喺德國生活，每年聖誕嘅holiday mood，由11月尾開始……

亦即係話，其實我已經冇乜心機做嘢成大半個月。還好我係個正職寫作同翻譯嘅freelancer，就算冇心機，我點點檔交行貨其實都冇乜人會發現。（利申：我啲《中環》冇交行貨㗎，寫親都嘔十九幾兩血！）

今日睇七天天氣預報，今年德國應該冇白色聖誕。原來話，最後一個全德國嘅白色聖誕，經已係2010年嘅事。我仲記得嗰年係我哋第一年嚟德國定居，某日下午兩三個鐘內，就落咗兩呎雪，搞到大部分交通公具都要停駛。

冇白色聖誕，對我嚟講唔係壞事。對於嚟旅行嘅人嚟講，白色聖誕襯托住Weihnachtsmarkt嘅美景，係冬天嚟德國旅行嘅主要原因。但對於一個居住喺德國嘅人嚟講，我最怕就係落雪 — 冇錯，落嗰陣的確係好靚，落完後一兩日都好靚。但問題係，當雪喺日間俾人踩溶咗變成污水之後，夜間嘅低溫就會令佢結冰；再落返啲新雪喺面，你完全乜都睇唔到。呢啲「黑冰」就係德國冬天路上面意外嘅主要原因。

冇得你「小心啲行」，冇得你「睇路」，亦冇得你「著對唔煽嘅鞋」。總之無論你著對乜嘢鞋（田徑釘鞋可能好啲），一踩上去，輕則煽你一煽、重則四腳朝天。每年冬天，好多人都因為咁而跌斷手腳。我同老婆雖然有買行冰面用嘅冰爪，但亦都只能盡量避免意外，談唔上絕對安全。

所以，每當喺FB聽見有人話「落雪好浪漫啊」嗰陣，我個心就會屌一聲，然後心中默唸一句：放催淚彈啲煙夠好浪漫咯。

其實，落雪一啲都唔浪漫，仲好污糟。我只係暗暗希望，今年一二月唔好冰封得唔得？

雖然，我非常了解，時代革命並未完結、兼且全無跡象完結（乜嘢訴求都未達到點完？），但我對於暫時嘅平靜（雖然只係表面上）完全唔反感。休息，是為了走更遠的路。（我驚呢段寫得唔清楚的話，會俾啲仆街扣帽扣到高過姚明。）

既然難得冇乜政治嘢俾我寫，不如搵啲嘢嚟笑吓、搵啲人嚟串吓、抽吓水。

最近有兩壇關公災難，令到我考慮緊，如果我重出江湖開壇作法的話，係咪應該有得撈？

正如我之前講過，「公關災難」又好、「關公災難」都好，十居其九，都同我哋無關嘅。坦白講，客又好老細又好，你要衝出去柒，唔通我阻你咩？！不過，關唔關我事都好，最後要出嚟幫手抿屎嘅，結果都係我哋。所以，真係沒有誰比誰更高尚咯……

第一壇我諗都冇乜（香港）人唔知。嗰朝起身，我就係俾壇咁嘢喺FB洗版，唔知仲以為係乜嘢名人名媛打咗柴，點知原來係幾個半紅不黑嘅奀星。家陣搲clippings真係咁難咩？要出此下策去搏出鏡，ROI好低喎。

首先：而我不知道朱庭萱是誰。好學嘅我當然唔會俾自己解答唔到呢個問題，於是我問google大神：

朱庭萱（英語：Bonnie Chu），香港的飲食作家，煮食Blogger。她的博客名字叫「玻璃朱城」……（下刪幾百字職位銜頭）

而她的正職是「金利豐證券」副總裁。2016年在香港創辦了廚藝中心「Cooktown名宴」，兼任CEO及校長。

（OT：朕睇到「玻璃朱城」笑撚咗。畢竟，marketing嘅嘢，真係要啲天份嘅。）

「金利豐證券」副總裁……我已經唔去諗嗰堆黃藍問題，我第一個諗法，就係究竟邊個咁究薑搵佢開倉買股票呢？

佢會唔會幫我買孖展入咗隻下晝四點到期嘅末日輪，然後同我講please delete同fxxk reply please㗎？！我唔想fxxk reply佢喎！

我覺得呢個已經唔係黃藍嘅問題，亦都唔係是非黑白嘅問題。事實上，上述嘅問題，根本唔應該係個問題 — 黃藍、黑白，其實都只不過係個選擇。要作出呢個選擇，需要嘅可能係良知、良心、正義感、理念、同理心、公正、正直、愛等等等等（下刪五百字）；但亦都可能只不過係幾舊水或等同價值嘅禮物、某啲商機、或者甚至唔知點解就作出咗個決定。

