買賣比特幣避坑指南（新手用）

尋日出左篇【通俗解構各種黃金投資方式及隱藏風險】之後，夜晚同三位街坊放狗吹水時（係呀，不多於四人，DLLM！）又講起黃金，三哥發覺咁樣係慳返所有重覆回答同樣問題嘅時間，所以決定針對另一樣成日解釋到我嘔血嘅嘢：比—特—幣—！ 三哥再次重申自己係百幾蚊美金就退場嘅失敗玩家，呢篇指南主要係街坊mode咁提醒大家，買賣比特幣前要再三考慮清楚嘅因素，同埋作為過來人嘅少少溫馨提示，入唔入市、幾時入市三哥唔會下定論，但係三哥用呢張圖分享一下點樣判斷咩玩法適合自己：

記住所有衍生產品係有機會將你嘅比特幣資產餘額清零，風險不止係來自市場，亦取決於好多在奇怪國家註冊嘅線上交易所存在道德風險問題，只有在你自己註冊擁有的比特幣錢包先係真正由你掌控嘅比特幣（現貨）。所以，以下係俾大家人生第一次trade Bitcoin時，可以參考嘅三大原則：

一、開返你嘅BTC錢包

唔少朋友一起步就係對交易所，根本無一個自己嘅BTC wallet地址，用邊隻wallet你google左有cert嘅基本都ok，唔想根據應用場境用腦揀，就萬佛朝宗用bitcoin.org，不過要每一步都搞清楚你係trade BTC，比特幣，串法係：

B I T C O I N

乜鬼bitcoin cash、比特幣現金唔係比特幣嘅現金，係另一樣野來，或者唔係以上7隻字母嘅你唔好轉出轉入BTC，否則筆BTC消失左無得追！

Private 即係密碼，之後你紋落腳底定點自己諗清楚，唔記得password key無人幫到你，等於億萬富豪唔會唔會見張信托資產嘅文件，或者你在BIG6會唔會唔見樓契。

之後去任何比特幣交易平台，就可以綁定你呢個屬於自己嘅比特幣錢包，喺交易平台開嘅理論上係「托管存放資產」。

二、揀啱你買賣BTC嘅平台

網上流傳九萬幾種買coins嘅方式，宜家三哥將考慮嘅要點分四點拆解：

（A）. 係唔係完全「唔想俾世上任何一個人」想知嘅錢先？

 如是：笠個面罩，去幫襯個D匯率貴好多嘅無人ATM；

 如不是：去題目（B）

（B）. 你俾錢買，或者第時收返現金，係想行離岸定本地？

離岸：電匯去海外銀行美元帳戶，bitstamp , kraken , gemini 都用得過；

本地：三哥我呢啲「被放棄嘅人」，day one就同國產平台無緣，作為回鄉證係裝飾品嘅我，當然不會送頭去幣安註冊，三哥一貫做法係用現金買賣（有利可圖嘅事，唔會咁低B經銀行過數買賣，你懂的），同USDT同玩FX啲美元疊住嚟用， 揀平台主要考慮：

(C) . 有無完整嘅客服配套？

其實同揀找換店一樣，三哥玩開幾萬港紙每筆，有時會累積到七位數字先套現，呢個數真係唔放心同啲無門市嘅交易所買賣，習慣做法係買同賣都係面對面落舖交收現金，即刻見錢，唔駛次次過大額都囉囉孿，揀交易所前要試下聯絡佢哋客服，如果神神化化好似僵屍，或者唔係香港人，咁就要三思喇，到時有咩問題唔知可以去邊度覆灼。

(D) . 實際套現收費點計？

千千萬萬要睇清楚問清楚平台收費，除咗買幣手續費，仲有每筆交易嘅收費，最緊要最緊要係套現點計，以三哥通常去佐敦嗰間Tidebit為例，無記錯係收0.175%將平台額度轉返做現金。既然用咗腦汁打字，係呢度請容許三哥放一放嘅referral link，當係打賞（當然亦歡迎直接磅Like Coin，多多益善）: https://bit.ly/39dLWue

PS：乜柒信用卡買BTC嗰啲唔好再問我，一切用信用卡買嘅方法都係得啖笑，手續費最少都要2%，仲會有每日嘅買賣限制，所以唔使嘥時間去試

三、睇準先好入

比特幣特徵似金融產品多過似貨幣，三哥嘅做法係先充值法定貨幣餘額，或者買USDT轉入交易平台先，睇準要嘅位先入貨（限價單我只係for沽），而唔係拎疊錢去就即刻換成BTC。至於咩位入，睇你對BTC有幾樂觀/悲觀，就算插水咁落，三哥基本上都會等到跌勢平啲先入貨，寧願有時高追佢上好過陪坐艇，BTC現貨市場其實來來去去都係幾種pattern，大家玩多幾次，善用限價單就好易上手。