希特拉都耍唔甩嘅德國融合課程（Integrationskurs）

除非你唔想入籍，否則吟詩都吟唔甩嘅半年返學生涯

喺德國、以至絕大部份嘅歐盟國家（如果唔係全部的話），要入籍成為該國嘅公民，其中一條必經之路，就係學習當哋語言同文化。無論你爸是李剛又好、李鵬都好，你可以選擇唔入籍唔攞passport，否則的話，天皇都要pass到先有得宣誓。

好多出嚟做嘢一段時間嘅人，都會想「重返校園」；一來充實吓自己，為將來作更好嘅打算；二來，校園生活其實又真係幾令人回味嘅。於是，好多朋友喺我讀Integrationskurs嗰陣，都同我講：好羨慕呀！讀書返學真好！

不過，我覺得大家腦補嘅「重返校園」嘅圖像，係一間間好似劍橋Trinity College咁嘅campus、一群群Ivy League模樣嘅大學生。但係，喺德國讀「融合課程」，就比較似一群廿零個嘅小學雞、萬不情願咁坐喺一個初中課室、等待Missy嚟上堂嘅情境。

以下係我讀三次Integrationskurs嘅經驗。

點解三次？因為頭兩次讀咗一個月就退學 — 我頂唔順我嘅學校/老師/同學；you take the pick。

利申：考試我係一take過嘅。

一切嘅起點，就係「JobCenter」。

JobCenter，全名係聯邦勞工代理局（Bundesagentur für Arbeit），係隸屬聯邦勞工及社會事務部（Bundesministerium für Arbeit und Soziales）嘅一個官方機構。唔好睇見「JobCenter」呢個名，就以為係好似香港勞工處之類嘅機構；JobCenter個權力大得多喇。

同香港勞工處一樣，JobCenter都會幫德國人搵工；不過，個過程就認真得多。喺JobCenter，你唔會見到一塊貼滿招聘廣告嘅壁報板，因為喺同佢哋嘅就業顧問傾偈之前，JobCenter係唔會俾任何工作你嘅。佢哋嘅就業顧問，會詳細睇晒你嘅CV，然後決定你適唔適合就業。

如果你想申請失業金，無論係ALG I（Arbeitslosengeld I，即係失業保險，要全職工作滿一年或以上，最多攞兩年）定係ALG II（Arbeitslosengeld II，即係所謂嘅Hartz IV，係俾冇ALG I或者失業兩年以上嘅人攞），定係想報讀政府出資嘅就業培訓、在職培訓之類，都係JobCenter嘅就業顧問說了算；權很大。

當年，我哋兩公婆就係俾JobCenter認為我哋仲未適合就業，因為我哋啲德文唔掂。其實都唔係咩壞事，一來，我哋真係要學德文；二來，pass咗Integrationkurs，可以縮短一年入籍時間（八年變七年）；何樂而不為？

「唔係呀，我/我個乜乜柒柒，一嚟到德國就搵到工啦！使乜JobCenter喎！」

我當然知道，香港有好多德國KOL、歐洲問題專家之類嘅人，會忍唔住衝出嚟柒。嗱，唔好；ok？我分享緊嘅，係一個德國移民、甚至係德國普通市民嘅經驗；你哋呢啲不出世天才咁叻仔嘅經驗，係應該寄去健力士申請列入世界紀錄嘅，所以唔好喺呢度煩我；拜撚託晒。

因為我哋兩公婆嘅約定，每次一個人去讀；所以Winnie首先入學。半年後，Winnie完成學業，開始搵工生涯（按下不表，真係有興趣知嘅可以留言，我或者會另文詳述）。

然後就到我返學讀書。

德國嘅Integrationkurs，分咗好幾個類別。有啲係專俾啲專業人士（已經係外國認可嘅工程師、建築師、會計師、醫生之類）讀嘅，有啲係俾普通人讀嘅。我哋兩個文科燦，當然係普通人。

普通Integrationkurs亦都分兩種，一種係我哋讀嘅，660個鐘（600hrs語言+60hrs公民教育）；另一種係俾啲冇英文底、甚至唔認識印歐語系字母嘅人（如中東、非洲、瓷國文盲之類）讀嘅，960個鐘（900hrs語言+60hrs公民教育）。收費現時係每小時€1.95，當年係每小時€1.55；660個鐘，盛惠€1023，可以分六期俾。

