修，所以可見相機模組的保護亦都算係一門高深嘅學問。

相比起螢幕保護貼，鏡頭保護貼能夠選擇就比較少，市場上普遍嘅就只有9H、藍寶石玻璃同抗耀光。相比起螢幕，相機我反而建議選擇9H、藍寶石這些比較抗刮花的保護。始終相機處於電話背後，容易俾鎖匙或者硬物過多嘅機會俾螢幕更加大，所以要盡可能減低刮花嘅機會。至於要揀成塊突出的相機模組覆蓋還是淨係鏡頭覆蓋，這一個問題就由客官自己思考，因為就同之前螢幕保護貼一樣，兩者價錢其實差唔多，你喜歡就可以了。

至於另外一個常見特點：抗耀光。首先說明一下什麼是耀光。耀光主要是指透過手提電話影出來的相片，在燈光附近會顯示一個圓圈的光環，這種就是耀光（都係果句，想知道更多嘅就自己問Google大神）會有呢個問題係因為手提電話嘅感光元件需要使用多重鏡片反射，相比相機鏡頭，手提電話的感光元件需要在一個緊湊嘅空間，所以經過多重的反射容易引起這個問題。本來不是太多人發現這個問題，但是自從 iPhone 11 之後，開始越來越多人發現這個問題，而且這個問題其實不只在 iPhone 出現，現今大部份嘅手提電話或多或少都會面對耀光這個問題，只是看廠商如何調教相機模組減低影響。即使現今科技進步，但是始終感光元件仍然壓縮在一個細小嘅空間，呢個問題相信短期內都難以解決。

但幸好耀光這個問題可以透過後天改變呢個問題，就係選擇抗耀光保護貼。不過又請容許我咁講，雖然耀光對於燈光嘅反射有一定程度嘅影響，但又會有幾多人直接用鏡頭拍攝燈光？所以雖然可以透過貼抗耀光鏡頭保護貼解決問題，但是相比之下，我個人覺得9H等等能夠抗刮的保護貼已經相對上足夠，畢竟耀光這一個問題在日常生活或者燈光充足嘅情況之下都不太會面對到。

手機殼

市場上手機殼嘅品牌琳琅滿目，由幾十蚊都幾千蚊都有，如果真係要界定什麼為之好用，其實真係無一個絕對嘅標準。如果你係一個小心使用嘅人，唔會將手提電話親吻大地，其實可能求其揀一個啱你心水嘅已經足夠。但如果你係一個粗心大意嘅人，有機會親吻大地，咁可能揀個好少少嘅防撞保護學會更加有用。

其實市場上嘅手機殼或者各種電子儀器嘅保護殼都係五花八門，但主要都離唔開美觀同防撞兩方面。不過遺憾嘅係，即使到咗今日，仍然無一款保護殼係可以達到100%完全保護電子儀器，所以其實最主要都係要自己小心使用。我又調返轉咁講，除非你係好虔誠嘅 Apple 信徒，如果唔係我完全唔建議購買 Apple 原廠嘅手機殼，寧願花多少少錢買坊間有名嘅防撞品牌，例如O牛盾，Kakifly等等。因為相比之下，Apple 手機殼保護性基本上比任何一個品牌更差，有嘅只係信仰嘅味道。而且即使係近年 Apple 最多人購買嘅透明保護膜，雖然可以在一定年限内抗變黃和自動修補細微裂紋，但一購買之前店員一定會同你講呢一款保護殼嘅保護性能極差，會唔會考慮購買第二款，可以見到 Apple 保護殼嘅保護性能其實真係好差。

