2020 睇《十年》- 為時「永遠」未晚，有排我都未死

我同《十年》呢套戲既緣份好奇妙，隻碟我一早就買左，但係我從來冇試過係屋企自己完整甘睇一次。我第一次睇係2015年社區放映既時候，係上水街頭同一班唔識既人睇。而今次，我就因緣際會同一班志同道合既朋友睇。

《十年》既內容，事隔五年再睇，又有一啲新既體會。一如所料，呢五年，香港既民主自由，已經變得好似比人揸住條喉嚨甘，已經去到存亡之秋。而「真香港人」，透過新移民同教育，已經比人不斷洗牌，成為「安安佳佳」。

不過，我再一次睇完《十年》，反而覺得好開心。開心既係，比起戲裡面既情況，香港無甘差，反而真係全民覺醒左。先唔好講黃定藍，我敢講乜師物師，碼頭咕哩，都已經對政治對民生有自己既睇法。同時間，因為全民覺醒，同全世界既關注，大陸都未敢夾硬黎推廿三條。

至於之前睇完，搞到我成頭黑人問號既〈冬蟬〉，今次再睇，又有一番完全唔同既感受。

夏蟬不可語冰。就算讓你在冬天見到蟬，也不過是一隻已死的蟬，一個標本，沒有靈魂。這個故事，重點不在於其畫面，反之在其帶出的訊息。面對不斷被殺絕，不斷失去的一些過去，究竟我們要不要堅守到最後。甚至擇善固執，蹤然知道如此下去必定滅亡，依然堅守心中的價值和信仰。

這一次，我看到的倒不是失落。反之，無論勇武、和理非，甚至是淺藍，或更甚深藍的香港人，也可以一起去守護我們的香港，而不是立心把自己看成是一隻「冬蟬」。

回想180年前，香港從一個小漁港，化身成「東方之珠」，甚至不下於上海東京漢城等大城市，成為全球三大國際都會「紐倫港」之一，我們有著一段光輝歲月。華洋夾雜，全球都透過香港人作為橋樑，透過香港這窗口看內地，靠的究竟是甚麼？

身為大陸的窗口，我們從來普通話也很爛，也分不清它和國語的用詞分野。作為世界的橋樑，香港人的英文就是勝在有一份「講句早晨都已經知你香港黎」的味道，沒有很正宗的甚麼英式美式。可是，全世界都很喜歡香港，都很喜歡透過我們做生意。說到底，也不過因為香港人的變通和適應力。

請一個香港人做𡃁，好簡單，唔使教佢點做，又唔好問佢點做。總之你俾個Deadline佢，佢中間係Office又好，茶記都好，佢夠鐘之前（但又唔會太早！）一定會放低份野係你枱面。如果你接受唔到，老實講，你請個坡仔好過。不過，到時你唔好話佢問番你轉頭，差不多要同你討論原則哲理甘樣。

唔知由幾時開始，我地突然間睇唔起自己，走去學呢樣學個樣，搞到人唔似人鬼唔似鬼，甚至係屋企都要個細路同你講英文。有時係街，我真係想忍唔住走過去人講，算吧啦你啲英文完全唔得架喎，無謂害個仔啦！

其實，究竟有幾多人以自己身為香港人，口講廣東話為榮架？香港華洋夾雜，造就我地既變通同適應力，亦即係「世界仔」既文化。例如你見到一隻雞，可能你會叫佢做雞，又可能會叫佢「咯咯」。甚至乎我同你講雞，你個心入面又會諗我講呢啲雞定個啲雞。

你以為甘樣好醒呀？唔係架。不過我想話呢個世界有好多人，係完全追唔到你個變化同轉數，就算你已經覺得你係呢班人裡面最「笨實」個個。

這就是香港，不斷變化的香港。只有土生土長，久經考驗的香港人，才不會給這事情弄得頭昏腦脹，才能把這文章繼續讀下去。這不單單是語言的問題，也有很多的因素和環境的醞釀。也只有這種土壤下，才可以孕育這樣子的「真香港人」出來。

當然，你可以說，香港人的語文習慣從來都不正宗。不過，正宗不正宗，又有所謂嗎？我天天給你全世界「Add Oil」，最後牛津字典也決定為我「Add Oil」，讓加油成為正宗。

同樣，曾經跟台灣來的客人晚餐，談及我們的「粗口」文化，變化莫測，單單是「九七」之間的變化和看法，已讓我解釋了良久。邊似得有啲人，獨孤一味，「抄」黎「抄」去，悶到抽筋！

他們要我們亂，他們想我們怕。此時此刻，我們更加要對自己有信心，了解自己的定位。除了陰謀論，這世界還有很多更值得我們深思的東西！正如廖啟智在〈本地蛋〉對孩子說，「唔知就用下個腦諗通佢」。

我們「真香港人」，不會成為冬蟬。係香港講「蟬」，我只會諗起「著秋蟬牌羊毛內衣，成身暖晒」。香港人，信自己，Add Oil！