來一場青澀的戀愛－月色真美

近幾年動畫主要分成兩大類，一類是異世界番，另外一類就係愛情類型。今日當然就唔係講異世界番，梗係要講適合今日主題嘅愛情番。其實近幾年，如果要數出名嘅愛情番，不外乎就係《不起眼女主角培育法（冴えない彼女の育てかた）》同《果然我的青春戀愛喜劇搞錯了。（やはり俺の青春ラブコメはまちがっている。）》，不過我今日亦都唔係要講呢兩套，而係想講一套比較少人認識嘅作品：《月色真美（月がきれい）》。《月色真美》 由 feel. 社製作，與《果然我的青春戀愛喜劇搞錯了。》二期和三期同一間製作公司製作，岸誠二監督，2017年4月－6月播放。其實我當初我第一次聽到呢個比名嘅時候完全想像唔到係講咩類型，因為當季賣萌嘅有《雛子的筆記（ひなこのーと）》，賣妹子就有《情色漫畫老師（エロマンガ先生）》，跟住仲有套個名長到都唔知想點嘅異世界番，咁究竟《月色真美》係咩類型動漫？

其實《月色真美》成個劇情，只係一個好普通嘅校園愛情故事，沒有一出門口就俾車撞到，沒有製作同人遊戲，有嘅就只有一個好普通好簡單純愛嘅故事，成個故事簡單來說，引用HoneyWorks 劇場版戲名就可以講完：喜歡上你的那瞬間。我已經講完成套《月色真美》架啦，多謝大家，可以撳左上角上一頁離開啦。

如果你仲睇緊呢一行姐你都知我係講緊笑啦。咁大約講下個故事，故事就係因為一次偶然嘅相遇令到認識對方。之後再因為日久生情再繼續落去。第三集男主角（下稱：小太朗）表白，之後女主角（下稱：茜）答應成為男女朋友。之後就一路有風風雨雨咁繼續落去。去到最尾就因為茜父親工作關係要搬走，所以小太朗就寫咗本《13.70》，之後就成功一齊去到結婚。（其實嗰本13.70應該係叫小說定係叫做情書，我睇唔透。小說又好似太短，情書又好似太長）其實由剛剛拍拖開始，唔難發現茜唔係好願意接受小太朗，跟住第五集小太朗主動捉住茜隻手；同埋第十集，茜主動吻小太朗果一個行為，其實已經睇得出個對比，佢地係一日一日逐少逐少咁成長。當然，第七集去遊樂場果陣，小太朗鼓起左好大勇氣，向全班同學表示佢地係情侶。由此可見其實小太朗佢為保護茜而去做好多野。相比起剛剛拍拖果陣其實係大膽好多。（弦外之音：其實每一次最重要果陣，最佳助攻手都係東山奈央，每次佢嘅歌詞，都係係最好的時光出現，為成套作品加咗唔少分）成套睇完之後你覺得你係睇咗太宰治節錄，因為中間引用不少太宰治作品，不過用一個比較容易嘅方法呈現係大家眼前，比較容易入口，如果唔係都應該會睇得好辛苦。不過當然，最後改變小太朗當然係自己而唔係太宰治。另外有幾集後面同BD特典都有個小劇場，一節大約一分鐘左右。小劇場主要可以補回唔同角色戲份同發展，但係又不至於會影響主線劇情。其實都幾搞笑，小劇場就唔多講啦，留返大家自己睇。

之後就講一樣其他作品一定唔使多講，但呢一套一定要講嘅重點，就係每一集嘅標題。首先講講《月色真美》呢四個字，呢四個字係日本著名作家夏目漱石的功勞。因為根據好多唔同的歷史記載，呢一句係日本人喜歡對方的時候隱約地向對方表明心意，意思大致等於我愛你，但這一句含蓄得來又有詩意，完全配合呢一套主題。之後就係每一集嘅主題，每一集嘅主題都係對應日本唔同時期嘅文學作家嘅作品，雖然我相信大家大部份作品都未聽過，但係呢一套彷彿就係環繞緊好多個唔同嘅文學作品組合而成嘅愛情故事。相比起依家好多好毫無營養嘅番或者異世界番嚟講，呢套絕對係一套好有深度嘅作品。如果話《果青》係一套文學作品，呢一套亦都不遑多讓。（《果青》原作者渡航曾經表示《果青》比較像文學作品而不是一套青春戀愛喜劇）

其實呢套作品完結左之後，有好多人就討論其實應唔應該拍第二季講佢地高中生活。咁其實就以我個人而言，拍到呢度就足夠，因為如果再拍落去就有可能影響整套作品，同埋咁單純嘅戀愛，高中應該唔會發生，初中時代剛剛好可以表現出呢種青澀。另一方面，有人話其實佢同當年下一季《徒然喜歡你（徒然チルドレン）》都係差唔多類型題材作品，但係又咁講，兩套根本就唔可以相提並論，基本就係唔同類型題材。兩套我都有睇，《徒然喜歡你》其實係一個比較公式化泡麵番，集合好多情侶不同的故事，同《月色真美》完全唔同。《月色真美》雖然只係講述一男一女好普通愛情故事，甚至有太美好的感覺，由始至終都沒有經過大風大浪，一切太做作，但係佢中間部份其實係好多情侶都會有機會面對的問題。而且佢當中人物描寫寫得好深入，女主角同好朋友之間友情變化真係一集集咁慢慢逐少逐少咁樣改變。由好朋友變成敵人再變返去朋友，甚至最後一集成為最佳助攻手。因誤會而結合，因了解而分開，當然最後都變返好朋友。（雖然現實可能都會有呢啲情節，不過個描寫真係寫得好好，睇到令人好心酸，令人既愛又恨呢個角色）其實如果再諗深一層，入邊有啲問題其實係佢哋嗰個年紀應該唔會點樣面對，可能係一個成年人先會面對嘅問題，但係岸誠二都寫埋落去，彷彿好似睇透咗果個年紀嘅學生，加上好多情侶都會面對到嘅問題，令到成個故事更加容易令人引起共鳴。

