臺灣巴士佬 vs 香港巴士佬（2021年重製版）

俗語有云：細時唔讀書，大過做運輸。但其實，係香港做巴士車長其實已經係一件好幸福嘅事。

可能你會問我，點解會幸福？巴士車長一日做成十幾個鐘頭，仲要日日返工就冒着畀人鬧同被人問候祖宗十八代嘅風險，而且仲要係半隻腳係踩咗入監倉嘅工作，做到死先至得嗰兩萬幾蚊左右一個月，點會係一份好工？搵份寫字樓工或者自己出黎揸 Uber／Call4Van 等等，再唔係揸旅遊巴同送貨（DHL、HKTV mall果類）可能仲好、仲舒服。但係我哋試下睇遠完少少，將目光放向八百幾公里外嘅臺灣，你就會明白，香港就算係做巴士車長，都唔係一件壞事。

去過臺灣只有四次嘅小弟，好好彩有幸識到幾個真。老司機。深入傾談之後才發現臺灣同香港就算只係一個小小的巴士車長，待遇都有好大分別，應該說是截然不同。先唔好討論左右軚嘅分別，其實呢樣習慣咗就OK，唔係想像中咁大問題（我人生第一次左軚駕駛，用咗15分鐘左右就習慣了）如果你有機會係臺灣搭過巴士，你就會發現佢地揸車好＂chok＂，同埋速度都好快，與其我話搭緊巴士，我彷彿返咗香港搭緊紅Van，而且係果種速度計不停響但都無人會理咁。但其實，背後都係因為由大量公司不同政策組成而引致。

係香港，無論你死做爛做，吉車遊街，一個客都無，或者滿載而歸，迫到沙甸魚，成架印度巴士咁，你收到嘅人工都係一樣；但係係臺灣，情況係截然不同。雖然臺灣同香港一樣巴士車長都係有底薪，之後再有安全獎金同超時工作補水等等不同津貼，不過臺灣會多一樣野，就係按上車人數決定收入。

（為方便計算，以下部分如果沒有特別注明，一切以新臺幣計算）

在臺灣，假設一個巴士車長每月底薪是一萬，加上超時工作補水、安全獎金、勤工獎金等五千元津貼之後，即是月薪有一萬五千元。然後每月收入會再按你當月工作期間上客人數再計算。假設每位乘客收費是十元，你可以有10％進帳，即每名乘客可以有一元；假設當月你搭載了一萬名乘客，你即是可以取得額外一萬元，即合共二萬五千元月薪。簡單黎講，就係：每月人工＝底薪＋（超時工作補水+安全獎金+勤工獎金等津貼）＋（（駕駛路線的收費Ｘ10％）Ｘ當月總載客人數）

講返香港，條數係容易理解好多。（為方便大家理解，這一段將會用返港幣計算）假設一個巴士車長每月底薪是一萬八千，加上超時工作補水、安全獎金、勤工獎金、車型獎金*等等五千元津貼之後，即是月薪有二萬三千元。簡單黎講，就係：每月人工＝底薪＋（超時工作補水、安全獎金、勤工獎金、車型獎金等等）

*：車型獎金主要是以前某巴士公司用來給予一些駕駛非空調巴士或空調巴士的補貼；現在好像仍然是有保持下來，不過與以前不同的是現在主要是用來給予駕駛不同的車型和車量長度的補貼。（因為小弟已經離開多時，不知道現在還有沒有更改）

其實本來就無乜太大問題，因為每個月收入相差不大。但臺灣同香港一樣，對巴士車長的法律不停朝令夕改，甚至引起比香港更大的問題，就是即使每周工作時間差不多，但收入大減。

臺灣法律和公司政策不停朝令夕改後，即使底薪和獎金制度雖然沒有改變，但是上班時間由一周返六天放一天改為一天例假一天休息和限制超時工作時間（下稱：OT）。即使你放假的其中一天可以改為照返工（下稱：例返），但你例返那天同那天的OT時間，因上車人數而浮動嘅收入唔係用每個客嘅10％計算，而係以7%計算，假如繼續以上面臺灣巴士車長收入為例子，你例返那一天載了一萬名乘客，本來你可以獲得全額一萬元；但是如果你當天是例返，你當天只可以攞到七千元。簡單黎講，就係：每月人工＝底薪＋（超時工作補水+安全獎金+勤工獎金等津貼）＋（（正常工作日駕駛路線的收費Ｘ10％）Ｘ當月總載客人數）＋（（例返駕駛路線的收費Ｘ7％）Ｘ當天總載客人數）如此計算之下，所以引致好多台灣嘅巴士車長選擇轉工。更甚者是，如果你每周OT的時間到達上限，便不可以再OT，使整月收入進一步減少。

反觀香港，我都唔知應該係用咩文字形容呢啲改變，到底係傾向勞方還是資方，我真係睇唔透。幾年前發生過幾單嚴重意外之後，巴士車長工時過高問題終於浮出水面，開始進行改革。係改變之前，一個車長工作16小時都算係好正常，不過當然只有極少數車長會工作接近16小時，大部分平均只有12至13小時，但是我相信大家也明白駕駛是一項長期需要一眼關七的動作，長期精神崩緊，所以其實很多車長也是休息不足。2019年左右（如果我無記錯），政府就正式宣布車長最多一天工作14個鐘，當中不少於3小時休息，而且連續三天的總休息時間不可少於30小時，加上星期六、日及公眾假期最多只可以工作12小時（不過這個好似最後不了了之）。咁當然，為咗保留員工，政策實施之後各間巴士公司當然是加薪挽留員工。所以即使以前同依家相比，其實人工方面都唔係相差太大，咁當然係減少咗，但亦都未去到會影響生活的地步。驟眼之下，雖然好似係傾向保障員工休息時間，但其實諗深一層，呢個其實亦都係一個計時炸彈，總有一日會因為沒有人願意做高工時嘅更份而使人手更加短缺。

我知道如果我繼續講下去就會變成討論最高工時與標準工時，所以我都係決定回到正題。不過比我講多兩句：大部份人正常返工時間都係九點到六點，但係大部分巴士車長嘅返工時間係上午五點到下午三點或者下午三點到晚上十二點，與家人的相處時間與其他人的截然不同，所以真係一份吃力不討好嘅工作。加上小弟曾經有幸在相關行業工作超過五年時間，所以我一直也很尊敬他們這種敬業與樂業的精神。

正所謂小數怕長計，臺灣物價當然不及香港。但都唔好睇少一、兩蚊，一、兩蚊係臺灣已經係好多錢。需要明白，臺灣得好少人可以搵超過五萬元一個月（折合大約港幣一萬四千元左右）。不管是臺灣還是香港，勞工法例本應係用來保障勞工權益，但現在卻變成三不象狀況，既不可保障勞工權益，也使資方需要使更多金錢請人來補償失去的人手，更甚係令到願意入行嘅人愈來愈少，形成一個惡性循環，而且難以在短時間內尋找一個雙方也贊同的方法。

最後亦都希望大家可以慷慨解囊喺下面拍五下手，支持我繼續創作嘅原動力，多謝。當然亦都歡迎喺下面繼續討論，不過因為我已經離開相關行業多時，而且最近兩年亦都因為旅遊限制而未能出外遊埠，好多嘢可能都未必係最新，敬請見諒（土下座