另一樣要留意嘅就係近年無線充電技術嘅普及，導致好多廠商製造電話殼嘅時候都需要加入磁鐵功能。但係因為成本其實都算偏高，所以有部份廠商亦都會標明使用佢哋品牌嘅保護學之後有機會影響無線充電，甚至變得完全無法使用無線充電功能。以〇牛盾 iPhone 13 Pro 保護殼為例，雖然官方網站說對於 MagSafe 無線充電不會有太大的影響，只是會因為保護殼厚度而影響使用 MagSafe 磁吸的功力，例如錢包。但其實經過好多唔同嘅人實際測試，絕對係比使用 Apple 原裝保護殻或者唔用有一定程度的影響，所以針無兩頭利，如果想有比較好嘅保護，可能就要犧牲部份無線充電嘅功能；如果純粹只係美觀而唔需要考慮額外嘅保護，咁嘅情況之下你揀一個你自己喜歡嘅保護殼就已經足夠。

以平板電腦來講，近年來平板電腦性能已經可以媲美手提電腦，所以亦都有唔少人使用平板電腦取代手提電腦外出工作，亦都因為咁樣，為平板電腦而設的便攜式鍵盤和保護殻應運而生，最有名嘅應該都係 Logitech 同埋 Apple 原裝保護殼連鍵盤。如果你係一個商務人士，其實用呢一種保護殻絕對足夠你工作上嘅需要，既可以減少手提電腦嘅重量，又可以享受到鍵盤帶黎嘅方便；但如果你好似我咁，只係攞平版電腦做普通日常生活，其實普通一個保護殻已經足夠，當然啦為求方便，有唔少嘅保護殼亦都會自帶支架，方便追劇或者睇書，呢一種類型嘅保護殻價錢其實都同一般保護殻相差無幾，所以購買嘅時候可以不妨考慮呢一類型嘅保護殻，減少另外購買支架嘅支出。

其實就算係 Apple Watch，加唔加保護殻一直都係唔同人爭論嘅議題。以 Apple Watch 為例，如果你係買最平嘅鋁合金或者SE 版本，其實保護殼彷彿就比較多餘，因為算係一種比較平嘅入門選擇，你可能本身打算只係是用兩、三年便會換掉，而且只要有購買 AppleCare，就算有損失維修費用都好平，所以大部份人都未必會裝保護殼。但係如果你係買比較貴嘅不鏽鋼或者鈦金屬版本，雖然裝咗保護膜之後就睇唔出有咩分別，但係畢竟購買嘅時候價格比較高，如果有刮傷會更加心痛，所以即使係會變得唔好睇，但係我都係建議俾多少少錢買多個安心。當然啦，亦都有人覺得買咁貴嘅 Apple Watch就 係為了要更加好嘅防護，所以唔裝保護學，反而係平嘅版本要裝，因為想拖長使用期限，而且唔想外表有刮傷。即係其實唔同嘅諗法都有，只係在咁多種選擇入邊，首先當然係要睇自己錢包嘅厚度，其次就係總之記住，保護殻唔係100%萬能，自己小心使用先至係最重要。

至於另一個好多人都選擇困難症嘅就係：應該選擇軟殼定係硬殼？正如我一直都係度講，其實就無一個絕對嘅答案。軟殼就方便安裝，但係就缺乏保護性；硬殼就相反，雖然安裝有一定難道，但係大部份市場上能夠抵擋衝擊嘅手機殼大部份都係硬殼。或者應該咁講，正如安全套嘅道理，越軟嘅手機殼雖然唔會影響攞上手事嘅感覺，而且可以更加貼服手機嘅邊緣，而且更容易安裝；但係硬殼就基於天生特質，為了要保護／提供一定程度嘅防撞功能，往往需要比手機更大，而且攞上手嘅感覺係有好明顯嘅分別，而且因為係硬殼，安裝時需要花上一定氣力，但換來嘅係比較大嘅保護，所以睇你係想係美觀定係保護性作出最好嘅選擇。

