有少少搞笑：你搞唔搞笑啊？（幼稚園篇）

這篇為了保留小朋友說話，所以是廣東話口語，如果看不明白，請告訴我，我可以試加一篇「翻譯」版，但一定不夠原汁原味……謝謝。

我問小朋友：「你覺得自己搞唔搞笑啊？」

小朋友：「搞笑啊，不過唔係最搞笑囉，阿XXX同YYY就最搞笑！」
然後他頓一頓，頭微微向上昂，用手撥劉海（動作跟花輪同學一樣）：「咁我就係全班最靚仔嘞！」

他的班主任剛好經過：「你最靚仔？邊個講架？」
小朋友：「我媽咪，佢成日都話我好靚仔架！」（再花輪式撥頭髮）

我：「你講個笑話俾我聽丫！」
小朋友：「我細個果時賴屎啊！哈哈哈…」
我（陪笑） ：「咁你平時同同學講笑係咪都係講呢個架？」
小朋友：「唔係喎。」
我：「咁你講咩架？」
小朋友：「我細佬賴屎啊！哈哈哈……」

（食緊飯勿閱）

小朋友：「我講個笑話俾你聽吖！有個人佢痾屎，（哈哈哈），之後佢痾尿，（哈哈哈），之後佢又痾屎，（哈哈哈），又痾尿（哈哈哈）啲尿浸住啲屎，（哈哈哈），浸住啲屎喎（哈哈哈）！跟住佢見到前面有好多（哈哈哈）垃圾！跟住佢食垃圾（哈哈哈）！食佐好多垃圾！跟住佢變佐個超級肥仔（哈哈哈）！係咪好好笑呢！哈哈哈哈哈哈……」

雖然我知道呢個年紀既小朋友係好鐘意呢種笑話，但係第一次見到一個小朋友講一個咁長既笑話俾我聽，而且仲笑到收唔到聲，我真係笑佐出嚟。（我認我笑點低……）

和小朋友玩「呢幅圖畫搞唔搞笑」遊戲時，他們經常會問其他問題，例如：「啲相喺邊度影架？係咪你影架？」等等。
為免影響小朋友的答題，我一概回應：「唔，我唔知喎，咁幅相搞唔搞笑啊？」

其中一個小朋友不滿地說：「乜你乜都唔知架！！」

昨天，我跟那小朋友玩另一個遊戲，我寫下他的名字，小朋友驚訝道：「謝老師！點解你識寫我個名架！」
我：「梗係識啦……」
小朋友：「我以為你乜都唔識架喎……」

我：「如果老師同一個小朋友講『你好搞笑』，你覺得係稱讚佢定鬧佢啊？」
小朋友：「唔……稱讚！」
我：「咁你嗰班入面邊個最搞笑啊？」
小朋友：「我！」
我：「點解既？」
小朋友：「因為我鐘意稱讚自己囉！」

我：「你講個笑話俾我聽丫！」
小男孩：「我唔講得俾你聽㗎喎⋯⋯淨係可以講俾男仔聽咋。」
我 ：「唔⋯⋯咁有無啲笑話可以講俾女仔聽㗎？」
小男孩：「唔⋯⋯稔唔到啊。」
我：「咁如果你想引玲玲（佢嘅女朋友仔）笑，你會講乜嘢啊？」

小男孩想「唔⋯⋯」
然後靈光一閃：「你好靚啊！！」