關於籃球，我想說的是⋯

昨天，公子同朋友玩，等接佢，沒事幹。一丁友，悶悶地，就拿起粒波喺度射。射Key，罰球，三分，乜都射，一開始，集中唔到，射乜都唔入。

我條氣唔順，同自己講，點解成日都係咁，時準時唔準，表現咁「海鮮」，點解唔可以穩定啲。結果，谷住道氣，自己挑自己機，一射就射咗兩個鐘。

我由細到大都矮，又瘦，仲要體弱多病，體能唔好，天生就唔係個運動叻嘅人。但唔知點解，我好鍾意打籃球。成日對住班高我成個頭嘅同學，我頂住繼續打。就算去到會考，我依然每日打，打到我阿爸以為我無溫書。

出嚟做嘢，中間停咗好幾年。不過去到早幾年，工作壓力太大，我又開始打番波。我試過跑步，試過做Gym，又有做Yoga，不過只有籃球可以幫我完全減壓，既集中又放空。

我鍾意打籃球，對住對手，攻佢守佢追佢，明明好辛苦，明明無晒力，腦袋一片空白。但係，我依然會搵機會射三分，走位，傳波。呢個狀態下，所有無謂嘢都唔可以喺腦度出現，萬念歸一，係真正嘅集中，也是工作的放空。當然，間中壓力太大，打極都唔入局，繼續胡思亂想，都係會發生嘅。

手風順唔順，入唔入局，我都好鍾意做一樣嘢——我鍾意串我嘅對手。有時街場唔識嘅，我都會比個眼神佢，爆佢一段玩玩佢，打亂佢個心理。有時同朋友玩，明明大家都係玩玩吓，我無端端串一串，大家都會認真起來。之後贏又好，輸又好，唔緊要啦！因為，一心K.O.對手去打，人哋又一心K.O.你，我覺得好好好爽！

我細個好鍾意Reggie Miller，佢三分當然勁，不過最令我著迷，係佢嘅「Trash Talk」。喺我長大嘅年代，NBA動不動就打交，打唔成都Trash Talk串吓你，激到你嬲，等你打唔出水準。Miller個身型，喺當年NBA完全唔達標，不過佢就係唔認輸，每每都製造啲「Miller Time」比你記成世。

我承認，我係一個咁嘅人。串完人，自己無退路，一定要谷埋啖氣博盡佢。同時，我知自己矮，體能又唔好，鬥長命，玩籃底，一定唔夠打。所以由細到大，我都喺度練三分，明明未有Curry仔，我依然射三分，一球當球半咁打。

因為三分準嗰日，你一定要Mark實我。就算我之後無氣，你都會Mark實我。到我走甩咗，你都會搵人追番我。我，就算無力，都可以繼續比對手壓力，拉開個防守，幫隊友搵機會。

就算我嗰日唔準，只要有機會，我都會繼續射，最好你唔信我會入，懶得Mark我。因為我信，只要我攞得返手感，我最後都會入到贏你嗰球，咁就夠晒數啦！

我討厭別人睇唔起我嘅眼神。喺街場，見到啲懶乜叻串串貢，我一定追住你嚟射，一定要射死你打謝你！又記得曾經有個自大老闆笑我矮，打波邊會夠佢咁高打！你係我老闆又點啊？你又未打過，你肯定你贏到我？

由細到大，口不擇言，令我吃咗好多苦頭。年紀大咗，我又發現，呢團火有辣有唔辣，同時一直令我向前行，力求上進。如果無呢團火，我集中唔到，求求其其，射極都唔入。不過人老，會收火，減少無啦啦得罪人。但我唔會封嘴，熄咗團火，又好容易變咸魚。

團火，把死人口，宜家留番喺球場用，養住自己，令我心入面繼續年青，依然激情。

關於籃球，我想說的是，我不會客氣的，小心。