森林之約｜我同山林療癒嘅緣起(廣東話)

你聽過山林療癒未？佢同森林浴或者森林療癒又係咪一樣？

森林浴詞源於日本。二十世紀八十年代，日本政府發現都巿人隨時跳掣，但係只要行入森林同自然接觸，就會啹番晒。所以日本政府就發明呢個詞語去導班友仔走入森林。大約十年前，有人喺美國砌起呢個諗頭，創辦美國自然與森林療癒協會，去認証森林療癒嚮導。香港慈山寺希望透過寺內嘅安逸環境同祥和氛圍，比香港人有機會接觸森林療癒，於是就建立咗一個山林療癒活動。

慈山寺起好咗幾年，縱橫山野，望向八仙嶺，發雞盲都見到一尊白色觀音像楝响山下面，以前總係覺得好突兀。自從今年有緣走入慈山寺，行近睇真尐呢尊觀世音菩薩造像，就會感受到佢嘅慈悲祥和。上網挖多尐慈山寺嘅一切緣起，依家見到佢直頭好似太陽咁溫暖。同一幅風景，心念一轉，感受唔同晒。

因為關注慈山寺，𥄫到慈森.山林療癒呢個活動。報名難過搶購Mirror演唱會飛，或者搶BAYC NFT空投。事後得知總共八十萬個IP Address爭奪大約一千個參與機會，連主辦機構Server都跪咗近一粒鐘。玩唔到，反而睇到佢有一個山林療癒陪伴員嘅講座。橫掂都無野搞，又可以乘機入多次慈山寺參觀，心諗聽吓無壞，所以就報咗名。

究竟有乜體會，賣個關子，下回分解。