澳職聯衝刺你哋點睇

澳職聯衝刺你哋點睇

足球 花絮2020-03-20 15:59

全球新冠疫情嚴峻性持續緊張，各個大洲嘅主流賽事停得七七八八，就連被譽為「戰鬥民族」嘅俄羅斯都喺病毒威迫之下收起所有國際體育賽事，隨著日前阿根廷同土耳其方面都決定「上船」，咁我哋究竟仲有乜可以睇？睇嚟凈低係得向來熱度唔算太大嘅澳職聯陪伴大家。

雖然話澳職聯熱度偏淡，但只不過係相對於歐洲五大聯賽、中超、日職聯等熱門賽事喈，其實澳彩一向都有通過賽前簡報同花絮新聞為球迷送上相關分析，而且每年嘅亞冠盃都有佢哋嘅身影，觀眾應該唔會太陌生，悉尼FC、墨爾本城、墨爾本勝利等等都係相當熟悉嘅名字。

唔經唔覺，澳職聯又嚟到每季衝刺階段，由於暫時唔洗分心踢亞冠，三支有份參賽隊伍悉尼FC、珀斯光輝同墨爾本勝利預計將會全力爭取嚟緊每一場勝利。或者係因為新軍西部聯嘅加入，澳職聯今季賽制同上季相比又有變化，常規賽第一先有份直接進入亞冠分組賽嘅資格 (上季頭兩名都有)，第二名就要踢外圍賽(上季第三可以參加外圍賽)；第七至九名都有獎勵，就係同成績更好嘅前六名一樣可以喺下一屆澳洲足總盃從三十二強踢起，至於季後賽方面就基本冇變。

不妨深入觀察現時澳職聯形勢，如無意外悉尼FC將會時隔一個賽季再次以常規賽第一嘅身份晉級季後賽去爭奪總冠軍，佢哋目前以足足10分優勢領跑，並且踢少過排緊第二嘅墨爾本城2場，唔洗講都估到優勢何其大。而墨爾本城睇落有壓力，皆因威靈頓鳳凰今季強勢崛起，後者少賽1場甚至有可能跳過季後賽第一圈；好彩，墨爾本城唔洗太擔心會被搶走下屆亞冠外圍賽資格，事關威靈頓鳳凰所在地係紐西蘭唔屬於亞足聯，根據規定冇份踢亞冠。而第三名之後嘅布里斯本獅吼同珀斯光輝成季嚟睇唔夠墨爾本城穩定，五六分差距唔係想追就追到。至於下游隊列形勢就唔明朗，西部聯、阿德萊德聯同西悉尼流浪者同爭一個季後賽名額，佢哋宜家戰績差唔多，嚟緊仲有幾輪確實存在好大變數，甚至紐卡素噴射機同今季遭遇滑鐵盧嘅墨爾本勝利都存在希望。最清晰始終都係中岸水手，十有八九擺脫唔到連續3季副班長收官嘅尷尬。

職業足球永遠離唔開成王敗寇嘅話題，而今季澳職聯爭冠懸念剩低幾多？悉尼FC前19場聯賽踢出均場入球超過2個同時失球低於1個成績，兩項數據都係聯賽唯一，四年三冠指日可待(2017同2019年皆摘桂)。陣容方面，除咗名氣較大嘅神射手拿方祖身價過百萬歐元(根據全市場評價)，其他幾位江湖資歷較深嘅猛將都並非價廉，可以感受到整體凝聚力十足。要問邊個係最大對手嘅話，相信非墨爾本城莫屬，聯賽排緊第二、進攻水準一流，最大優勢係隊員身價總值鶴立雞群(幾乎係悉尼FC兩倍)，班底足夠雄厚。唔知各位觀眾，你哋點睇咧？

FB https://www.facebook.com/mpluslivetv/

IG https://www.instagram.com/mplus_livemacau/

Linkedin https://www.linkedin.com/company/m-plus-sports-media-company-limited/

The story is / may be provided by M Plus partner and other third parties.

#mpluslivetv #mpluslive #足球直播 #籃球直播 #安播直播 #籃球 #NBA