但由於我哋係EU公民（英國），喺失業嘅情況下，呢筆學費係唔使俾嘅。除此之外，如果學校同屋企距離超過3km（即係唔可以行路返學），仲可以申請車費補助（講緊每個月幾十歐；其實就係一張巴士/火車月票）。但係有權利就有義務，免學費或者拎補助嘅學生，就要遵守JobCenter嘅規矩：缺席一定要有醫生紙（Universal Healthcare，冇得賴冇錢睇醫生）或者有效嘅理由，如：火車罷工、令你冇車返學etc（唔好笑，我真係試過）。

於是，喺2011年尾，我第一次入讀Integrationkurs。

第一次入學（Deutsches Erwachsenen-Bildungswerk/DEB）

當日Winnie入讀嘅係Regensburg VHS，係德國最大嘅成人教育集團。但我嫌佢位置吊腳（係一個叫Königswiesen嘅地方，要上山），再加上我入學嗰陣，Winnie亦都喺DEB讀緊「職業先修」課程，所以我都報讀DEB，咁就可以兩個人一齊返學。

DEB係我喺Regensburg見過、最細嘅成人教育中心。每一間班房，仲細過香港標準中學校舍嘅班房。但由於每班嘅人數，都有成廿幾人，所以，每間班房嘅上堂情況，都幾災難性 — 試想像，一班廿幾個牛高馬大嘅成年人、質埋喺大約半個香港班房咁大嘅房仔度上堂，你就可以想像到，有幾災難性。

真係行入班房未坐定，都聞到臭味囉（冷知識：鬼佬/鬼婆其實都幾臭㗎；唔好以為白淨就等於乾淨）。

課程係所謂嘅「Intensivkurs」，即係密集課程。上課時間係逢星期一至五，上午八點半至十二點半。星期一至三，係由一個匈牙利missy教。佢教得好有系統，notes都多，大家學得都算快；但係星期四五就係另一個災難。

話說，星期四五係由一個拜仁佬教。嗰位拜仁佬其實都一把年紀，再加上由於係本土人，所以好多德文嘅「規矩」、「技巧」，佢都教得唔清唔楚，淨係叫我哋返去背書。拙作《Native speaker放個屁都香啲？》所提及嘅native speaker教語言嘅cons，好多都發生喺佢身上。

再加上呢位阿伯教書唔專心，咁啱班裏面有兩三個俄羅斯團地妻，佢哋可以講講吓書吹吓吹吓，扯咗去教煮餸！再加上成班廿幾人，八成以上係保加利亞人。佢哋有自己嘅圈子、自己嘅語言，好多時離譜到上上吓堂講保加利亞文。所以讀咗大約一個月、完成咗一個module（共六個），我就冇讀落去。

第二次入學（Kolping-Erwachsenenbildungswerk Regensburg）

停咗一輪（主要係因為搬屋，然後連JobCenter都轉埋，錯過咗新班嘅開學時間），喺2012年9月，我又再次報讀Integrationkurs。

新居（即係現居）嘅城鎮並冇任何成人教育中心，所以我要每日搭半個鐘火車去Regensburg返學。上堂時間仍然係八點半到十二點半，由屋企出發去Regensburg嘅火車、一係七點半、一係八點，所以我嘅選擇就係一係早到半粒鐘、喺條乜都未開嘅街上面戇鳩鳩食西北風做早餐；一係就八點半到、然後遲五分鐘先去到學校。

老實講，我諗絕大部份人都係揀後者 — 遲五分鐘啫，講真，又唔係讀中學、又冇prefect摘名記缺點，遲少少咪遲少少囉。偏偏我個班主任，就喺呢個位發我癲、要我早半個鐘返到、喺學校門口做「企街」。

咁都算，如果你一上堂就認真教書的話。問題係，佢每日上堂，都會花成粒鐘時間、逐個逐個同學對功課。呢段時間，未對功課嘅，基本上都冇嘢做。於是，佢就要我哋不停「作句」 — 每人作一句有關生活上嘅德文句子，如「Gestern Abend bin ich zum Einkauf gegangen」、「Heute Morgen habe ich einen Kaffee getrunken」之類，講完就可以叫個名、等下一個同學作句。

由於missy已經係一把年紀嘅阿婆，手腳慢又長氣；佢每日花喺對功課嘅時間，就由一個鐘，慢慢變成個半鐘。試想像，我哋一班十幾人作句作咗個半鐘，真係乜嘢話題、乜嘢動作都作晒。如果唔係有一半係女生、兼且部份係穆斯林教徒，我諗我連「我琴晚同老婆造完愛」都要作埋出嚟。

