烏蠅與捕蠅草的關係

〈注意：這文章轉載一段心事，文記用廣東港音習慣的口語而記〉

今日整理一些由GM（我家對外婆的簡稱）家搬回來一直沒有理會過的舊照，看見我沒有在現場（也是摵屎）看我粒女的一場表演。記起在她表演前一晚這樣一段對話。

「媽咪，我地上次跳蜜蜂舞，老師改少少，所以今次我不做蜜蜂，要做烏蠅。」

「啊！咁咪好唔同囉？」

「只係改少少。」

「但係蜜蜂採花蜜，烏蠅愛摟嗯嗯喎。妳唔介意做人類討厭的烏蠅咩？」

「老師話，烏蠅都好有架，佢幫地球上垃圾做分解，垃圾先可以快啲轉化為泥土裡面養份。如果世界上無哂烏蠅，地球就會病架啦。」

「咁隻舞係講畀人類聽烏蠅好有用嘅？」

「唔係呀，今次係講捕蠅草呀。」

「吓？？？」媽媽一頭問號，好深喎，咁烏蠅咪要死係捕蠅草裡面囉？「咁之前全部小蜜蜂都要變哂烏蠅呀？」媽媽企圖轉換話題。

「唔係呀，有啲同學都係做返蜜蜂呀。」

其實媽媽一直想問：「妳真係唔介意做烏蠅（=奸角）呀？件衫咪唔靚囉？仲要去摟嗯嗯喎？」不過問唔出口，若一嘢觸動個女突然啟發話唔跳啦，就大鑊啦。

點知，我個女真係好堅，佢對阿媽嘅教育，訓話如下：

「老師話呢個係香港公園邀請我地表演，係見到我地上次個編舞編得好好，我地都跳得好好。呢個係幫香港公園推廣一啲唔多小朋友認識嘅花草，或者唔可愛嘅植物，但係佢地都係好有用，唔係只有靚嘅花先係對地球好，每一樣植物都有佢生存價值，而佢地都好努力咁盡自己嘅努力做好本份。所以我地唔可以因為佢個樣醜樣就唔喜歡佢地。我係隻舞裡面帶頭嘅蜜蜂，我同XX瑩都好高，所以老師編我地係台中間，呢個舞要講呢個故事畀人聽，所以我要做好個隻烏蠅……」（後面我唔記得啦，通常我粒女長篇大論訓話佢阿媽時，佢阿媽都只係能「哦，哦，哦，咁妳要加油啦。」而且，媽媽個日工作不能陪妳去…）

感恩當年遇到好老師，感恩我家大小姐生來就滿滿愛。希望已屆成年的她依然初心，緊記，世界需要愛與包容才能好好的運作下去。