《幻愛》：幻愛見真情，反思歧視及定型觀念

副題1：拍得香港好靚。我真係好_鍾意香港啊。
副題2：我好介意…… 一部咁有誠意嘅作品比人亂咁評論。

終於睇左《幻愛》，可以加入評論，我好興奮啊。

首先想稱讚場景設計，例如用輕鐵拍果種疑幻疑真、患得患失嘅效果拍得好正，啲燈光又拍得靚。揀公屋尼拍都頗有巧思，就算文化背景唔同都可以容易代入處境，好適合介紹比外國朋友睇，佢地應該會對香港嘅公屋環境同文化感到興趣。好感受到近年香港電影嘅畫面、拍攝水準都相當高，開始確立返港式美學，有望慢慢去返8、90年代香港電影嘅高峰，相當感動。

至於精神健康嘅處理上，睇得出做左唔少功課。相信接受過相關訓練或業內人士都會同意，電影展示思覺失調嘅情況，目的係令大眾了解返精神病康復者嘅處境，從而反思歧視之弊，無意貶低或壓迫緊康復者。

個人尼講最「政治不正確」反而係人物嘅表現嚴重衝擊到研究同專業操守，開頭都睇到有啲接受唔到。但角色都付出相應代價，條氣即時順返。劇本真係好叻，編劇好勁 ♡

(劇透注意)

回應返爭議中嘅slut shaming，首先解釋返比未睇過套戲嘅人知道，情況係女主角用性作為生存或交換利益嘅手段，佢對自己有批判，亦都好擔心冇人會真正咁愛佢。

而創作者正正想回應同改變現實既有觀念，所以男主角會誠懇咁講「我唔介意」，並且身體力行，做緊你同我、有病冇病都好難做到嘅unconditional love。果一刻我感覺男主角就好似天使一樣，可見精神病其實唔影響愛人嘅能力，呼應返男主角、康復者對自我嘅質疑，亦讓普羅觀眾反思對康復者嘅既有觀念及歧視。

任何好嘅創作同表達都會考慮到觀眾點樣去接收訊息，平衡返觀眾嘅吸收方式同想表達嘅重點。尤其係想影響或衝擊既有觀念，如果唔先反映現實情況，會令人好疑惑、難以接受。

試諗下如果冇左所謂嘅slut shaming，一般大眾好可能只會得出一個結論：「咪又係雞」。就好似岩井啲戲，對我尼講實在頗為跳脫，又冇設計一啲劇情或對白去回應現實生活，作為一個平實嘅觀眾成日都睇到好辛苦、好想吐嘈。

當普遍人都讚許某樣事物嘅時候，有啲人會自然地產生懷疑同質疑嘅心態。有批判性思考係好寶貴嘅事，然而當批判變成批鬥，建設性討論變成泥漿摔角，只會模糊焦點，製造惡性循環。

用攻擊性或衝擊性嘅表達方式，一時之間可能會帶尼好多討論，但可唔可以走入唔同人嘅心入面，甚至去改變既定觀念呢？我諗呢樣係我地都要思考同提醒自己嘅。

如你願意支持我的寫作，可以入戲院睇香港電影，撐本土優秀作品，多謝！