五年來，我們找到屬於自己的【真物】嗎？

隨着不起眼女主角培育法（下稱：路人女主）劇場版BD販賣消息公布，亦都標誌着呢一套陪伴咗好多人成長嘅作品正式落幕。雖然原作者唔否定有大學篇嘅可能，不過大家都知機會真係微乎其微。

我今日要講嘅唔係路人女主，而係要講另外一套我印象中更加深刻嘅作品，就係：果然我的青春戀愛喜劇搞錯了（下稱：果戀）。我記得以前睇嗰陣只係中三定中四左右，成日覺得呢套唔好睇，所以嗰陣時睇完其實真係無乜印象，我好記得果時係喺 Animax 睇，之後網絡開始發達先開始上網追番；如是者就算去到第二季，我每集都係好快睇完，不停飛過嚟睇就算，因為嗰陣時成個故事對我來講實在太高深。當時作為一個中學生嘅我，嗰陣時其實真係一啲都睇唔明，嗰陣時嘅我絕對覺得呢一套係一套狗屎垃圾都不如嘅動漫。

跟住過咗幾年，我完全係忽略咗呢套。直至到上次去完沖繩旅行睇完路人女主劇場版之後。正當我睇完路人女主劇場版，跟住同行朋友講到幾好睇之際，我先突然醒起我原來我完全唔記得咗呢套。可能對佢嚟講路人女主係陪佢長大嘅小説，但果戀對我嚟講先至係陪我長大嘅小說。你可能會問，明明我上面都話我唔記得咗呢套，咁又點會陪你長大？咁樣咪即係自打嘴巴？係，無錯，雖然之前間唔中都係Facebook 都會見到果戀嘅介紹，當中最多嘅就梗係拖稿啦（最尾三本書拖咗幾耐先出大家應該都記得好清楚），但係無獨有偶，自從出嚟做嘢之後，我第一份人工就係拎咗去買果戀第一本輕小說（嗰陣明明知道自己唔會有時間拆嚟睇），但係之後得閒我都會慢慢慢慢咁樣買返齊晒十三本，唔知點解每次行過書店，總係有種魔力吸引我想去買返齊一套（雖然買咗返嚟擺咗好耐，都係最近先至有時間拆包裝開始睇）（謎之音：一路打我都覺得我自己真係一個怪人o(^▽^)o）

隨着2019年年尾第三季製作決定消息推出同埋第十四卷小說推出嘅時候，講真嗰陣時我係無時間去重溫呢一套。直到近期因為有機會嘗試在家工作，所以就變咗有好多空閒時間重溫動畫第一二季同埋補返小說。

距離上一集果戀已經過咗1748日，不如我哋回想返兩季動畫講過乜先。（以下為節錄）第一季主要係講大老師入咗侍奉部之後，結衣跟住都入埋部，再出場嘅就係有戶塚，大約就係呢啲人物。過多幾集，大老師同結衣嘅誤會就解開（唔記得就自己睇返原作），繼續落去就係捲入學院祭同運動會嘅侍奉部。大約咁樣就完咗第一季；第二季一開頭就講修學旅行，之後就講如何阻止雪乃做學生會會長同聯校聖誕舞會。最後第二季第十三集，留低咗兩個疑問：究竟大老師追求嘅真物係咩？同埋雪乃最後嘅委托係咩？

五年過去，相信當初追果戀嘅人好多都已經出嚟社會做社畜，甚至乎可能已經有人已經有家庭。當初我記得我完全放棄呢套都係因為大老師講嘅嘢實在太深奧，俗啲咁講大老師已經看破紅塵，但嗰陣時嘅我完全無辦法代入去，直頭連佢講乜我都完全唔明白，（可能就係呢個原因間接搞到我開始要追萌系日常番安撫我日後生活煩惱嘅心靈？）但係自從出咗嚟做嘢之後，當我再次有機會睇返轉頭，我就明白大老師佢嘅每一個心情。可能對好多人來講，睇一套作品又何必代入感情？雖然我都係，但係有陣時覺得唔代入就唔會明白佢當中嘅意義。

