從公務員旅行福利睇離地公僕心態
(本文以香港粵文創作)
當政府喺財政預算案同你講因為財赤而要緊縮開支,「失業咩?借錢囉~~」嘅時候,另一邊廂政府自己就大幅增加「長期優良服務公費旅行獎勵計劃」嘅開支。老實講,唔係本土研究社我都唔知。根據本土研究社嘅分析 [1],計埋高級公務員嘅「度假旅費」津貼(每人每年七萬幾呀!),計落成四億公帑就畀咗預計嘅二千幾個公務員。唔好忘記,公務員————係包括警察!如果你喺一個做咗廿年就嚟退休嘅「老差骨」,分分鐘今年除咗份「個人薪酬津貼」果三萬幾以外,仲有機會囉多五萬幾蚊同「另一半」[2] 一齊去旅行,歐洲、非洲、南半球,任君選擇。
講開「長期優良服務公費旅行獎勵計劃」,有名你叫「長期優良服務」,計劃要求嘅條件在服務水平之前,當然就喺年資。連續服務超過廿年或以上兼無享用過嘅人先有資格,每年合資格嘅公務員有廿七份之一機會中獎,咁當然今年唔中就明年再嚟過,愈臨近退休年就愈大機會中獎(因為要俾你退休前 cap 埋呢份福利)。講起上嚟,我家中有長輩就曾經喺前朝時期(英治時代)中過呢個福利。
![](https://assets.matters.news/embed/4ff9c344-fe3b-46ea-a69d-e1fef472bfea.jpeg)
當時嘅競爭相比而家大好多,一來正值嬰兒潮時期嘅人退休之始,再遇上移民潮,退休、提早退休者眾,再加上過去嘅分配額唔係而家嘅廿七份之一,而係三十三份之一嘅機會,各個因素加起上嚟,真係唔知幾時先中獎。所以當年果位長輩中獎果時都好比中六合彩咁開心。當年嘅資助額,只有六千五左右(伴侶另計,金額一樣),再加上當年去旅行嘅價錢貴過今時今日唔少,可以選擇嘅地方真係唔多,結果果位長輩兩公婆就揀咗當年最大路嘅「星馬泰」之旅。
對比翻今時今日,每人有兩萬六,比當年多三倍有突,但係睇翻綜合消費物價指數升幅只係164% [3],再加上近年機票、酒店等旅行成本較當年低得多,可以去嘅地點已唔再限於東南亞,一人兩萬幾,去歐洲、日本玩十零日,「皇帝」享受都足夠囉。仲未計而家得到公費旅行福利嘅機會多過當年好多,分配比例低咗(三十三份之一 VS 廿七份之一),仲要部分公務員無份(新世代公務員約「度縮」問題),基數少咗自然競爭低好多,隨時合資格當年就中獎。可以話今時今日 claim 福利去旅行爽太多。唔好忘記,未計薪金差別同其他福利㗎!
又難怪而家政府中人唔明民間疾苦,當市民仲諗緊點生活之時,佢哋班公務員已經諗緊幾時有得去旅行,佢無同你講「何不食肉糜」已經好比面你班蟻民啦~~
[1] https://www.facebook.com/localresearch/posts/3859350007494377
[2] 以前會要求一定係伴侶先有得 claim 埋一份,2018/19年度開始放寬至同行嘅人就得,人數同樣只限一人。
[3] 1989年綜合消費物價為42.2點,2021年1月升至111.7點。
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!
![](https://imagedelivery.net/kDRCweMmqLnTPNlbum-pYA/prod/avatar/2e89f901-393e-4709-a19c-56f66f013244.png/public)
![logbook icon](https://assets-next.mattersprotocol.io/_next/static/media/logbook.2cfac4f7.gif)
- 来自作者
- 相关推荐