北角演義（三十四）

平凡亦可 平淡亦可

大家有冇覺得奇怪，點解呢部小說入面，我對女主角Winnie嘅著墨咁少？都拍咗個幾兩個月拖啦，點解唔見我寫多啲我哋之間嘅嘢呢？

因為我哋呢兩個月嘅感情生活，非常之平淡。

一講到「平淡」兩個字，好多睇慣娛樂版、韓劇同埋中古時期金莎廣告（唔知今日阿乜乜又點𠱁我呢）嘅讀者，又要準備㩒掣轟我正仆街。因為，係上述幾樣嘢、以至整個香港嘅感情價值觀，平淡=無聊、冇heart、求其、唔珍惜（下刪一千個貶義詞）。

你哋唔知嘅係，就係呢種平淡，令我哋兩個嘅相處非常舒適。因為日常工作嘅嗰種鬥獸場環境嘅煎熬，呢種平淡而互相關心照顧嘅關係，令到我哋可以「回到氣」，唔需要平日忙工作、週末忙𠱁女。

可以話，我同Winnie呢種平淡嘅細水長流感情，係我哋呢十年婚姻嘅要訣。

經歷過《漢城》嘅刻骨銘心，令我再次確認我自細嘅想法：平淡是福。細水長流嘅愛，先係我所追求嘅嘢。

七月中某週末。

星期六拍拖，周街都係人，所以我哋決定過澳門行吓；雖然嗰邊亦應該周街都係人。咁啱永利酒店（Wynn Macau）新開張冇耐（大半年係冇耐，我話嘅），所以順理成章住一晚靚酒店。

我嘅另外一個怪習慣，就係鍾意去澳門shopping。唔係買一般嘢，我去澳門shopping，基本上都係買designer labels同luxury goods。土豪啲講，我去澳門係使錢買貴嘢嘅。喺香港，絕大部份嘅名店，都經已變成自由行嘅天地。香港名店sales狗眼看人低，我哋呢啲一般買唔到六位數嘅「港豬」，會俾佢哋當臭四，連招呼都唔想。

澳門就唔同，由於代理唔同（馬太同沈生都插唔到隻腳落去），同一個品牌嘅名店，澳門嘅招呼，就好過香港好多。如果我預早打電話過去、講明指定時間會到的話，佢哋仲會留定我呎碼嘅衫俾我揀。如果我指定要某條line或者某款嘅衫的話，佢哋都會設法幫我「留貨」。

喺2007年，其實澳門嘅服務業，已經贏香港一班波起碼。

咁當然，去得澳門，就算唔係賭徒，點都玩返兩手、攞個彩頭嘅。我係唔賭錢嘅人，因為唔輸得。但係又有個怪習慣，去親有賭場嘅地方，我都會合埋眼玩一舖。

「你識唔識賭錢㗎？」喺永利賭場某骰寶檯前面，Winnie問我。

「規矩就識嘅，老豆教落，唔識呢啲嘢會好蝕底；」我答佢，一隻眼睄緊之前開大細嘅記錄；捉路吖嘛。「不過我就麻麻地鍾意賭。係呢，你呢？識唔識玩㗎？」

「唔識㗎！」佢眼碌碌望住我。「我都未入過賭場。」

Winnie另一個俾我嘅surprise，就係原來佢仲純過隻兔！唔食煙、唔識飲酒、唔識賭錢、未入過賭場；佢仲連去蒲吓去clubbing都甚少。喺呢個廿一世紀，好似佢咁乖嘅女仔，真係要列入瀕臨絕種動物。

「咁你諗住買乜呀？」佢問我。「大定細？」

「先生，玩吓啦！」個荷官笑容滿面咁同我講。「碰吓運氣都好㗎！」

我望一望，原來得我哋兩個喺呢將檯前面。自從批多咗賭牌之後，呢啲新賭場客又少咗、啲荷官又有禮貌好多。換轉葡京嘅年代，啲黑面神荷官採你都有味！你知啦，賭仔姓賴，對住個西口西面嘅荷，未賭已經輸咗一半。