如果話不起眼係白色相簿三，呢套絕對係白色相簿四。其實兩季動畫入面，第二季第八集大老師同平塚靜嗰段對話真係講得好好：如果感情可以電腦化計算嘅話，咁一早就已經電腦化咗啦。無法通過計算得出嘅答案，就係人嘅情緒。就算嗰陣時讀書好或者依家出嚟做嘢都好，我都係選擇同大老師一樣都係自己一個人去面對或者解決每一個問題，因為覺得咁樣係最好。感情一定唔止係指男女之間嘅愛情故事，亦都可以係自己朋友或者同事。回顧返我嘅中學生活，我都係自己一個人，同大老師一樣（謎之音：點解我中學無侍奉部，如果有我一定第一個加入Www）。人係會長大，性格亦都會隨着環境改變。正如第十二卷小說入邊亦都有一部份我覺得講得好好，就係陽乃對住大老師講：其實你同雪乃只係對方某種扭曲嘅倚賴嚟到生存，大家內心深處都好享受依賴對方果種滿足感，但總有一日呢個倚賴關係會結束（大約意思，因為我係睇日文版）。正如第二季動畫下半部份講聯校聖誕舞會，兩間學校嘅人倚賴對方，如果出現問題，就可以輕鬆推卸責任唔使自己負責。呢樣野正正就係依家嘅社會成日出現嘅問題，幫一班人太依賴另外一班人嘅時候，出現問題除咗推卸責任之外，就咁。冇人諗住去解決個問題，但係出事嘅時候，唔係應該首先要諗咗解決問題嘅方法，然後先再追究？如果唔係又點可以及時糾正錯誤？

如果不起眼係講同人社團活動，咁樣果戀就係講一個人嘅成長，會因為自己性格而同朋友有分歧。因誤會而結合，因了解而分開。其實有陣時睇返轉頭，發現大老師講嘅嘢其實都幾中二病，不過調返轉咁講，與其話中二病，不如話究竟渡航係用咩心態去寫呢一本小說，因為入邊有好多唔係人會諗到或者講嘅說話，例如大老師一開始所講：《野生動物的生態》同埋《回顧高中生活》。雖然結局都米已成炊，但依家睇返轉頭，發現人係會長大。五年前我因為一句都睇唔明所以放棄，五年後今日，回想返我長大嘅經歷，發現如果大老師講嘅嘢我早啲睇得透嘅話，我諗我而家做人會截然不同。正如我之前咁講，人係會長大，由小說第一本睇返轉頭，其實大家應該會隱約見到大老師同雪乃佢兩個都係有成長緊。去到最後，大老師嗰種成長，其實同我地成長嘅經歷都係差唔多。雖然往事只能回味，但回味過後我哋仍然需要繼續向前行，人係會長大，但係無一個絕對嘅教科書可以教導或者指引，一定要親身經歷完先至知道。雖然果戀彷彿好似好深奧，但係對我黎講就留下咗好深刻嘅印象，絕對係我成長中留下咗一個烙印，或者呢啲就係我成長中嘅遺憾？每個人都努力尋找自己在世生存的＂真物＂，但是不是每個人都會成功找到？例如22/7中西条和，為咗擺脫現狀而參加選拔，每個人成長都係唔同，或者答えはいつも私の胸に，但都係要願意踏出第一步去尋找屬於自己的＂真物＂，雖然未必每個人都想係世界留下足跡，或者每個人尋找屬於自己的＂真物＂途中都會有不同經歴，但希望可以係自己人生中留下屬於自己的足跡，尋找屬於自己的人生。

最後最後，希望大家可以按五下拍手，作為支持我創作的原動力（土下座

P.S. 今日係小弟生日，希望可以乞句 お誕生日おめでとう~