我在Matters上的第二個帳號

我記得Matters帳號既第一次發文，好似都會俾 @新手 點名，等其他人容易啲知道有新人加入。其實真係諗得太多，都唔一定會有人走黎講歡迎。不過據我第一個帳號既經驗，呢個社區既人都真係幾nice，某幾位user更係會主動留意有咩新人。特登開多一張帳號，係想區分一下用途，之前果個係有目的咁樣去諗下點樣賺到LIKE，就算寫真野，都仲係要有啲改編。呢個帳號，或者都可以係自己對自己不滿下的產物。想真一啲咁去對呢個時期既自己做個紀錄，始終一個放係區塊鏈上的blog，好似話係要所有節點一齊死曬先會真係死，我估應該啲紀錄應該可以保存得耐啲，至少到我死左如果一對囝囡想搵返啲資料黎述史，應該都容易少少。

打打下又離左題，其實前面果段係想話我有少少驚，發布完之後有人留言話歡迎來到馬特市。所以就先聲明一下自己其實唔係完全新既人。咁點解唔直接講埋第一個acc出黎啦？其實我都唔知點解⋯

可能係覺得冇咩必要做到呢一步，好似會有啲違反原先分開既目的。不過坦白講，其實我覺得有幾位敏銳既user好快就會知道我係邊個，然後如果佢地直接私我，其實我都會認，甚至心底裡面會有種爽YY。不過我又會諗，如果佢地搞錯，係度私其他唔關事既人黎問，咁可能又會對其他人造成一啲不便，唯有阿Q一啲當係幫呢個帳號或者呢個猜猜我是誰既遊戲做宣傳。

唉⋯其實真係諗得太多，真係痴鬼線，段intro長到呢。老婆成日叫我講重點，對我黎講，其實上面整個思考過程都係重點。用做質性研究既角度去睇，呢個人點樣表達某個主題，其實都係一種analysis既方法，去反映呢個受訪者既value。

等等！問題係宜家邊有人訪問緊你姐？仲要諗埋啲咩死後述志，真係好顛。

本身諗住返工段路可以打曬，點知成程因為想帶返個頭盔就一路離題。原本想講既野，一隻字都冇打過。唯有lunch time再續⋯