當初我一啲都無諗住追呢一套，跟住偶然喺YouTube見到有人介紹呢套不同崩位嘅片，跟住睇吓睇吓就慢慢變咗喺度追呢套。我本身就唔係一個好豐富感情嘅人，甚至會收收埋埋自己。但係慶幸自己中學時期曾經有機會經歷過拍拖嘅滋味，咁一路睇落去其實真係睇到好肉緊同埋一路喊。當中原因一定唔會係個故事令人好催淚，好感動之類，而係令到好多人有所反思，甚至引起共鳴。真係會有一股強烈衝擊令你諗返起以前細個嗰種天真無邪嘅初戀。我自己都覺得個編劇真係寫得幾好，因為佢真係寫咗好多風風雨雨喺入邊，而唔係一帆風順咁拍拖，同埋亦都睇得出佢哋兩個嘅愛唔係玩玩下，而係對對方好珍惜嗰種付出，現今世風日下其實已經好難搵都話真係純愛嘅愛情，其實依家幾多人真係會好似入邊咁學小太郎為一個女仔去付出咁多，就算花幾個鐘頭去考一間明知自己考唔到嘅話都要去試一次，咁浪漫嘅事我諗其實依家呢個速食文化盛行嘅時代已經好難先會發生。

無睇過就唔知講乜，睇完十個有九個都話呢圖係神作。不過就算係神作，呢套嘅崩位其實係好多，例如有極速換衫、背囊消失等等，不過呢套又唔係主要睇畫風嘅作品，算啦唔好計較咁多。不過講起畫風，呢套有個好奇怪嘅問題，就係每個人左邊面係一定反光，即係如果睇唔慣就覺得好奇怪，睇多一兩集就覺得無乜大問題，但唔代表無問題。其實另外仲有個問題，不過呢個就係我個人嘅感覺，就係最後嗰個小劇場可唔可以講多次少少，或者補完嗰條線。依家就好似做到有啲十五十六咁，有頭無尾，即使BD有追加部分發展，但是無好似主線咁有一個完整結局，感覺有少少任君所想。（其實我同好多人一樣，都只係想睇浪漫同老師最後點）其實仲有一樣野，不過呢樣野我要讚佢，就係還原度真係超級高。第八集嗰個川越祭以至周邊嘅風景，還完度接近100%，甚至乎連官方都認為完全還原整個活動過程，令人彷彿置身現場一樣。之後有機會，我一定會親身去一次川越祭，欣賞呢一個超過360年嘅關東地區三大祭祀之一。

呢一套係香港同台灣人氣完全唔高，甚至乎無乜人認識，加上同期仲有乜好多人氣作品，無人氣完全正常，但係日本就人氣好高（係C92官方攤檔，女主角集集都拎住果隻小紅薯極速俾人買晒）。最後一集最尾個十分鐘左右開始， Twitter 有關 #月がきれい 係每分鐘數以千計。當然無可否認岸誠二係個結局嗰度真係編排得好好，因為作者收刀片同神作只係一線之差。其實如果唔睇到個尾，真係唔知道原來每集結尾LINE 嘅訊息係講緊佢地兩個嘅將來。除此之外，東山其實都幫咗唔少。所有嘅歌都係佢一手包辦，其實最尾嗰集佢首歌真係配合得好好，我真係睇到兩行淚水。其實當最後開始播歌果嗰一刻開始，我以為又好似《秒速五厘米（秒速5センチメートル）》咁求櫻花落下嘅速度，但好彩係有情人終成眷屬。講到尾，即係如果大家都仲有初戀嘅話，就好好珍惜。（講明先，我唔係話A380就要唔珍惜，都要好好珍惜）雖然由初戀去到結婚嘅機會率係仲低過你中六合彩頭獎，不過都係奉勸大家一句啦：珍惜眼前人，好好把握每一次機會，因為機會未必有第二次。

即使過咗咁多年，我都仲係建議大家用自己嘅方法睇完十二集之後都係去買BD／DVD支持。因為呢套真係唔貴，BD只有一卷，都只係講緊17,000円左右，仲要已經係包埋原聲OST 大碟。其實呢套真係好有良心，相比起其他作品分開三、四卷分開賣，呢套更加容易儲齊一套，其實應該係話一買就已經買齊一套，而其實已經係一早買左amazon jp 初回限定，兼送女主角經常拿住的紅薯公仔放大版，大紅薯公仔，不過大家睇到嗰陣時應該已經訂唔到，因為最少已經過了四年Www 

衷心多謝你係咁幸福嘅又睇完一篇廢文，希望未拍拖嘅早日搵到真愛，拍緊拖或者已經結婚嘅就白頭到老。走之前希望大家可以慷慨解囊係下面拍五吓手，作為繼續支持我創作嘅原動力，お願いします。