補番推介：我被綁架到貴族女校當「庶民樣本」這件事

既然令和二年春季新番已經接近無番可追，連辣妹與恐龍這套治癒番也要延期的時候，倒不如回顧返以前嘅「新番」。今次介紹比大家的「新番」是：我被綁架到貴族女校當「庶民樣本」這件事（下稱：庶民樣本）。

庶民樣本是2011年由七月隆文創作的輕小說，並由一迅社出版，到2016年完結；動畫版由 SILVER LINK. 製作，2015年夏季新番推出。故事講述高中生神樂坂公人某天突然在學校里被人綁架了，然後在清華院女子學院生活的日常搞笑校園番。

先講動畫，其實當初點解會追呢套，因為果季除了點兔第二季之外，第二套（都係最後一套）呢季有興趣追的番。一開始睇第一集，其實老實講好奇怪，可能因為我連原創小說或者漫畫都無補，好彩睇咗陣之後都大約了解個故事講乜（細細聲講：當然睇完第二集後我當然唔係因為白亞繼續睇落去啦，絕對無啲咁嘅事Www）睇完三集其實都覺得可以繼續追落去，咁就繼續睇。其實呢一套睇得出呢套製作組真係好有心機，雖然人設崩壞呢啲就預咗一定會出現，但係每一集都可以睇得出製作組用好多心機同時間擺咗好多伏筆係唔同嘅地方，例如愛佳點解唔似大小姐、女僕九條點解每朝係神樂坂起身前也要親吻他？甚至乎最後一集最後一部份播完ed之後惠理點解要去搵神樂坂？其實呢啲位都睇得出製作組係擺咗好多心機係呢啲伏線上，其實都算係以呢幾年以來難得一見，亦都睇得出製作組好想繼續第二季，如果唔係根本唔會留低咁多伏線喺度。不過最後當然係因為好多大人的理由，加上當年嘅BD銷量其實都幾慘烈，所以都幾肯定第二季應該有生之年都唔會見到，不過如果有機會有時間不妨花少少時間去重溫呢12集。

既然講到咁，同埋你睇到呢度都仲未撳上一頁離開，我諗你都好想知上面所有嘅伏線之後發展係點？先講咗結局，選擇既唔係青梅竹馬嘅惠理，亦都唔係九條，而係選擇咗愛佳。至於點解會揀愛佳，其實主要係因為佢以前細個嘅時候曾經同愛佳見過，不過後尾因為佢發燒無晒所有記憶。至於點解佢會同愛佳見過面，同佢會入嚟呢間學校，就係佢專屬女僕九條小姐。神樂坂真實身份就係...同女僕九條無血緣關係嘅哥哥。雖然呢個劇情真係貴圈真亂，我再講落去你都唔會睇得明，不如自己補返小說，自己補完佢會實際啲。

如果大家真係會花時間去睇呢一套作品，其實呢一套個作者一路都寫得唔錯，不過去到結尾你就會明白咩叫趕收工。結尾係寫到愛佳屋企因為破產所以要離開清華院女子學院，之後就住咗喺主人公屋企。跟住機緣巧合之下屋企又變返有錢人，咁就可以返去清華院女子學院讀書，跟住最後部分就是講神樂坂揀咗愛佳。其實呢一部份相比起成本書其他我真係覺得講得好快，真係有啲遺憾。不過相比起最近幾套完結嘅作品（例如五分等的花嫁和我們真的學不來），呢套其實個結局睇落係順眼好多。不過始終都係幾年前嘅作品，用而家嘅標準黎睇其實就無絕對答案嘅，不過呢套就真算係近幾年以黎得意嘅作品，一套要要女僕有女僕、要校服有校服、要大腿有大腿、要蘿莉有蘿莉，都一次過滿足好多要求。既然今季都已經無乜番好追，咁不如就花少少時間聚下啲舊番，或者睇完之後你會有唔同嘅體會Www

希望大家可以拍五下手，作為支持我創作的原動力（土下座