呢個世界上，有一種幸福，叫李孝利。

喺好多人眼中，李孝利一直都係個幸福人。廿三歲脫離Fin.K.L單飛，第一首主打歌《10 Minutes》經已令佢躋身天王巨星之列。出道廿一年，如果話，Fin.K.L係現代韓國女團嘅始祖的話，咁李孝利就係現代韓國女歌星嘅必然效法對象。

但我覺得，孝利（我比較鍾意用韓式嘅稱呼）真正嘅幸福，係李尚順嘅出現。

喺2011年年尾，孝利公開同音樂人李尚順嘅戀情，2013年更公佈婚訊。當時可以用「舉國震驚」嚟形容 — 因為出道咁多年，孝利雖然偶有緋聞，但從來未公開過任何男女關係。所以消息一出，李尚順迅即成為茶餘飯後嘅話題 — 比較似攻擊對象多啲，主要因為尚順其貌不揚、事業平平、亦唔係財閥或者「富二代」，大家都覺得佢高攀孝利，尚順被攻擊得體無完膚。

孝利同尚順婚後移居濟州，與介紹佢哋認識嘅「媒人」、唱作歌手張弼順（IU嘅偶像）為鄰，對娛樂圈冇半點留戀，過咗四年隱退嘅生活。直到2017年，孝利玩票式復出，推出《Black》專輯、並接拍JTBC綜藝節目《孝利家民泊》。

《孝利家民泊》係個reality show，孝利夫婦喺十四日內，將佢哋屋企變為民宿招待客人。兩季嘅節目，孝利夫婦總共招待咗七十幾位旅客。喺呢個節目播出後，孝利嘅婚後生活亦都首次曝光。節目出街後，李尚順隨即搖身一變、成為「國民老公」、「超越財閥嘅能力者」。

孝利曾經講過，「我只係有錢，但哥哥（尚順）不食人間煙火。」喺《民泊》裏面嘅尚順，每日由朝早七點幾開始，就打理家頭細務、煮三餐、買餸、洗衫，一直做到晚上十點半熄燈為止；目的好簡單，就係唔想孝利因為呢個節目做得太辛苦。

尚順為人木納寡言（經常喺客人面前dead air），喺屋內嘅幾十部遙控鏡頭下，佢大部分時間都係默默地做、甚少出聲。但佢嘅暖男本色就盡顯無遺 — 佢會因為擔心趕早機嘅客人call唔到的士、零晨五點半起身親自揸車送人出機場，亦會喺暴雪警報其間出去拯救被雪圍困、「煽軚」開唔到車嘅客人。

至於尚順點樣對孝利無微不至，基本上兩季共三十集嘅《民泊》全部都係，大家有興趣搵嚟睇就得，唔須要舉例。IU就曾經好羨慕咁對孝利講：「姐姐，尚順哥哥真係好愛你。」不過，有兩個我覺得好特別嘅例子，可以同大家分享一下：

某日，民宿員工IU問孝利，洗衣液放喺邊？孝利答：我唔知，洗衫從來都係哥哥做（當時佢已經喺嗰間屋住咗四年多）。喺第二季《民泊》，尚順因為做嘢嘅關係，要去首爾過夜。晚上佢打電話返民宿，臨時員工朴寶劍接電話。當寶劍同尚順講句好普通嘅「姐姐休息緊」，尚順已經即時知道：孝利病咗。從一句簡單嘅說話就可以知道老婆嘅實況，呢個男人嘅細心實在超乎想像。

孝利亦非常清楚自己嘅幸福，所以好多時都有意無意「放閃」。喺《Camping Club》，佢就經常喺佢班Fin.K.L姊妹面前晒幸福，甚至令玉珠鉉「抗議」：「哥哥你收線啦，好難頂呀。」孝利亦都向IU親口證實，當初佢同尚順拍拖，就係呢個男人令佢戒酒同戒斷購物狂嘅病態。我甚至相信，近年孝利嘅樸素同喜歡素顏出鏡，某程度上都係佢嘅「哥哥」對佢嘅影響，令佢改變。

有好多人，仍然會不斷為自己或者身邊另一半，設下好多條件，希望符合呢啲條件之後，自己就會幸福。李孝利嘅case就正好話俾大家聽，只要簡簡單單、搵到個真正愛你嘅人，其實已經可以幸福滿瀉。

本週文章：

中環遊戲（39）Protégé

……呢個時候，房外邊傳出一聲巨響，係掟電話聲；然後再跟尾一聲「妖！」，係Winnie。佢喺佢房掟電話同妖人，我喺呢邊房閂埋門都聽到，十號颶風訊號現正生效……

中環遊戲（40）呃Like

……PR絕對係開會多過共產黨嘅行業。Pitching=開會、Presentation=開會、Operation=開會、傾proposal=開會、brainstorming=開會、debriefing=開會、個客彈鐘=開會、內會=開會、例會=開會；總之好似唔開過會就唔識做嘢咁……

隨想（2019/KW45）鶳之終章

……踏入十一月，時代革命將會進入第五個月。自六一二開始，我一直都有個問題，擺咗喺個心裏面、唔敢問。點解唔敢？因素好複雜，我唔想鳩噏咁多，總之就唔敢……

《中環遊戲》係我第一輯完全放喺Medium收費牆之外嘅小說，供讀者文友免費閱讀。作為一個全職作者，我喺寫作上面嘅收入，就只靠LikeCoin嚟支持。所以，希望各位「讚賞公民」能夠喺上面嘅LikeCoin widget拍滿五拍，等我可以維持收入。未加入成為「讚賞公民」嘅朋友，可以喺呢度加入：https://liker.land/Civic?from=herrfung 。

另外，如果你加入得夠早夠快的話，我仲會私人回返第一個月嘅月費、港幣卅八蚊俾你。只要你喺加入之後，去呢度：https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限，先到先得，送完即止。

P.S.: 最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。