<我的職場 - 雙重標準才是上司標準>

頭2篇都係劇集短評，係第1篇有人留言大家話可以試下打廣東話, 咁就將我過去職場經歷係呢度分享下~ (如有不明白字眼, 歡迎發問!!)

小小自我介紹                        

曾經係一間大公司做一個小小Marketing職員, Marketing 一向係女人天下，女人多自然是非多，我部門連老闆總共有10個女員工。部門大致分3條小隊, 原則上我地分地區係無咩鬥爭, 但女人間點會無鬥呢!!

老闆係一個佛系老闆, 乜都以和為貴釀成呢個困局，而3 條team其中一小隊就係所有是非之源，亦因為呢D是非, 做咗5 年我就決定離開。個條小隊主管係一個中學畢業用咗20年手段好高但實力好低已婚女人, 我地稱佢為水水姐姐，而佢下屬有一個做咗8年”我廢我存在”, 我地叫佢做阿臭(遲下我會解釋佢名字由來)，再樓下就係啲小小薯。

 [有一種標準, 叫雙重]

今日落雨, 正好講下呢個話題。

我地無特定上班時間, 正常office hour 返9點幾, 但老細全世界未返太離譜, 都會溫馨提示大家準時-9:15! 當然無乜人會聽, 特別係老海鮮系同事。

而老海鮮系- 阿臭係當中表表姐,平時大約返9點半打後, 而每次落雨,公司群組都會收到佢短訊話會遲返, 其實佢每日基本上都係遲返, 只係如果佢遲到10點就知會一聲咁解，總之落雨必中，準過天文台!

但佢D 理由真係估你唔到- 佢試過話落雨對鞋太濕所以遲, 話太大雨所以遲(明明全世界都落緊雨), 搵唔到屋企鎖匙鎖唔到門遲返，最離譜係搵唔到眼鏡啊所以遲 (如果你係一個長期要戴眼鏡的人, 想想呢個理由有幾合理)。

而當中係阿臭上司-水水姐姐100%包容,可以話係縱容, 原因自己都係上樑不正, 佢遲到原因都不相伯仲
返工帶個仔睇醫生所以遲 (明明有工人姐姐)
個仔唔比佢出門口所以遲
要SETTLE 個仔所以遲
要去個仔學校講故事所以遲
唱外幣去旅行所以遲

一次半次病咗睇醫生湊仔人道立場遲到好合理, 但每個星期2-3日總有啲意外令佢唔可以準時。如果公司人人都係咁, 係咪要訂上班時間去到10點?

但令人氣憤重點唔止係咁, 水水姐姐會提幫手D 小薯妹妺: 唔止要準時，仲要做全世界返得最早個位。原因係, 佢要條team 有代表係返得最早, 佢知道阿臭無可能做到, 所以唯由選擇一D入世未深小妹妹落命令。(但都從來唔知幾時開始原來返工時間係以TEAM 計...)。試過有同事天真問點解阿臭唔使做早返個個，水水姐姐就會答: 佢搭地鐵唔想同人迫,你知佢啦… (香港地鐵迫就一定, 但幾時公司可以因為唔想迫地鐵而實行彈性上班時間?)

亦天真同事試過有次遲咗少少, 水水姐姐就會嚴肅表示: 我對你真係好失望!我希望你以後會做返好啲, 我唔希望比人見到我條team咁遲!

實會有人問：點解老闆唔出聲? 老闆當然會有講過, 但水水姐姐自然有方法幫佢兜~ 或者老闆出完叫聲大家做好D, 做好第1日然後就會打回原型。

作為隔離小隊, 我確係好睇唔過眼, 但又點? 我無一個呢啲上司, 亦好慶幸無呢啲上司，當時都只係覺得做好自己算, 我提住自己千祈唔好阿臭一樣變咗老海鮮。同時警剔住自己, 我做人上司時，D規定要點樣統一, 係咪食物鏈最底層就可以剝削? 咁下屬又點會服，一視同仁係職場可能好難, 但要服眾大約都要交返少少戲吧! 而且有D事情, 影響正正唔止你條Team, 呢粒種子就係放咗係全個Department。

大家有無相同Double Standards 職場經歷, 留言分享吧!