公映前 記錄心情

由上年11月14號為香港亞洲電影節閉幕開始計，經歷排期2月10號上畫不過撞正政府封戲院，等待差不多9個月，海外影展亦去過，終於可以公映，好多當初有idea不過未有時間實踐之宣傳計劃，包括音樂會，包括NFT，最後一一都做到，電影宣傳面之廣闊，優先場反應之正面，都比我之前兩部戲好得多，我亦真心想講兩句：

多謝所有幫手朋友，我自問已經盡力。

一向都覺得，點先算盡力呢？幾時都可以再盡力，飯食快少少，厠所去快少少，就自然更多時間工作，盡力其實從來不設盡頭。

不過，今次，我自問已經盡力：

其實點樣捱過6月7月過去兩個月？我都好難解釋，只覺得每日都在開盡supercharger以至turbocharger（汽車專用名詞，我當初17歲入傳媒，第一份暑期工做汽車月刊），人都好似長期處於300%甚至500%運轉之中，每日都有5至7個鐘用手機覆whatsapp，唯有拍攝新戲幾日除外。

拍攝幾日新戲。

你並非聽錯，我已經拍完新一部電影，正正因為同一時間，一邊宣傳第三部電影，而宣傳戰線又拉到前所未有地闊，另一邊竟然籌備兼開拍第四部電影，嘗試過就知道錯，結果兩邊都未能夠做到最好。

如無意外，我以後都會拒絕在宣傳上一部電影期間，開拍下一部電影。幸好我第四部電影只需要拍7日（連超時就拍足10組，就計一組12個鐘頭啦），比第三部電影要拍12日，更進一步。

好，幾個鐘頭之後，我第三部電影《緣路山旮旯》就會正式公映。最後結果如何，已經超乎我能力範圍，就交到命運手上。先睡了。

賣賣廣告，網上訂票：bit.ly/香港真係好靚

斷斷續續寫在2022年8月2號至3號之間