北角演義（三十八）
Appraisal，基本上係每個打工仔都經歷過嘅一件事，差在你自己知唔知咁解啫 — 有啲公司會開宗明義咁同你做 appraisal，有啲係唔聲唔聲咁 evaluate 你，然後通知你個結果；甚或唔通知。
做 appraisal 對每一個打工仔嚟講，都係個 critical moment。好多時，喺 appraisal 嘅過程裏面，如果你嘅上司發現問題的話，呢個時候，好多嘢都仲有得救。雙方經過溝通之後，都仲有一段時間去「以觀後效」；一般都唔會即時落鑊。
但係，誠如本故事一貫嘅 key message 一樣，任何好嘅政策，嚟到香港，都有好大機會會變成苛政。至於任何好嘅政策嚟到本公司呢，都會變成辦公室政治嘅鬥爭手段。
九月中某日，數碼港某中學。
自從接手咗 S 記嘅 academic program 之後，去港九新界各中小學 sit interview 就變咗日常任務。S 記有好多「高科技校園」嘅 program，好多校園以至IT記者都好有興趣報導。
「阿仔呀，」Cordelia 細細聲喺我耳邊講。「一陣上落樓梯嗰陣，你記住俾隻手臂我扶住行呀。」
「你都未好返晒，做乜咁急返工啫？」我答佢。話說 Cordelia 啱啱做完個小手術，傷口仲痛緊，但已經返咗工。
「你估我想嘅咩！做完手術第二日，都未出院，大佬已經打俾我，問我幾時返得工喇……」Cordelia 嘆氣。「醫生俾晒假我，佢都叫我『可以的話早啲返』呀！我老公炸晒形囉！」
其實 Richard 都唔係第一次「暗示」我哋唔好放病假（佢唔敢明示，因為驚我哋會上勞工處，或者同記者講）。上個月尾我去剝智慧牙，醫生俾一日假我，佢都𠵱𠵱哦哦。好明顯，佢唔 care 我哋嘅生死，只係要我哋返工。
「就算你返工，都唔好跟我出嚟啦！一陣傷口爆線點算呀？」我都皺晒眉。
「坐喺公司咪仲衰！唔係覆 email 寫 PR plan，就係對住個堆 360-degree feedback；我寧願出嚟行開吓喇……」佢一臉無奈。
佢唔講由自可，一講我就頭都痕埋。
是咁的，今個月係我哋公司嘅「360-degree Evaluation 月」。每年一次，公司每個同事都會喺呢個月內，做一個 appraisal。
本公司嘅 HR Evaluation System 係 fairly 複雜嘅（「屎忽鬼」會係一個完美形容詞）。簡單咁講，appraisal 分兩大部份：首先，我哋會有一個「DISC 人格分析」；呢個分析有廿幾卅條 MC 要答，啲問題並唔係 straight forward 嘅，所以冇得你捉路。答完問題之後，我哋就會有一個「DISC 人格分析報告」，將我哋或分為 Dominance、Influencing、Steadiness 及 Conscientiousness 呢四類「人格」。
（真正嘅「DISC 人格分析」究竟係點，文友 Andrew Wong 嘅《應付”麻煩同事”- DISC人格分析》一文中有詳細嘅解釋。同我哋公司獨有嘅「DISC 人格分析」唔同嘅係，我哋公司嘅「分析」，只會取你嘅缺點，而忽略你嘅優點 — 我早話過，任何外國嘅好政策嚟到香港，都會變苛政。）
然後第二部份，就到我同Cordelia嘅對話中所提及嘅「360-degree Feedback」。喺呢部份嘅 evaluation 當中，同我哋合作過嘅同事，唔理係上司定係下屬，都會回答一系列對你工作上嘅觀感嘅問題，然後再「評估」你嘅工作態度。
兩部份 evaluation 做完之後，就會按你所得嘅「分數」比例，代入返本公司嘅「九型人格」裏面。留意返：本公司嘅「九型人格」，有別於外界認知嘅「九型人格」 — 我哋嘅「九型人格」，有六型被歸類為「不合格」，分別在於：有啲不合格，就會有一年時間「以觀後效」；有啲不合格，如果喺三個月內冇改善，就會同該員工解約。
先唔講套 system 對我哋嘅仕途有咩影響，淨係睇上面呢堆 paperworks，我都已經有想死嘅感覺。我哋平日已經忙到七個一皮，你仲要整堆咁嘅嘢俾我寫！我大大話話同大半間公司嘅同事都合作過，每人一兩句我都寫到本《史記》出嚟囉……
同日下晝，公司。
「Estella 姐、Betsy 姐，高抬貴手呀！」Johnny一副必恭必敬嘅樣。「拜託晒兩位姐姐仔。」然後，佢將自己份 360-degree feedback form 交咗俾兩個阿妹。
我認識嘅 Johnny，一向都係平易近人。佢呢副卑躬屈膝樣，其實都係開玩笑、同兩個阿妹玩居多。