但點講都好，作出一個選擇所需嘅，只不過係「條路自己揀、仆街唔好喊」咁簡單。揀咗，然後找數；其實同買嘢一樣。有時候做人，實在唔需要簡單複雜化，認數就得。

呢位朱小姐嘅問題在於，佢以為可以靜雞雞去撐警冇人知。

佢覺得，同埋一班包括曹永廉、姚瑩瑩之流有啲知名度嘅藝人、去警察總部撐警、接待佢哋嘅包括PPRB嘅江永祥高級警司、大家仲要拉banner影埋相、然後覺得呢件事唔會有人知、唔應該有人知、大家影晒相亦唔應該share。其實佢咁諗，同認為「我夜媽媽落街裸跑，應該冇人知嘅」冇乜分別。

唔share的話，咁影相嚟做乜呢？真係留個紀念定儲起當J圖呀？

佢一定唔係無知，佢係明知嘅 — 真係咁無知的話，佢就唔會喺張相開心些牙之後，同班黑警講「人哋嚟支持你哋害死人」 — 識𢯎底即係知道發生緊乜事。雖然，我唔明佢係想講嘅意思係「人哋嚟支持、你哋害死人」、「人哋嚟支持你哋、害死人」定係佢真心支持黑警去害死人。但起碼，佢知驚，即係知道自己做緊乜，唔係好傻好天真。

一個同我年紀相若（即係唔慌細得去邊）、見過吓世面、食過吓大茶飯嘅「副總裁、CEO及校長」，都可以犯上連一個U grad未踏入社會都未必會犯嘅錯誤，如果佢唔係無知的話，呢啲唔係蠢係乜？

咁智商問題嘅嘢，我哋亦都唔好欺凌殘障人士喇。

然後另一單就係國際嘢。一不離二，今次嘅主角，仍然係我哋活潑開朗兼非常有陽光氣息嘅Greta Thunberg。同佢演對手戲嘅係分秒不差使命必達嘅Deutsche Bahn（德鐵。又：希望各位直咇腸睇得明反話）。

話說Greta出席完喺馬德里嘅COP25之後，搭火車取道德國返回瑞典。喺途中，由於旺季嘅關係，Greta冇位坐，只能坐喺通道位置。喺漫長嘅車程中，佢tweet咗一張相（大家暫時ignore咗佢下面個retweet先）：

老老實實，呢條係完全冇問題嘅一條tweet；呢啲嘢，我哋都做得多。去旅行搭車搭船打卡，對於任何人嚟講都非常正常。對比起嗰啲連去廁所都要打卡嘅人嚟講，Greta實在係好小兒科。

偏偏就有啲「豬隊友」送佢一程 — 喺呢個情況下，就係佢啲fans。Fans們不值「環保女神」被德鐵冷對待，群起攻之。好快，個retweet嘅規模去到觸動到德鐵公關嘅程度。

需知道，同世界上其他人嘅stereotype認知唔同，德國人係充滿幽默感嘅。只不過，德國式嘅幽默感去到其他國家，就會變成「有啲無禮」。德鐵就係咁，用咗啲「德式幽默」去答Greta：

原文直譯係：

“Dear Greta, thanks for supporting us railroaders in the fight against climate change. We were happy that you were traveling with us Saturday in ICE 74. And that’s with 100% sustainable electricity.”

“It would have been even nicer if you had also reported how friendly and competently you were taken care of by our team in your seat in first class.”

