動畫大師森本晃司＠DigiCon6 大師分享會（腦殘記錄）
當初聽到今屆請到森本晃司嚟香港做嘉賓，我只有一個顏文字表情 ( ﾟдﾟ)ﾊｯ!
我：唔＿係呀？咁堅？
搞手：（=請佢嚟嗰個）我都唔信。
搞手（=我舊舊舊舊舊老闆）今年第3次搵我去做現場傳譯。難得我唔帶腦番工，你仲會叫我嚟…
邊個係森本晃司？
動畫迷應該認識森本晃司，佢係80年代日本動畫大混戰期間堀起嘅動畫師，當主流仲係用緊菲林拍動畫，佢已經帶頭做CG動畫， 絕對係我成長年代嘅動畫師先鋒。
未聽過佢個名，都應該睇過佢嘅作品：《伙頭智多星》（原畫師之一）、《城市獵人第３季》（原畫師之一）、《超時空要塞PLUS》（原畫師之一）、《青之6號》（原畫師之一）、《魔女宅急便》（原畫師之一）、《亞基拉》（副作畫監督，當年佢28歲）、《惡童》（荷里活3D版導演）、《廿二世紀殺人網絡動畫外傳》（ 短篇作品《異度空間》 導演・編劇・人物設定）……，求其一套作品都係經典，自己睇WIKI把啦。
盧子英x森本晃司訪談（腦殘紀錄）
原諒我腦容量得128MB，記唔晒咁多內容，以下係我喺活動完咗之後即時用手機寫低，冇咩邏輯次序可言。[*註1]
（我做即時傳譯嘅時候，腦能量極度集中，簡單講係用個腦殘狀態自然聽、自然噏，係唔經大腦。通常完咗一場傳譯，我有9成都唔記得自己講咗咩。[*注2]）
真★腦殘紀錄：（記得嘅情況如下）
★森本晃司細細個睇過中國動畫《牧笛》而深受影響（<估佢唔到！大家快啲搵嚟睇！）
森：細細個偶然喺電視睇到…當年冇ART FILM之類大型活動，真係咁啱得咁橋睇到有套咁嘅作品。
★受影響作品：1968年《太陽王子（太陽の王子 ホルスの大冒険）》電影版 （亞視譯名，1978年香港播放）、出崎銃監督《小老鼠歷險記（ガンバの冒険）》（TVB譯名，1979年香港播放）等。
森：《小老鼠歷險記》以可愛嘅老鼠造型做動畫（對耳仔超大，大過米奇），但係內容又黑暗又諷刺又現實，令我當時有好大衝擊：原來動畫都唔一定係小朋友睇嗰種，係可以有呢種黑暗面，可以咁樣表達。（大家自己SEARCH）
★鍾意睇黑白片，覺得黑白片嘅表達手法獨特，尤其歐洲黑白片好正。希治閣is a Must。
森：舉個例，設定係「有賊由屋頂入屋」。原本賊人應該隱藏自己，但係喺黑白電影，好明顯會俾觀眾見到個賊嘅動靜，為咗令觀眾明白，而故意去打破「原本應該」嘅常識。
★迷上寺山修司作品同演出。
（唔認識寺山修司嘅朋友，快啲上網搵嚟睇！超！衝！擊！）
森：有人問寺山修司嘅職業係咩，佢通常都一句霸氣回應：「職業係寺山修司」，大型棍了！
森：寺山修司嘅劇場好正，你喺觀眾席以為睇緊演出，突然台上嘅人拎住支咪落台問你「 覺得點呀？」；你以為台上個熒幕播緊正片，原來觀眾席後方有演員走出嚟。呢啲打破既定框框嘅演出，令我初次感到原來創作可以咁新，原來可以行到咁前、玩到咁盡。
https://www.facebook.com/watch/?v=10156185619193535
2018年富士菲林向寺山修司致敬廣告。
盧：補充番少少，我有啲幸運，喺80年代香港啲電影節，有請過寺山修司到香港，我有機會睇到。就喺大會堂之類嘅劇場玩番以上嘅一套劇場把戲。喺個熒幕背後有人掉橙落觀眾席、又有裸男跑出嚟，係好過癮。
森：冇錯，佢啲嘢就係咁癲！
★上堂唔讀書，淨係畫嘢。
森本晃司喺小學已經鍾意喺厚到爆嘅國語教科書上面畫啪啦啪啦漫畫（即是喺每頁角落，畫公仔變成連環動作嗰種）。總之書唔聽，上堂只畫畫，被父母叫佢「讀多啲書啦衰仔，畫咩畫」，長大後入行，父母又叫佢「畫多啲畫啦衰仔」。（全場爆笑）