「哼！算你啦！」Estella 亦都擺出個「阿姐」款；然後，佢擰過嚟同我哋呢一帶嘅同事講。「你哋都係呀，對我哋好啲呀！如果唔係，寫花你地份 evaluation 㗎！」
「你講咩呀？」我背後嘅 Eric 突然好認真咁講。好明顯，佢唔係太認同呢個玩笑。
「冇，講吓笑啫……」Estella 有啲驚，隨即收起笑容，同 Johnny 講。「我填完俾返你啦，唔傾住喇……」之後同佢個 evil twins Betsy 急急腳走咗。
Eric 不嬲都係脾氣唔好嗰個，今次咁發一發，睇怕佢份 evaluation 都花梗喇……但係又唔怪得佢有呢個反應；因為，呢啲咁嘅 360-degree feedback，的確大有機會製造出剛才嗰種「勒索」嘅場面。
好似呢類咁大型、牽涉全公司上下嘅 appraisal，我話你聽我哋同事之間冇溝通過就呃你嘅。事實上，我哋 consultant 一級、連埋 AD Frankie 都已經「通晒水」，大家如果填到對方嘅 evaluation 嗰陣，都會就住嚟，總之大家好嚟好去。
講真，除非真係可以 make sure 到，你要整治嘅人喺短期內必死無疑；否則，喺呢啲咁揚嘅情況下整你嘅同事，除咗結怨之外，對件事真係冇任何幫助。
公關工作係講求高度合作嘅工種，喺呢個環境得罪自己人，到頭來只會玩死自己；不如大家「he 何霞 hae」搞掂件事仲實際；呢個係我哋呢班管理層嘅共識（除咗真心膠 Ophelia 之外）。
但係我哋對下一層嘅AE同AC就未必咁諗。AE 都還好，由於日常工作上面嘅接觸，AE 係傾向同我哋同聲同氣嘅。但係班AC阿妹呢，基本上佢哋係 Richard 嘅「心腹」，我哋呢班所謂嘅「管理層」，對住佢哋，根本就既管唔到、亦都理唔到。
如果佢哋真係好似剛才咁，明碼實假走嚟勒索嘅，咁都仲好 — 正所謂「唔怕你黐、唔怕你呆、至怕你唔來」。你真係想搵著數嘅，我都仲可以同你飲杯茶食個飽慢慢傾；你敢開天殺價，我敢落地還錢。既然大家有共同語言，真正係「有事慢慢講」，傾掂數大家好嚟好去；咁樣仲好做。
問題係，以佢哋嘅智商，仲未能夠明白呢種「私相授受」嘅好處。萬一佢哋好似 Ophie 呢啲咁嘅真心膠，同你玩「正直」、「公道」，嚟個「有碗話碗、有碟話碟」、喺個 evaluation 度好與唔好乜都寫晒出嚟；甚或唔聲唔聲，暗啞底幫你「加料」，好嘅打八折衰嘅寫足加零一；咁就死得人多喇。
我開始明白，喺「文革」嗰陣，嗰班「領導」究竟係點提心吊膽過日子。
「Eric 哥，唔使咁燥喎；」煲煙嘅時候，Johnny 拍住 Eric 搏頭咁講。「玩吓啫，佢哋邊夠膽真係勒索我哋呢。」
「唉，兄弟，玩吓梗係唔緊要，」Eric嘆咗口氣。「佢哋啲嘴臉難睇吖嘛！呢個 appraisal，真係似文革啲批鬥大會囉！差頂尖帽同唔使跪玻璃㗎咋！」
「冇計㗎喎，鬼叫大佬鍾意玩呢家嘢咩！」Johnny 都跟住嘆咗口氣。「呢個 office，一直都係佢老人家嘅政治鬥獸場嚟㗎啦！如果唔係，又點會咁樣攬住班 AC 嚟鬥我哋呢班管理層喎！易於分而治之吖嘛！Richard 係法家高手嚟㗎！」
「真係高手的話，就唔會嗰度食、嗰度屙，喺自己個搵食場度玩政治啦！」我答佢一句。「我都唔明，作為老細，佢有晒絕對權力；點解仲要咁玩嘢？」
我講完後，三個人都陷入沉思。
的確，生殺大權喺佢手度，學陳浩南話齋：「我唔妥你，我可以𢭃你；我唔鍾意你，我可以𢱕你！」佢有乜唔老嚟嘅，隨時可以炒人，冇人可以挑戰佢嘅權威、亦冇人會問佢責；點解仲要玩埋啲咁嘅小手段呢？
我睇唔透。
Appraisal 完成後兩星期；某日，我喺電梯大堂撞到 HR 嘅同事 Elaine，大家寒暄咗幾句。
「係呢，我哋之前做嗰個 appraisal，會唔會有結果通知返我哋㗎？」我以「傾開就傾」嘅口吻問 Elaine。
「哈，你望都唔好望我會搵你𠻹呀！」Elaine 笑笑口答我。「冇事冇幹的話，呢份 appraisal 就會存檔，作為日後你哋升職加人工寫 reference letter 之類嘅參考。如果我搵得你的話，即係呢個 appraisal 出咗問題，我哋一係要俾 warning letter 你、一係就通知你解約！你求神拜佛，我呢段時間唔好搵你傾偈呀！」
就係咁，我哋又多咗把劍掛喺頭頂上面，要我哋朝乾夕惕、好好做人。
幾個月時間，我對呢份工嘅厭惡，已經超越之前喺上市公司十八個月嘅日子。
（待續）
本故事人物及情節如有雷同，實屬巧合。