歹毒

其實，那一種算比較歹毒？

一般市民用盡所有法律以內容許的方法，希望逼使政府聆聽民意。

還是一個政府用盡所有資源（主要是市民的錢），一切法律程序，和一切歪理，去濫捕，濫告所謂反對派人士。

Photo by Samantha Sophia on Unsplash

昨日最深刻的一句話，是有記者慨嘆找不到人出來說兩句，因為有份量的人都已被捕！而其他人也自然情願少說少做，最後只剩下網台的主持或時事評論員說得最多，而心水清的，大概已留意到，很多這些評論員，人身早已不在香港。

官員出來講的理由，絕對是荒謬和全無邏輯。那個初選只能算是內部協調人選，不想太多人爭，互相𠝹票而削弱票數的力量，甚至建制派亦有類似初選。而之後正式選舉時，是一次公開而且有對手的競爭，不一定肯定贏。雖然泛民的目標是35+，但完全沒有把握可以實現，而且還要看功能組別那邊能否同樣達標，而這個功能組別就是當年精心設計下來，分組點票讓政府永遠有優勢，所以要攻下這些議席，其實有點痴心妄想。

不過，在區議會選舉大敗，令政府和建制派一朝被蛇咬，一切都變作杯弓蛇影。但政府始終是有權主導一切，唔比你入閘去選又得，等選完再DQ你都重得，再唔係斬腳趾避沙蟲，幹脆取消選舉我哋都咬佢唔入！咁幾時至有可能癱瘓政府呢？

而政府講話根據戴耀廷教授一篇《攬炒10部曲》文章為理據，其實都唔怕笑大人個口，因為要完成每一步，即係話，政府嘅反應亦跟足佢每一步嘅估計，英文所講嘅「It takes two to tango」，政府要做到成功的拍檔（partner)，大家合作無間先有機會去到終極攬炒，咁呢個拍擋咪係共犯？告唔告先？

而行政長官的行為和言論，有時都有可能犯國安法。例如參選時，响電視辯論中講，如果選民認為佢唔可適合做行政長官，佢會辭職。咁佢一辭職，群龍無首，會唔會癱瘓政府呢？但佢反口，賴死唔走，民望長期低迷，施政步步維艱，攪成今日呢個局面都係算癱瘓緊政府，佢係咪都要付啲責任呢？

最後講返這個初選，其實在我個人而言，跟去選最歡迎歌手相差無幾。我所做的就是投一票，選一個我希望在我選區代表泛民出戰的人，有些選區有六、七個人，雖然候選席位會有兩三席，但很明顯，我投的一票可能會落空，我心儀的人可能不入圍，她／他便不會在來屆立法會選舉出陣，對我來說，應該有一定的失望，如果選出來的更是自己沒好感的，到時正式選舉，可能要含淚投票，甚至棄權算了。而今日，政府竟然說我當日參與初選就是犯了國安法，要顛覆政府，你唔係有病都冇人信啦！政府還說暫時不追究有份參與人士，說是受誤導而做出犯罪行為，重好似皇恩浩蕩咁，你都好歹毒啫！