頭暈轉向

乜嘢靠北靠南搞到好頭暈……

其實條路好清晰，如果夠力行到尾，成個圈圈成晒形，LIKECOIN一定有得玩！要搞得成，就要多人參與，搞乜活動搞乜議案前首先要搞掂人，搞得掂人，好多嘢可以喺互惠互利情況下聯合嚟發大搞。高重健應該好叻呢樣呀！

其實，都係廢話嚟。太多技術上嘅發展同磨合，都已經夠喝一杯，所以越來越人睇返最基本。大家對一堆乜幣乜池全部都喺度摸緊索緊，又因為要將搣甩個中心，冇真正乜都了解嘅人出嚟推廣同教，就算有都仲係好小圈子，推唔開。有人會反問，明明知道同賺錢有關都推唔開？至少我嚟咗幾日真係睇見好多怨氣，而大部分都係因為其實自己未明白個運作係點，誤點太多太多，講唔清。係有堂教有講座講，但呢啲技術嘢係講得明就好喇！唔手把手咁針對性指導，其實真係睇都睇唔明你講乜啦，聽又聽得到幾多？推廣係要由底到頂做先有用，教識一大班知識份子，耕田嘅咪放棄自己返去繼續挖土囉，好巴閉呀！只不過，耕田嘅人係永遠都比知識份子多好多好多好多囉！

無論web3.0上面嘅鏈好幣好非同質化乜乜乜乜都好，要所謂去中心化可以成熟玩得起嚟，係要好多好多參與程度有返咁上下嘅人，否則自己玩手指啦！要有好多好多識嘅人，自然就要有實用雞精加手把手嘅研究教學，唔係研討，係真係教！教呀！唔係講完叫人自己返去試，試唔到再問，呢尐係開TALK，純粹將知嘅嘢分享，可以好無私，但又其實冇乜壓力，講你唔聽佢又唔會瓜柴嘅。但教就唔同，教得成一個零根底嘅人，指導嘅技術水平至少要達到可以輕易舉一反三同真係深入淺出。

我睇咗有關呢尐嘅資訊好耐，老實講，佢可能識我，但我仲係唔識佢。我好蠢，我冇技術知識，但我都好想參與。同我一樣嘅人好多！包括馬特市呢度都大把！唔係都唔會憂柴憂米成咁，靠北靠南我靠！其實究竟明唔明成個運作係點？每種轉變都需要適應同調節期，而且唔會係單方面。揸車咁，左軚右軚差得遠，揸嗰個適應唔到嘅話，炒車快過打針。靠來靠去之前，有冇去適應一下先？冇嘅話呻乜___？

我要儲LIKE應該十萬九千年之後嘅事，如果要去做公民，應該都係畀錢搞掂算。而且大家都咁，我真係嚇親囉。唔係遲咗嚟就玩完吖嘛。如果一樣嘢咁易崩潰，證明根本就只係泡沫，爆得就死得。但如果人夠多，泡沫都會堆得實，想爆都難。但實咗之後仲係咪嗰樣嘢？唔試點知？