唔知大家明唔明嗰種澎湃嘅感覺：我哋呢啲喺德國住咗十年八載、經常要面對德鐵呢種「幽默感」嘅人、睇到呢個回覆之後，嗰種不能言喻嘅「會心微笑」？

我成日都話，一個成功嘅公關，應該好好向空姐們學習；因為空姐們永遠懂得用最客氣嘅說話、去講最唔客氣嘅說話。德鐵今次示範咗，佢哋其實都精於此道。

就係咁，一條搭車無聊發嘅tweet、再加上一個唔識講笑嘅人講笑嘅reply，一場唔大唔小嘅公關災難就此而生。的確係災難級別，你睇吓德國傳媒個pick up rate就知。

呢單其實唔係普通嘅公關災難，呢單嘢係教材級，因為佢係一個教科書中「Classic Washington Scandal」嘅示範。

我喺DC做嘢嗰陣，有個行內術語，叫「Classic Washington Scandal」，意思即係「screwed up by doing the right thing」。當你細心留意返Greta同德鐵呢次嘅twitter事件，你就會發現，其實雙方喺呢件事上，都冇做錯嘢。

一個女仔搭車搭得悶悶哋，出條tweet話自己冇位坐，有乜問題？佢真係完全冇投訴過喎！Deutsche Bahn公關空姐上身咁retweet with comments，你可以話佢遣詞用句唔夠「政治正確」，但佢又真係冇錯喎！「咁我哋嘅staff係有招呼佢貴姐吖嘛！」你又冇錯、佢又冇錯，唔通係社會嘅錯？

我知咁講好唔公平，但係 — 其實你哋兩個個底都花晒啦！兩個擅長用臭臉同不善嘅語氣去講嘢嘅人/機構，到今時今日先至整壇咁嘅關公災難嚟攬炒，咪遲咗囉！便宜咗你哋𠻹啦！

公關災難，往往都發生於彈指之間，Greta呢個case就係其一（唔手痕咪冇事囉）。但係有時候，災難同喜劇嘅距離，都只不過係一線之隔。

有睇開足球、特別係英超嘅文友，對「奧燒」（Mesut Özil/港譯奧斯爾）應該唔會陌生。

Özil係個好富爭議性嘅人。德國人愛佢嗰陣捧佢上天，然後反檯嗰陣就將佢貶成國家罪人。喺14年世界杯，佢係德國捧杯嘅英雄；但係到咗18年，經過德國足總精心安排嘅轉移視線（我絕對相信呢個係Reinhard Grindel當日嘅佈局）下，奧斯爾旋即成為分組賽出局嘅「罪人」。儘管喺數據嘅顯示中，佢並唔係work rate最差嗰個。

奧斯爾非常拿手為自己炮製公關災難，佢同佢嘅祖國總統厄多安（Recep Erdoğan）嘅合照就係其中經典。如果佢唔係喺德國出世的話，一定會有人動議取消佢嘅德國國籍。

但最近，奧斯爾又再次乘搭「白金升降機」、再一次成為國家英雄。

奧燒出tweet燒嘅數簿，就係連我哋一直強悍嘅Greta Thunberg都視而不見嘅中國。佢嘅「問題」好簡單：

“(In China) Qurans are burned, mosques were closed down, Islamic theological schools, madrasas were banned, religious scholars were killed one by one. Despite all this, Muslims stay quiet,”

當德國人懷疑佢究竟仲係唔係德國人之際，奧斯爾呢條tweet，令到德國人將佢嘅說話解讀成：佢嘅敢言、對普世價值嘅追求，係德國人嘅典範。

特別係當佢「老細」阿仙奴都為咗五斗米向中國恩主跪低kowtow嗰陣，奧斯爾嘅「風骨」就顯得更可貴。

雖然，奧斯爾發聲去撐嘅，係德國人唔太認同嘅穆斯林；但好明顯，中國對穆斯林嘅迫害，經已超出德國人可以容忍嘅限度。所以，大家都會撐奧斯爾。最緊要嘅係：美國撐佢。

由此可見，一個成功嘅公關campaign，同一壇公關災難，其中所牽涉嘅差別，其實真係有限之極。同樣嘅材料可以煮出佳餚，亦都可以釀成災難。係好係醜，大家自己執生啦！

本週《中環遊戲》免費文章：

中環遊戲（48）What happens in Vegas, stays in Vegas

中環遊戲（49）請柬一出怎抵擋

最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。