結果，又係一個月，我頂唔順又退咗學。不過，呢次冇乜損失，因為佢真係教得好慢。

第三次入學（ Volkshochschule/VHS Neumarkt i.d. Oberpfalz）

經過兩次「教訓」，呢次我學精咗。

我唔再去Regensburg呢個「大城市」報讀，我去咗相反方向、同樣係半個鐘車嘅小城Neumarkt VHS報讀。課程亦都由半日制嘅Intensivkurs，變為每星期返四晚、每晚兩個鐘嘅part-time course。

Full-time同part-time course最大嘅分別，除咗上課時間之外，就係同學 — full-time嘅同學，全部都係啱啱到德國嘅新移民或者難民，佢哋好鍾意喺堂上面借啲倚「投訴」德國嘅各種「不是」 — 德文難學啦、難搵工啦、失業金唔夠多啦、啲細路讀書唔掂啦，同埋好似某英國KOL咁、投訴買唔到魚蒸；總之性慾旺盛、屌得就屌。

我同Winnie幫呢班友起咗個名：「keine Arbeit, keine Zeit, kein Geld」（冇工開、冇時間、冇錢）。你每日聽佢哋咁樣喺堂上面投訴一次，聽得多真係人都癲；你咁鬼憎德國，你嚟定居把托咩！

Part-time course就唔同，因為同學們通常都係有工作，所以先揀讀part-time，所以起碼唔會有咁多投訴。我嗰班同學，有做裝修嘅（好好搵，個個揸寶馬X5）、有電機工程技術員、退伍美軍、仲有兩個羅馬尼亞嘅護士同捷克嘅幼師。好幾個只要攞到張cert，就可以喺德國重操故業。

不過，由於個個都係已經落咗腳、開緊工嘅人，於是爭拗嘅論點，就由上面嘅「三k黨」，變成一啲比較實際、又比較「惹火」嘅內容。當時，班上面有一個塞爾維亞裔嘅穆斯林同學，就曾經喺班上面提出「女人唔應該出嚟做嘢，煮飯湊仔先係女人嘅天職」而同missy「開大片」 — 佢唔好彩，我哋當時嘅班主任係讀政治及公共行政嘅feminist（正常嗰種，唔係feminazi），佢好討厭性別歧視。

（LM等睇左膠話：德國極右法西斯歧視少數民族、迫害穆斯林！）

除咗上堂鬧交之外，part-time course某程度上比較似「雞精班」；missy們（兩個）都係以目標為本，所以經常谷我哋做練習，同埋有好多mock test俾我哋去操考試。

坦白講，其實大部份嘅同學，都已經有啲德文底子（返工嘛）；個個都只不過係想嗱嗱𣺉考咗個試入籍。所以，雞精班未必係壞事。

課程內容

所謂嘅「Integrationkurs」，其實就係德文A1-B1嘅正規課程，再加埋60個鐘嘅「Orientierungskurs」（Orientation course/公民教育）。由於課程嘅主要目的，係幫助新移民融入社會，所以就算係德文課程，當中都揉合咗好多嘅通識課題。

根據BAMF（Bundesamt für Migration und Flüchtlinge/聯邦移民及難民局，亦即係Integrationkurs嘅主導部門兼金主）嘅指引，Integrationkurs嘅主題內容包括：

• 工作及就業；（教睇招聘廣告、寫CV、見工等等）
• 基本及持續在職訓練；（如何入讀大學、Ausbildung等等）
• 教育子女；（點樣報學校、家教會同鄰舍功課互助會等等）
• 購物/交易/消費；（去shopping或超市嘅實用德文）
• 休閒及社交活動；（約朋友開P、或者徵友廣告之類嘅嘢）
• 健康、衛生及醫療；（教你點樣去睇醫生同買藥）
• 報章傳媒；（教你睇報紙睇新聞同電視節目）
• 房屋；（教你搵屋租屋嘅手續之類）

然後，就會喺呢啲主題裏面，滲入德文嘅教學。

Integrationkurs嘅課程都係目標為本嘅。就好似BAMF嘅指引咁，當你讀完呢600個鐘嘅課程之後，你會學識一啲基本喺德國生活嘅技能同德文。如果你想搵份餐飲業、零售業、工廠之類嘅藍領工作，呢個課程足夠應付。

