睇哂四集EVA新劇場版，幾失望

#下文含劇透

（不過全世界都睇咗啦，得我咁遲睇…）

最近見到太多網站講睇完四套Eva劇場版，點樣經歷十幾廿年好感動咁，搞到我呢個完全未睇新劇場版好似黎自另一個世界咁。話哂我都曾經係EVA迷，卒之喺朋友慫恿之下，subscribe咗Amazon Prime，睇返哂四集劇場版。老實講……都真係幾失望。

第一集，EVA最iconic嘅初號機對戰第三使徒，放棄咗用留白倒敘去凝造緊張懸念，改為一口氣直落，咁樣就變得太平實。黑夜中螢光綠嘅初號機好似好型，但實際上畫面嘅逼力大減。

第二集，明日香同真理嘅出現同路人甲無分别，完全唔知為乜。我明白後面仲有兩集，佢哋到時會有更重戲份，但呢集嘅戲份未免太可有可無吧？只有最後救凌波有啲睇頭，無他，因為凌波係頭兩集唯一喺劇情上有意義嘅女角色。

第三集同第四集，庵野秀明你JM9？EVA無雙呀？啲打鬥做得太大堆頭，以一敵萬，啲敵人好似紙公仔咁任射，誇張到一啲都唔好睇。要講以寡敵眾，舊劇場版二號機對量產型打得好睇好多，吓吓到肉。

第三、四集呢兩集個劇情又跳哂掣，夾硬搞到好宏大咁，又軍艦又宇宙戰艦又一大堆新EVA，又長髮凌波又爛衫明日香，觀眾service炒埋一碟，老老實實又係為咗出figure同模型鋪路。而且啲3D CG好唔自然，同其他手繪畫面格格不入，反而令我好難投入。

另外，唔知係 Amazon Prime 問題定係作品本身就係咁，劇場版啲暗位真係好黑。尤其係好多打鬥喺黑夜或暗處進行，有時都唔知打乜。上 Netflix 對比返電視版第一二話打第三使徒，光啲反而更有逼力。雖則話係夜晚，做動畫最緊要整體觀賞效果，無必要追求真實世界嘅光暗。

或者係電視版對我嘅印象太深，劇本都由頭到尾刨過幾次，所以太難接受新劇場版。當年好欣賞電視版動靜、鬆緊對比嘅鋪排，用反差黎凝造壓迫感，用定格映照出空洞。但劇場版可能受制於電影長度，好多野都太緊迫，無咗好多特色。

或者，歸根究底我都已經成為老屎忽，淨係掛住以前點點點。

BTW，Amazon Prime 嘅非常唔好用，同 Netflix 差太遠。Resume 頭幾秒無咗字幕，熄mon等幾秒先停，再開唔識自動play…… 而且個account同kindle app綁埋一齊，要睇Prime就要用international Amazon account，強制logout我個kindle app嘅日本Amazon account。真係好有衝動 Stop subscription & uninstall app，只不過有啲動畫&電影好似幾有趣，或者忍一忍睇埋先郁手。

原文連結死火手記