[粵語]香港文化嘅底色

2023年, 喺香港主權移交嘅26週年,亦都係香港國安法生效嘅第三年. 雖然疫情已經過去, 遊客亦都返緊嚟, 但係其實大家都知香港已經唔係幾年前嗰個香港. 呢個唔係淨係話香港冇咗成街嘅霓虹燈喇,或者香港電影已經冇咩創新喇, 其實香港喺係好多方面改變咗嘅,我相信生活喺呢個城市嘅好多人都感受到呢種改變,雖然可能好多人唔知點樣去描述佢. 以我自己嘅睇法,就係香港其實喺文化底色係慢慢改變緊, 或者對呢個文化底色嘅描述改變緊.

呢幾年臨近嗰種政治日子嘅時候政府同社會會點樣去宣傳或者引導大家去諗呢? 呢個應該喺呢度生活嘅人都唔會陌生, 就係去強調香港同中國大陸嘅連結. 礙於一國兩制框架嘅限制, 實際香港政府係唔會好集中去praise中國嘅政治體制, 亦都唔會隨便評價嘅. 喺構建所謂嘅“香港式愛國主義”方面, 香港政府嘅重心實際係喺文化上面, 即係強調香港文化同中國文化同源同根,相互依存. 就好似今年香港主權移交日, 新聞度可以睇到有好多人著所謂嘅中國式傳統服裝去慶祝呢個節日, 各區都掛滿紅旗. 政府嘗試喺借呢個節日去推動大家對於中國文化嘅自我認同, 令大家覺得自己喺中國文化嘅一份子, 從而達成愛中國呢個結果.

我想借呢件事去提出問題係: 其實香港嘅文化底色喺咩呢? 喺香港特區成立嘅紀念日, 其實我哋喺應該去宣揚何種文化呢?

講到香港嘅文化, 其實700萬人會有700萬種見解, 都係正常嘅. 可能有人會覺得香港文化就係獅子山文化嗰種搏盡無悔嘅精神, 可能有人會覺得香港文化喺香港電影, 係武打片, 係廣東話歌, 係mirror, 係張敬軒, 係香港大學, 係荷里活道, 係赤柱...都啱嘅, 呢啲都係香港文化嘅一個symbol, 係 what Hong Kong is. 而文化底色, 就應該係更加深入, 更加基礎嘅嘢, 係What makes Hong Kong Now. 而呢一點, 先係我會講香港文化同中國文化有別嘅地方.

香港嘅文化底色應該係由香港歷史真正開始嗰一刻嚟計嘅. 對於中國文化嘅開始, 可能係大家聽過嘅神話盤古開天, 或者係上古傳說嘅夏朝建立. 呢種開始奠定咗中國文化嘅底色, 呢啲故事都成為what makes China and Chinese is. 而香港歷史嘅開始, 喺由英國軍人喺水坑口街度立返英國旗鳴炮開始嘅. 呢種開始注定咗香港唔會係一個單一故事體系可以講得完嘅地方, 佢一定係會有本身住喺度嘅圍頭人, 水上人嘅故事, 會有廣州嚟嘅商人, 勞工嘅故事, 亦就係我哋話香港文化中“中國式”嘅方面; 同時都會有英國人, 英國帶過嚟嘅印度人, 其他歐洲人, 甚至乎喺澳門過嚟嘅葡國人, 土生葡人嘅故事, 呢個就係我哋話嘅香港“西洋式”嘅一面. 亦就係因為香港有咁樣嘅開始, 所以香港嘅文化底色由誕生之初就係一種混合嘅底色. 真正嘅中國文化其實喺英國劃定四環九約嗰陣時就已經喺慢慢淡咗, 實際係好少人會去探尋香港喺英國以前香港係點樣, 亦都好少人會想令香港真正“去殖民化”返到香港成為British Hong Kong以前嘅樣貌,話呢種文化係中國文化實際上係無視咗“外國”呢部分喺香港文化中嘅存在, 而否定香港文化中嘅中式(廣式)文化都係對於香港本土文化嘅唔尊重.

咁講完呢個文化底色, 其實強調同放大香港文化中嘅中國部分是否係合適嘅呢? 我哋都知呢種強調嘅終結目的係想令到香港人對中國嘅認同感加深. 但係先唔講放大香港文化中嘅中國文化部分,實際有啲時候佢哋所揀嘅中國文化部分係香港本身都冇嘅, 譬如話唐朝式嘅服裝. 用一種香港本身唔存在嘅象徵係難以令到香港人加深認同. 我本身唔反對宣揚香港文化中嘅中國部分嘅 我哋有國慶日喇, 有各種中國傳統文化日, 偏偏係香港特區成立呢日嚟宣揚中國文化, 會有一種用中國文化嚟等同香港文化嘅感覺, 首先咁樣其實係唔符合香港嘅文化底色, 變成一種脫離香港文化嘅慶祝, 呢種慶祝自然都唔會得多大部分人嘅關心. 作為一個香港本身嘅節日, 我哋應該喺呢一日慶祝, 宣傳嘅, 係政府所講嘅“講好香港故事”, 亦就係香港文化底色嘅故事, 呢啲故事包含我上面所講嘅歷史帶嚟嘅華洋交會, 香港本身值得慶祝嘅各種價值, 包含契約精神, 法治精神, 公民精神, 獅子山精神嘅多元精神, 令到香港喺日益緊張嘅地緣博弈中繼續平衡中國於世界, 喺危機中為香港創造機遇, 而唔係強調中國部分, 忽視香港文化嘅另一方面, 咁樣只會令到香港文化底色更加失去, 令到城市靈魂同城市機能更加暗淡.

年初我睇《燈火闌珊》嗰陣遇到導演謝票, 佢話每一個生活喺香港嘅人嘅生活體驗講出嚟就都係一個香港故事, 呢啲故事令到城市嘅文化更加精彩, 多元, 都係豐富香港文化嘅方式, 而呢種方式亦都唔會改變香港作為多元城市嘅文化底色. 我相信生活喺呢度, 無人係希望香港變成單一化嘅地方, 無人係希望香港失去佢嘅城市靈魂, 文化底色. 因為咁樣我哋更加要喺同香港本身有關嘅每一個節日去慶祝香港文化, 慶祝All that make Hong Kong is.