但係，如果好似我同Winnie、想搵份白領工作的話，唔好意思，冇任何雇主會認可你嘅B1學歷。點解？好簡單，一般白領日常文書、或者讀寫比較高階文章經常要用到Genitiv（Genitive/屬格），B1課程係冇教嘅；而Integrationkurs嘅老師亦經常強調：Genitiv對你哋嚟講係冇用嘅（梗係冇用啦，都冇預你返白領工，砌磚搭棚落單賣麵飽邊使Genitiv喎）。

所以，當我同Winnie喺畢業後再進修B2嗰陣，第一堂見到嗰堆Genitiv嘅課文，真係嚇到腳軟。B1升B2，條learning curve係垂直嘅。

至於Orientierungskurs — missy從來都冇照課本教書，因為「Leben in Deutschland」（Life in Germany）嘅考試，係喺310條MC題當中、由電腦抽33條俾考生作答；於是，missy寧願一邊講MC題、一邊教。其實主要係圍繞德國嘅歷史、地理、同埋政治架構、公共行政之類嘅通識嘢。

值得一提嘅係，Orientierungskurs非常鉅細靡遺咁教咗有關希特拉同第三帝國嘅臭史、並好細心咁解釋納粹同法西斯主義嘅禍害、以及納粹德國對歐洲帶嚟嘅災難。德國人承認錯誤、並且極力糾正錯誤嘅決心，係值得學習嘅。

除咗試題，Orientierungskurs仲會帶你去參觀市政廳、消防局（有大隻消防員同可以搭雲梯，女同學至愛）、同埋市議會（由於Neumarkt VHS嘅校長係市議員，所以佢安排咗我哋嘅一堂Orientierungskurs喺市議會嘅議事堂、坐喺議員嘅位上堂；據講其他學校係冇嘅）。

考試內容（Deutsch-Test für Zuwanderer/German Test for Immigrant/DTZ）

完成660個鐘嘅課程之後，學校會安排你參加一個叫「DTZ」嘅考試。

考試分為兩大分類，written test同oral test。Written test需時100分鐘，主要分類為：

• Hören（Listening）：聽幾段錄音，有交通消息、對話、電台節目等等，然後根據問題選擇正確答案；
• Lesen（Reading Comprehension）：睇幾段文字，如分類廣告、招聘廣告、招租廣告等等，然後根據問題選擇正確答案；
• Komposition（Composition）：作文，兩題揀一題，然後作一篇幾十字嘅短文。我當日嘅題目係：1. 寫一個email、約朋友今個星期六嚟你屋企開P，email要講明時間、地點、同埋邊個帶啲咩（飲、食、娛樂etc）嚟；2. 你個仔學校會有outing，你要寫信問老師，outing嘅時地人、同埋目的。

上晝考完筆試，下晝就會考Oral。之前上堂嗰陣，missy已經同所有同學分好兩人一組，而你亦都應該同你嘅拍檔練習過無數次，呢個口試就係你表演嘅機會。

兩個人會一齊入去見兩個考官，佢哋會叫你哋自我介紹（之前上堂已經教你寫好呢份介紹詞）。介紹完畢，考官就會同你傾計。傾計嘅內容唔會太深，基本上都係圍繞你嘅介紹詞再問落去。當日，佢同我傾嘅「閒偈」係：香港而家係中國嘅地方，你有冇得閒去中國旅遊呀？（考官當然係冇惡意、亦都唔會理解我哋啲恩怨情仇）

傾完偈後，考官就會俾你一條題目，等你同你嘅拍檔同學「對答」。我當日嘅問題就係：拍檔同學嘅老婆呢個weekend生日，拍檔同學想搵你一齊搞個surprise party，你哋傾吓到時要預啲乜、做啲乜同埋時地人。

對話通常大約五分鐘。當你兩個講完後，整個考試結束；同學可以返屋企等result。

計分方法

「Leben in Deutschland」：33條問題，答中17條為之合格。坦白講，除非你好似王菀之咁討厭政治，否則好很難肥。

「DTZ」：聽、讀、寫、講四部份，考官會將你嘅成績分為「A1」、「A2」、「B1」三個grade。最好當然係四瓣都B1；但係三瓣B1、一瓣A2都算合格。

合格後，你會有一個喺市政廳舉辦嘅畢業典禮，然後會獲得兩張cert；憑cert入籍優惠你等少一年。另外，付費學員如果一take過合格的話，可以獲得部份學費退款，作為獎勵。

未能夠得到一個綜合嘅B1 grade就視為不合格。如果要重考，你須要重讀300個鐘嘅Integrationkurs。