包膜

相比起上面任何一樣，包膜呢一樣香港比較少聽到，台灣比較熱門。首先講講包膜嘅原理，就係在整個裝置嘅外圍包上一層薄薄嘅塑膠，而且可以揀選自己喜歡嘅花款，相比起上面任何一項，除咗可以有更加好嘅防水功能，更加可以比上面有更多唔同嘅花款選擇。不過相對上，因為難道比上述任何一項更高，而且必須在無塵環境才可以進行包膜，所以費用絕對比上述任何一項高。

其實包膜呢樣野我個人真心唔係好建議，雖然好美觀，但係正如背貼或者保護殼嘅道理，添加一層額外嘅塑膠雖然可以有更好嘅保護，而且比起貼保護貼，可以更加貼服整個外觀。但係始終是完全覆蓋，裝置發熱時的熱量或多或少會比其他方法更難以排出，所以其實亦都係有機會加速電池老化。加上長期熱量累積，有機會引起其他問題。

而且另一樣嘢比較小人講嘅係，包膜之後同部份保護殼或者會有衝突。呢一個衝突唔係一時三刻可以見到，而係當你多次安裝、卸下保護殻之後，因為保護殻嘅修邊如果做得唔好，絕對係會鎅開包膜；更換保護貼亦都會有類似嘅問題出現，所以即使係一個美觀嘅選擇，但係絕對係一個唔化算嘅選擇。如果選擇包膜，平均半年左右便需要重新包膜一次。

唔記得講，好多人選擇保護貼嘅時候都會忽略係全覆蓋還是半覆蓋。半覆蓋是指只會覆蓋顯示螢幕，旁邊會留有空隙；全覆蓋是指覆蓋整個螢幕，沒有多餘的空間。兩者都有人喜歡，全覆蓋因為可以完全覆蓋整個螢幕表面，保護性比較高，但是因為有部份製造保護殼嘅廠商是在沒有螢幕保護貼的情況之下設計，所以如果用全覆蓋嘅保護貼，有機會令到保護貼起泡。呢個情況電話上比較少出現，主要在 Apple Watch 上面會出現，但亦都有唔少人曾經反映，以前O牛盾任何一款保護殻對自家出品全覆蓋保護貼絕對無問題，但對於其他廠商嘅保護貼會有衝突，甚至乎安裝嘅時候會令到保護貼起泡。半覆蓋保護貼雖然可以避免上述情況出現，但是因為螢幕與邊框有一定距離，容易造成塵埃積聚，而且保護貼邊緣可能會因為長期收壓而裂開或者突起，需要定期更換。所以購買兩者之前最好先研究是不是可以順利合併，或者在同一個廠商購買保護殻和保護貼便是最完美的解決方法。至於應唔應該搵店家幫手貼，除非你係好好手勢，同埋張貼環境係一個比較少灰塵嘅地方，如果唔係我都建議佢搵專人幫你貼，始終店家一個月貼保護貼嘅數目可能已經係你一生人嘅總和（雖然我全家嘅螢幕保護貼都係我自己幫他們貼，不過係因為我全部保護貼都係上網買，焗住要自己學）

講到尾，唔同嘅人絕對有唔同嘅選擇，無一個確實嘅答案，選擇當然係任君選擇，百貨應百客。但係係做任何選擇之前，請記得一個最基本嘅原則：既然你都花錢買咁多唔同嘅電子儀器，就要好好利用，而唔係過分保護而犧牲絕大部份功能。例如你買了一隻不鏽鋼版本的Apple Watch，但如果你過分保護、過分小心使用，雖然你係可以好好保護，但係正如 Apple話齋，Apple Watch嘅目的係為了監察自己健康情況，如果你過分保護影響測量，咁有什麼作用？如果過分保護的話不如索性攞多少少錢黎買一隻勞〇士或者T〇G Heuer，然後放在家中欣賞，可能俾你購買 Apple Watch 過分保護更有實際作用。所以適當嘅保護係需要嘅，但千祈唔好過分保護，以避免影響使用。今日就講到呢度先，下星期六再見。