「又好！」既然佢之前卅舖都冇開過圍骰，應該唔會太「邪門」（老豆教落：開過圍骰張檯唔好賭）。我喺銀包拎咗一千蚊出嚟，五百押咗落16點上面，另外五百買大。

「買呢個賠多啲㗎？」Winnie問我，我點頭。

呢個時候，荷官打骰。約莫卅秒後，因為冇其他賭客，所以佢決定揭盅。

16點！六合彩唔見我中，求其一搏就中咗！哈哈！

「先生你真係好運喇！」荷官滿面笑容咁賠錢俾我；我一睇，兩瓣夾埋成萬銀有多！

我同Winnie都喜出望外，擺低落注嗰五百蚊做貼士之後（又唔係我嘅錢，贏咗怕乜俾？），Winnie問我：「咁我哋仲玩唔玩呀？」

「唔玩喇；」我答佢。「只有『割禾青』先贏到錢㗎！」佢點頭。

既然決定唔賭，我哋就出去行街。原本諗住截的士，點知見到條的士龍就乜mood都冇晒。於是，我哋就沿住水坑尾嘅方向，行咗去荷蘭園禮記食雪糕磚。

食完雪糕，我哋漫無目的咁向新花園方向行過去。喺澳門街，我最鍾意嘅地方，就係荷蘭園、新花園一直去到高士德一帶。呢一帶唔係最bling bling嘅澳門，但亦都冇新馬路、賊船同火船頭街嗰邊咁老舊。呢一帶，先係我眼中嘅「真澳門」。

行到差唔多晚飯時份，我帶咗Winnie去三盞燈，諗住食緬甸菜。點知，我哋係附近兜咗幾個圈，發覺冇任何一間可以引起食欲 — 可能係長大咗，可能係見識多咗，原來，有啲嘢真係返唔到轉頭，幾年前我仍然覺得好正嘅「地踎」美食，已經經唔起時間嘅考驗。

結果，我哋幾經辛苦，截咗架的士去西灣美心食非洲雞。今次再嚟澳門，最大嘅轉變，係截的士難咗好多。以前「伸手牌」周街都係的士，而家差唔多連call車都冇人刮你。

第二日，文華東方酒店商場Giorgio Armani。

今日要做正經嘢，我意思係shopping。

「你係前日打電話嚟留咗西裝嘅張小姐？」Sales姐姐滿面笑容咁同Winnie講。「兩位等一等，我去攞衫俾你哋。」

有個做PR嘅女朋友嘅好處，就係佢會安排好晒必要嘅嘢，確保我哋唔會白行一趟。

轉吓眼，sales姐姐就推咗半架西裝出嚟，全部都係我最愛嘅深色幼間條，呎碼亦都全中。

「馮生，你想睇嘅衫喺晒呢度，」sales姐姐仍然滿面笑容。「要唔要咖啡、茶或者汽水？」

See?! 明白點解我寧願過嚟澳門使錢，都唔幫襯香港名店未？喺香港，我只會去安蘭街幫襯Martin Margiela同Landmark嘅Marc Jacobs；因為我同呢兩間鋪啲sales熟，唔會俾人白鴿眼。

當我忙緊同我堆西裝玩緊帶氧運動嗰陣，Winnie喺女裝部睇緊衫。我去搵佢嗰陣，見到佢睇緊件top。

「鍾意？不如試吓吖？」我提議，佢點頭。

玩試衫換衫玩咗細半個朝早，午飯時間，我哋拎住兩大袋「戰利品」，返咗去Wynn嘅餐廳食嘢。

食完嘢，又未夠鐘返香港，於是我地行埋Wynn個商場。

喺Dior嘅櫥窗，有一樣嘢吸引咗我嘅注意力 — Dior Homme新出嘅「Chiffre Rouge」手表系列。

我望一望手上面戴住嘅Oris，原來，我已經有十年冇換過手表。自從Chloe喺我哋第一個情人節送咗呢隻手表俾我之後，我就一直戴住到而家。十年時間，我有買過其他表，我前妻Miranda亦都送過隻伯爵俾我；只不過，我從來冇換過表，一直都係戴住呢隻Oris。

呢個時候，我心念一轉，就同Winnie講：「不如入去睇吓咯。」佢點頭。

同Winnie相處另外一個優點，就係佢永遠都會順我意，我提出嘅嘢，佢好少會有意見。

我叫sales攞咗其中一款Zenith機芯嘅Chiffre Rouge俾我睇。不平衡嘅外型、紅圈表冠、紅色日曆；Hedi Slimane嘅design難怪如此受歡迎。

最後，我買咗隻表。

晚上九點，屋企。

我將戴咗十年嘅表除咗出嚟，用毧布小心咁抹乾淨。經歷十年時間嘅洗禮，表殼同鋼表帶都已經飽歷風霜。每一條花痕，無論深定淺，都係我呢十年經歷嘅見證。

我小心翼翼咁將隻Oris放返入個表盒度，然後鎖好喺櫃桶入面。之後，我戴上新買嘅Chiffre Rouge。

「小美，我過得好好，你放心啦！希望你都一切安好，身邊有人愛錫你。」我心中向喺首爾生活嘅Chloe講出呢句。

五年，分開之後五年，我終於可以向佢講出呢句、我以為我呢世都唔會有機會講出口嘅說話。

平凡亦可 平淡亦可自有天地 但求日出清早到後 能望見你那已經很好過當身邊的一切如風 是你讓我找到根蒂不願離開 只願留低 情是永不枯萎

（待續）

本故事人物及情節如有雷同，實屬巧合。