森：我上堂真係唔聽書，老師叫我做咩我都唔聽。（向觀眾，大部份係學生）大家都係呀，唔好聽晒老師講，要有自己嘅堅持！（全場爆笑）
★高中畢業後，偶然見到吉卜力請人，就去應徵，結果衰咗。
後來佢睇《小老鼠歷險記》中晒毒，就走咗去幫出崎銃開工。
補充：後話係，拍《魔女宅急便》嘅時候，森本晃司有去吉卜力幫拖，兜咗成個圈，始終都係要同吉卜力有啲關係…
★盧：80年代咁多動畫製作公司有勁嘅製作，當時你係積極表現自己，定係接受任務默默做嘢？
森：我會舉手主動嗌做，當時不知哪來的勇氣，唔知係咪自信呢？亦都可能係死𡃁仔唔識世界，9衝咗先算。當時覺得唔做唔知咩事，總之試囉！當時（80年代）畫機械人動畫就會成功，我都覺得總之畫機械人一定冇死，一定掂！
★盧：你經常同好多動畫師合作做動畫品，《機械人嘉年華》、《廿二世紀殺人網絡動畫外傳》，仲有近期成立「p h y」，同人合作嗰陣係點㗎呢？
森：我從來都唔去睇其他人嘅作品。我對其他人畫嘅嘢冇興趣！（全場爆笑）萬一睇完，覺得人哋畫得好過自己點算？好飲恨㗎喎，我份人好小器。（笑）總之要愛上自己嘅作品，覺得自己畫嘅係最好，唔愛點畫呀。
［至理名言。］
★盧：同咁多人合作，會唔會有咩爭拗？
森：基本上我唔理人嘅（笑）。一套製作實有好多聲音，格格都停落嚟，大家傾完一輪再做，咪玩啦。
中途休息＋欣賞DigiCon 6 2018年度得獎作品：
《不忠之愛》麥少峯
睇完片，自然要叫導演麥少峯上台。
★盧：睇完香港得獎動畫，有咩感想？
森：嘩…勁，我學生嗰陣都冇咁勁，而家啲學生真係勁
麥：…我唔係學生。（一臉馬明式天然呆）
（全場爆笑）
★現實問題。
麥：想問問日本畢業後做動畫人工幾錢？
森：好低咋喎。應該同以前手塚治虫大師老祖宗設定嘅金額差唔多。咁當然你手畫勁嘅話就會加人工啦。大家入行都係為愛，反正入咗行都冇時間駛錢（呢句真！）。講真真係好辛苦㗎，任何一行由低做起，梗㗎啦。我以前都試過畫足成晚，攰到成個頭向前𢰦咗落玻璃枱，然後頸梗咗郁唔到，到第二日班STAFF入嚟先見到我咁嘅死樣…呀，對唔住，我一輪嘴係咁講㖭。
我：（向麥）答唔答到你嘅問題？
麥：（默默點頭）答到。
★森本晃司點睇現時日本動畫？
盧：日本動畫仲係龍頭，你點睇而家嘅日本動畫？
森：日本有各種獨特文化，例如偶像文化等等，我個人好難評論，我淨係想畫科幻，只係做自己想做嘅事就ＯＫ。
（我聽得明！潛台詞：我冇睇日本動畫好耐喇。）
★同香港人合作？
盧：在座有咁多香港動畫新力軍，有冇興趣合作？
森：好喎。其實日本動畫界長期唔夠人用，而家多咗好多渠道，又多電視動畫、劇場版，又有NETFLIX，製作嘅數量有增冇減，但係人手冇多到，所以我都成日同外國人合作。
（我又聽得明！潛台詞：「你哋平靚正得過日本仔就OK」）
（現場Ｑ＆Ａ環節）
<1>
Ｑ：頭先喺灣仔，你答咗我一個問題，你話做創作唔可以怕醜，唔好怕俾人話黑暗同變態，可唔可以講多啲？
森：（諗咗好耐）
森：（諗完）舉個例，100個入面有99個人SAY YES，有1個人SAY NO，我會好在意嗰1個人嘅諗法，一定會有啲特別嘅嘢。團體生活一開始都可能會埋吓堆，但係唔好怕俾人排擠、冇人附和，要承認人性一定有扭曲嘅一面。答唔答到你嘅問題？
（潛台詞：我講緊乜９嘢…）
Ｑ：明！
（我：咦…我都唔明自己譯緊咩…）
<2>
Ｑ：老師咁多作品，最鍾意邊套？
