從而⋯危害國家安全

鲁迅在《而已集。小雜感》中一段，「一見短袖子，立刻想到白臂膊，立刻想到全裸體，立刻想到生殖器，立刻想到性交，立刻想到雜交，立刻想到私生子，中國人的想像惟在這一層能夠如此躍進」，批評中國人的對性的保守思想，一針見血。到今日，這種情況，未見得有大進步，反而有人在其他方面，以相同邏輯，更發揚光大，才使人大吃一驚。

Photo by Saad Chaudhry on Unsplash

保安局長不時評論案件，其實是相當不妥，尤其是案件未開審，而且公安仍然在尋找資料和證據，或一般說仍在調查中，通常官方一定以「案件已進入司法程序，不便評論」為由，拒絕媒體任何問題，及進一步解釋。但現在，反而會主動解讀，甚至跳到判案，只係差在未有大叫一聲「罪名成立」！大人，你哋重查緊案喎，未有確鑿證據，況且公安同官員頂多係查案，搜集證據，唔可以未審先判，判決係法官嘅權利，佢地係睇唒雙方嘅證據，證人嘅供詞，以事實作出判決。未有判決之前，响公開場合，响媒體面前作出個人評論，一面倒講不利疑犯的說話，這叫做「妨礙司法公正」，是犯法的。

而今次，長官向公眾講述响監獄嘅情況，「好多人就係透過可以運一啲咁嘅嘢入去（註：他特別強調髮夾和朱古力），收取呢啲嘢，從而喺呢啲物品變為一個特權，喺入面招攬追隨者，從而利用佢呢啲特權成立影響力，令監獄入面嘅人受到影響，從而更加憎恨政府，憎恨香港政府，同埋可能憎恨中央政府，從而危害國家安全。」他的邏輯大家跟得到嗎？

如果將之寫成魯迅的格式，就會變成：「有啲人見到一個髮夾，一粒朱古力，立刻想到特權，立刻想到影響力，立刻想到憎恨香港政府，立刻想到憎恨中央政府，立刻想到危害國家安全！真的是想像大躍進。」如果原來魯迅的文字令大家會心微笑，或者恥笑，那上面這幾句模仿造句，大家一定笑唔出！一個髮夾或一粒朱古力，就會危害國家安全，你話重有乜嘢唔會？

監獄嘅嘢，我哋識條鐵咩，不過，香港一直好多電影有講監獄，例如發哥主演嘅《監獄風雲》，應該好多人睇過。印象中，監獄中的確有特權人士，有啲有江湖地位嘅，重可以收靚，聯群結黨，還有派別之爭。監獄唔可以有錢銀在身，但代幣當然有，最多人知道咪煙仔囉，越多就越有權力影響力，真係可以買起人。呢啲嘢，由來已久，獄卒亦知情，大家都隻眼開隻眼閉，又唔話佢地危害國家安全嘅？

至於運嘢入監獄，呢兩年我哋都多咗認識，例如有錢可以安排私飯，而小食類又有嚴格包裝和量的限制。之前一款朱古力轉咗包裝，監獄處未有update，新包裝不能通過，有關機構唯有向市民廣傳，發散人在市面上尋找舊包裝。因此，運物品進監獄是合法，而且監管甚嚴，那有何問題？而且法律在官方，隨時改例，甚至完全禁絕都重得，何必講到咁大？唔通對手真係咁神通廣大？咁算唔算長他人志氣滅自己威風呀？而如果問題真係咁嚴重，點解淨係出噏幾句，唔提供解決方案呢？

不過，最離譜嘅，重係你講緊响監獄入面嘅人，有啲比你無端端判一年半載，有啲未審但先坐，因為拘留所人滿之患，直接改送監獄等開庭。然後你話呢班人响監獄入面，都憑一粒朱古力去危害國家安全？你冇嘢呀嘛？响入面好似連同另一位囚友講多句都唔可以喎！而且佢哋因為危害國家安全而被收監，但竟然都重阻止唔到佢哋繼續，咁攪咁多嘢做乜？你重喺不停咁拘捕，將佢哋一個一個放入監倉，令佢哋响裏面日漸壯大，一樣都係度危害國家安全。唔講重以為你係同黨卧底，而家講出嚟，理應自覺羞家慚愧，點知佢重口沫橫飛，淨係識賴人。講兩句嘢都暴露哂自己嘅不濟，真係自暴其短呀！

香港咁危險，都係返大灣區啦。