大拿移 - 中秋節

雖然寫完呢篇嘅時候應該已經過咗農曆八月十五，不過都先同大家講返句中秋節快樂啦！

今次唔係我第一次喺非出生地過中秋（後生啲嗰陣畀公司派駐過外地），但係應該係第一次完全無月餅過中秋。唔係因為大國無得買或者貴唔捨得買（不過又真係有啲貴），只係懶得去大中超揾蒞買，而且聽聞都係要買返啲放棄咗一兩代年輕人嘅牌子……咁算啦。

雖則無得食月餅，但係我哋今朝有得玩月餅。好幾個月前買咗嘅一副桌遊《月餅達人》無入到船運箱，特登擺落隨身行李等今日開箱。簡簡單單嘅一副應節桌遊，難得我家妹妹鍾意玩。

今晚我哋買咗Krispy Kreme嘅冬甩去大草地參加香港人中秋聚會。以前食過Krispy Kreme嘅冬甩一次咁大把，係當年Krispy Kreme撤離香港前喺最後一間喺機場嘅分店買嘅，可以算係一試難忘。大國超市都有冬甩買，亦算好食但係口感始終差啲。今晚當係過節豪少少就買Krispy Kreme食喇，小朋友食得好開心。其實冬甩又係圓嘅又係甜食，都好應節㗎！

大國宜家過咗19點半個天仲未黑齊，未係太啱玩燈籠。不過一入黑加埋草地空曠濕氣重，好快就幾寒下，所以燈籠都唔玩得太耐。等埋月出，睇咗陣就返歸喇。

外國嘅月亮係咪圓啲大啲？圓就肯定一樣咁圓，但係我覺得細啲。呢邊無咁多高樓大廈，個天濶好多，相比之下我覺得月亮反而係細咗，哈哈。