森：我對自己以前啲作品冇興趣！（笑）當然嗰一刻係覺得「呢套係我最佳作品，正爆」，但係之後就會愛上下套作品。唔好留喺以前原地踏步，咁好難突破。
（我又聽得明！潛台詞：我最愛自己下一套作品。唔好食老本呀年輕人。）
<3>提到技術性問題
★森本晃司認為，日本動畫其中一個特點，係每秒畫嘅張數較少（多謝手塚治虫大神。唔明白嘅朋友可以去睇吓手塚治虫動畫原理），但表達力極高。而家嘅日本動畫，彷彿冇咗呢種韻味，而係追求每秒都極細緻去塞爆個畫面。
Ｑ：可唔可以再講清楚少少？
有人問到這種技術性，森本老師再補充：
森：我唔覺得一秒有好多張film就叫勁，係表達力嘅問題。例如《雷鳥拯救隊》，角色唔靚仔，又硬綁綁，但係個畫面CLOSE UP，會令你覺得有更深的層次，想去了解。講講吓搞到我好似喺到勁SELL，叫大家去睇《雷鳥拯救隊》咁。
（我明！潛台詞：任你個畫面玩到天花龍鳳曉飛，冇內涵吖嘛）
活動感想：
開始前，我客氣咁同老師講：「請手下留情」，始終兩年前瀨過川村元氣老師嘅高難度挑戰，好大陰影㗎。果然，森本晃司的確有手下留情，又好在有盧子英盧SIR喺度補刀，總算安全渡過。（搞手話，冇盧SIR就唔敢請森本晃司嚟香港，多謝盧SIR）
事後森本晃司老師趁煙Break同我講：「唔好意思，頭先講到咁無聊，未係狀態」。我明，你未飲酒吖嘛。
對我嚟講，可以為森本晃司做傳譯係無上光榮。
森本晃司有份掂過吓嘅《惡童》（荷里活版）就係我出道（？）以嚟，第一套負責翻譯、廣東話對白嘅電影作品。
當年我唔識數口（而家都數得好差），個導配一路打電話嚟小我一路開工，因為太震驚，令我的起心肝好好學數口。
《惡童》粵語配音版真係神作，我份稿啲對白完全唔啱口（雖然意思食到應晒。呢套嘢對白用廣東話寫特別爽），但係導配都可以導得咁好，可惜呢位神級導配已經不在人世。最近粵語配音版DVD重出，都係賣HK$29，抵俾啦。嫌隻碟阻住，可以去B站搵吓。
森本晃司講嘅說話可能唔係個個啱聽，但係，喺佢成長嘅年代，的確係一個只要努力就會有回報嘅年代。
今年森本晃司59歲，用畫板畫CG，用PAINT軟件作畫，一個人可以畫出世界。
咩係DigiCon6？
「 DigiCon6 Asia大賞」呢個活動，由日本TBS主辦，主要推動世界各地數碼動畫。香港地區由香港數碼娯樂協會（HKDEA）做搞手。
冇錯呀，即係嗰啲Ｒ咗政府Funding，令一班好有熱誠嘅香港動畫人燃燒生命狂做動畫，完成之後政府又唔包宣傳，又唔知條片點樣賺錢，做完冇人知…嘅政府賛助活動。
香港真係有好多有才華嘅癡線佬，有錢唔搵瞓晒身去做動畫。至少呢個活動俾咗個機會佢哋揮灑青春，做過先至唔會後悔。
今年11月嘅活動，香港係主場，真係有今生冇來世。
官方網站：（去睇吓歷屆嘅得獎作品，就知香港咁多年嚟有咩動畫創作）
可惜舊錢同限定完成時間遠遠唔夠製作一條完整水準嘅動畫，政府應該再鬆手啲…算啦，我冇補充喇。
- 註1：我即時傳譯嘅時候一向唔用紙筆drop notes，即係咁，用手寫得嚟，我把口講咗出嚟了。靠嘅係瞬間記憶。
- 註2：話時話，呢種一秒即忘能力係咪好啱做間諜？（FF啦你！）
- 註3：有人話岡田斗司夫今時今日仲出嚟講佢上幾代嘅宅理論係OUT-DATE，但係7、80年代，佢的確係第一個大大聲話自己宅嘅真男人。以宅神理論，以前嘅宅唔係淨係識做毒撚，而係因為太專注喺一個範疇（甚至成為專家）而失去一般社會性。我讀Ｕ嗰陣９吹嘅畢業論文都係睇完佢本《オタク論》左抄右抄PASS。