烏克蘭開戰：資訊揮手區
（唔係研究歐洲，亦唔識得變身做俄羅斯國際關係專家分析形勢。想睇分析，想討論烏克蘭戰爭對歐洲同台海局勢影響請移玉步）
首先我哋都要認清一個事實：當下我哋都只係用把口講吓，無論幾客觀冷靜做軍事分析定係精闢獨到的預測，或者對戰爭爆發的無力感，抒發兩句／pray for ukraine／拜登拜金北約無腦，都唔會影響到幾千公里外的戰場。
1. 連日喺discord追post不時會浮起的問題：當正式進入戰爭狀態，軍事行動密集，有啲嘢涉及國防安全好敏感，open source未必搵到，咁民間OSINT可以做幾多？定係有啲嘢只能依賴「官方」嘅消息渠道？呢個Gap又可以發生幾多嘢？
2. 2月23日，Discord個烏克蘭OSINT台全日出現嘅lead整體少咗，需要factcheck嘅軍車/公路片少咗，討論亦無前一日咁熱烈。同日焦點落喺歐美國家回應同實施制裁，煲吓水講吓北約有幾被動。事後諗返，其實呢個位係奇怪的，既然已經宣戰，如果哨兵話你聽on the ground無乜異動，咁可能計劃緊更大規模嘅移動啦。
3. 但如果轉台去睇aviation個channel，會見到啲飛機迷仍然好勤力用FR24 plot緊歐洲空域嘅活動。FYI好關心北約做過啲乜嘅人：2月22日最少有13架北約/瑞典／烏克蘭偵察機飛過白羅斯、烏克蘭、克里米亞、黑海空域；2月23日最少有23架偵察機出動，係一個月來最多。
4. 最CLS係見到Tweet，內容大約係話俄軍用嘅通訊衞星其實大家access到，Scan某幾個頻道係可以觀察佢哋軍事活動（吓？軍事機密喎，有冇咁兒戲？！），然後DC開始有人錄低通訊同翻譯俄軍下達指令要部隊去某個區域。當然呢啲可以係故意流出嘅心理戰術，吸引沉迷Factcheck嘅軍事迷或者情報部門工作嘅人，但有啲改變我對戰爭嘅認知。
5. FB真正開始多人講烏克蘭係自2月24日普京宣布展開「特別軍事行動」。各地broadcast新聞開始會直播戰事資訊，唔講遠，淨係講香港NOW新聞嘅Push，今朝11:20開始都有4條。基輔天光開始響防空警報，全日都有爆炸，機場頂咗一晝，下午已經落入俄軍控制。即使個戰場離自己好遠，其他國家睇直播嘅人都開始會有「打仗」嘅感覺。
6. 消息係傳快咗，但都亂咗好多。今日網上不時都會傳出有烏克蘭邊境有士兵陣亡，有城鎮被攻陷、甚至首都機場被控制，然後烏克蘭會否認。最具體例子係傳出俄軍登陸敖德薩海港嘅消息，又有空襲死咗18人。但啲OSINT livecam 影到嗰度只有商船，市內平靜。不過歐洲嘅大電視台都係照樣報（香港可能再慢幾拍所以連錯嘅消息都唔會見到）。
7. 所以開戰應該係更需要有意識要核實資訊的。Project Owl繼續喺全國公路livecam睇住俄軍調動，plot地圖反駁俄軍攻陷城市同主要軍事設施嘅消息，發現有啲只係俄羅斯吹水；FR24因為太多人mon而變得好慢，但都睇到多咗偵察機飛去波蘭上空。Bellingcat同CIR就繼續睇片做geolocation，紀錄空襲同埋部隊衝突消息嘅地點。
8. Discord個運作真係好嚴謹，開戰時就明白分門別類重要性：有【經核實】嘅新聞台、有處理消息嘅FC台、FC又分海陸空、有一堆直播link同埋OSINT工具俾人用、有吹水台。啲有admin成日會提大家喺新聞台講啲未FC嘅消息會俾人警告；如果啲人喺FC台貼圖唔擺link又會有人哦你兩句；仲有個台叫做hall of shame，專門舉報啲喺Twitter散播假消息嘅人。想喺FB同Twitter搵到呢種謹慎嘅氛圍，目前都係有啲難度。唔知呢啲係咪就係所謂Web2.0嘅問題？
9. 另一個我好有興趣嘅位係：由「消息」變成「新聞」，再影響輿論觀感，中間呢個gap可以發生幾多嘢呢？俄羅斯通訊局今日出咗個通告，下令全國媒體報導戰事必須用官方發布資料，否則會取締同罰款。拎個bot譯嗰段俄文，''we emphasize that it is Russian official information sources that have and distribute reliable and relevant information'' LOL
10. 信息戰聽得多，其實都發生喺我哋身邊。Language is information, information is power (Killing Eve S1E8, 2018)。你選擇咩資訊，就會影響到你諗/講/做嘅嘢。你唔選擇，自然就會有人幫你選擇。見到朋友轉發中國網上關於烏克蘭戰況的兩個熱門話題：一係收復台灣；二係買一個烏克蘭美女要花多少錢。大開眼界，好多嘢要學。
P.S. 所有喺香港經歷過2019嘅人都體會過，每日睇衝突直播係會有fatigue同secondary trauma。如果你有認識的朋友，或者知道朋友的朋友而家身處戰場，睇到新聞會份外擔憂。Discord有一個health-and-wellness channel，健康台就完全唔講新聞。適當時候take a break，搵朋友傾吓計，睇貓睇狗，亦係所有OSINT必須要知道的原則。