七份一書店狂想曲 ［召集：夢想開書店的人！］

七份一書店狂想曲

［召集：夢想開書店的人！］

一代又一代的書店職人湧過來，召集下一輪不太平盛世的獨立書店經營者！呢個大時代我哋更加要推廣讀書！

極可能係，香港開埠以嚟第一個「開書店培育計劃」！透過一系列書店經營培訓，我們邀請籌辦書店的同行者一同探索獨立書店的多樣性。Rolling Books一直推廣閱讀，又擁有深厚的書店營運背景，邀請同行者參與這個「七份一書店狂想曲」。

為期半年，參加成員經營自己的1/7間書店，自行選書及面對讀者，同時間與其他成員分擔日常操作的角色。

成為1/7間書店的店主，距離集資上市邁向一大步！

（呢句係曲。如果你以為經營書店係會致富的話，咁你就唔適合參加了，睇我就知。但今次風險不大又有人撐......）

James Chong, Rolling Books

~~~~~~~~~~~~~~~~~~~~~~~~~~~~~~~

咩玩法：

1) 只限半年的實驗書店空間，在油麻地精緻酒店的藝術空間內，無咩壓力下俾你探索點樣經營書店；

2) 土地唔係問題，唔駛你畀場地月租！銷售後分帳來支付部份營運開支（Rolling Books包底）；

3) 書店個名叫「七份一書店」（One Seventh Bookshop），代表我地會搵７名店長（其中一位係Rolling Books自己），各自選書營運自己的書店部份，又共享營運責任、資源及空間；

4) 店長自己為自己的1/7間店選書入貨（自己出錢）；

5) 店長也要承諾每周一至兩天當值整間書店面對客人，唔准淨係賣自己啲書，唔准西臉；

6) 店長各自營運1/7間書店，請為自己的1/7做好定位；但係都想大家一齊合作，發展書店經營新形態；所以，店主們是要分担一啲阿公的日常工作；

7) 咁Rolling Books嘅James以前都經營過阿麥書房，所以埋班前都會有一系列的分享會及工作坊prep下大家心態及眼光，參加者務必參與，相親相愛（預計9月1日開店，8月密集籌備。工作坊於8月內每逢周四晚1930-2130在火炭區進行）；此外，也希望找到現時的其他書店經營者跟大家補習！

啱咩人：

1) 返緊工但係想開書店的人，唔駛辭職住，試下自己選書的眼光；但係你都要自己出鏡，唔好秘撈，積極面向讀者及公眾；

2) 自由工作者，想試下SLASH經營書店；

3) 都真係要同人夾到咀形，要真係Team Player，太有性格的話好難一齊試嘢，7位店長相依為命呀喂；

4) 咁攪書店入貨，你都要有啲資金在手，估計每位店長首批入貨額三至五萬，唔係畀Rolling Books㗎，你入的貨你自己擁有；

5) 每位店長可以找一位朋友當副店長同行頂更，但店長作為主要聯絡人；

6) 咁如果你想用機構身份參加可以嗎？都係個人身份好啲，除非個機構係你全權打骰；

7) 都真係想line up好投入的愛書人，自小夢想開書店那些朋友（來讓我把你的夢想幻破）。希望一齊攪多啲推廣活動，甚至攪份通訊印出來。你可以考慮的自己的店家定位為：推理小說、人類學、性／別、地方創生、Zine、香港文學、銀齡世代、新旅遊、村上春樹作品......( 也不抗拒外語書，不過你要講得通你點解有信心賣得到，我們可不是經營圖書館）。

仲有咩要注意：

1) 賣新書之外，你都可以選擇賣二手書，但係要更有眼光。相信我們只會挑選一位賣二手書的店長；賣其他嘢可以嗎？同書有關的ok，但不超過10%吧；

2) 店面位於東南樓藝術酒店的Art Market，店長當值時也要輕輕兼任Art Market工作；店面也會用作Rolling Books收集童書轉贈基層家庭，各位店主也要協助一下；

3) 店長之間有衝突點算好？咁都要Rolling Books做醜人，當和事佬作最後決定；

4) 留意返，書店的場地支援是東南樓藝術酒店，你的店面或活動有無同酒店有Synergy先？

5) Rolling Books有個網上書店，理論上，你選的所有書可以同步上架網店；實際上，操作細節要埋班後再談；另，實體店及網店都會支援八達通付費，食盡消費劵吖嘛；

6) 6個月之後點算呀？實體店真係要完的，但你可以轉為營運自己的網上書店；最好當然係，你有信心自己開一間書店啦！或者幾位店長集資開書店都得。又或者，攞住呢個經驗，你去應徵其他書店；

7) 這一期只能招募6位成員（加埋Rolling Books = 7），報名表格內請告訴我們你心目中的書店特質，你又有咩專長可貢獻（例：平面設計、砌書架），俾我地選出最合適的店長成員組合。如果最後未有選你的話，也請緊記不代表你的點子不好，只是碰巧未必合適呢個組合，請繼續fighting。講唔埋，當我哋攪「一又七份一書店」時會找你。

PS. 很想參加但係未有資金或者唔啱moment落水，可以旁聽嗎？

咁啦，我哋順道招募兩名文字紀錄者，可以出席我們的大部分聚會，見證整個策劃過程，以義務身份，用文字書寫記錄及評論。有興趣的自行email給 james@rollingbooks.hk ，講下你點解咁抵得諗。

「七份一書店狂想曲」簡介會（Zoom）

都係講返以上各點，不過也畀機會大家提問，可能你提出一啲我地未諗到的。

日期：15/7/2021 (四)

時間：8:00-9:00pm

索取Zoom的連結：https://wa.me/85294425697?text=我要做七份一書店店長 ［在手機直接按以上link，再按Enter便可］

［或者以WhatsApp聯絡9442 5697，文字傳送「我要做七份一書店店長」便可自動索取Zoom的link。］

「七份一書店狂想曲」

店長正式落水報名：https://forms.gle/ViewqbhVPjw38RFE6

截止日期：25/7/2021 23:59

（如果報名人數太多，可能會安排zoom跟個別朋友傾下偈先）

七份一書店狂想曲

策劃：Rolling Books

場地支援：藝述社區 Arts Tell Community及東南樓藝術酒店 Tung Nam Lou Art Hotel

支持機構：重生練習──獨立出版迷你書展2021

查詢：james@rollingbooks.hk