My little detour - 《遊客casa比例最多的城巿；我的龍蝦餐》

2022 年 2 月 18 日

18 Jun 2019, tue (Day 20 晴 Camaguey -> Trinidad, Cuba)

係車瞓下醒下，晨早七點幾已經到左千里達。唔知點解硬係覺得千里達呢個名好型，呢到係一個幾遊客的城巿，唔睇旅遊資料，單是我未落車已經見到勁多for遊客租的casa已經知道。當落左車孭埋行李行出巴士站，我已經比無數咁多個host圍住，你話丫，如果我係Holguin有呢個待遇，我當時使鬼咁傍徨。佢地係咁比相我睇，由介紹又盛，最後我揀左一間睇落無咁舊式的問價， 10cuc比我想像中平喎，但其實咁多間casa咁少客，應該可以再減，我就拋出住三晚呢個極大的利誘，最後佢落左叠（定其實我落左叠），8cuc一晚唔包早餐，然而其實佢10cuc係包早餐的。不過唔緊要啦，佢的早餐都係omlette, coffee, juice同包，我出去用幾十peso已經有找。佢仲話可以5cuc租單車喎，其實呢到咁細，租單車去海灘都唔錯，不過咁真係會超黑架喎，我諗諗佢先🤣

時間尚早，我梗係沖返個涼補補眠先，我琴晚無咩瞓過咋。到差不多十二點我出去周圍行，呢到真係唔大，我亦好放心自己唔用map周圍行。基於所謂centro賣的野都比平時貴好多，我梗係行遠d啦。行行下見到有間屋門口放左水果，我本來以為係木瓜，因為其實size唔細，點知佢係芒果嚟架😱， 5cup咋我當然要買返個啦。

但水果滿足唔到我，我要買返的咸野食，見到有個檔仔賣小食，我要左個sausage bread, 檔主仲有幫我夾熱佢架，而條腸就係我地平時食開的㕑師腸喇 ( 6cup)。食嘢梗係要嘢飲送，但點解...我又點左芒果汁 (3 cup)，今次真係濕熱之旅。跟手我又去左超巿買左枝水 (0.7 cuc)就返去，因為實在太重了。

由於成身痴lup lup, 都廢事坐係床，所以坐左係房外的枱椅到，其實幾寫意。咁當然之後第一件事就係隊左我個如木瓜般大的芒果啦，真係超大，雖然好食，但我食完覺得好飽，同埋呢個旅程的芒果quota已滿，有緣再會。之後又係到研究下個map, 然後睡魔急call, 照開左次氣瞓陣， lup就lup啦！

好喇，我期待已久的節目到了，就係去嗰間Oshun & Yemeya呢間餐廳食抵食龍蝦，人地餐廳食龍蝦一般都最少10cuc up, 但呢間有的龍蝦菜式6.5cuc已有，。為補祝我嘅生日，我點左一杯pina colada (即係菠蘿椰子cocktail同埋Brochetas yeye , 連貼士合共10cuc), 丫，係我個樣唔飲得定咩，佢主動問我係咪唔加rum, 我諗諗下都係嘅，上次杯mojito我飲完真係好wing, 唔加就唔加啦。試完覺得杯嘢對我嚟講係太甜，但名物嘛，試下無妨。之後上garlic bread,超好食呀！呢刻我先發現原來我嗰個係set, 包多士，菜沙律同主菜仲有飯，咁真係好抵食喎。而個龍蝦同青椒配搭係佢燒緊時已香到不得了，上枱時真係好想快的食...可惜，勁多烏蠅😭 媽，我唔濟呀，搞到我無得慢慢嘆，為左趕走阿烏蠅群，我已一路食一路撥，撥到我覺得好煩，於是已極快速度完成，好唔開心呀，其實係好食同彈牙架，龍蝦同蝦的size亦不小，我嬲左的烏蠅呀😡

可能太耐無食過咁大份正餐，又加上極速完成，真係飽到一個點。見都未夠六點，於是又周圍行。係喎，呢到有火車去睇蔗糖喎，雖然無諗住去，但都八下係邊先。由於maps me 無mark到呢個點 - Terminal de Ferrocarril, 我唯有問下啦。個個方向都有的唔一樣，越行越outskirt時仲見的細路係到玩，突然聽到重物跌落地聲，頂，好玩唔玩玩掉石仔，我真係行慢一步就中呀痴線！咁當然好彩無中，繼續行繼續問，終於有的似樣，個叔叔話行前7個街口，再向右行三個街口，終於比我見到條路軌，但借問聲邊忽買飛架呢？唔理了，我只係嚟八，又唔係真搭。但我都有打算求真嘅，咪沿路軌行囉，喂，比我見到一卡車廂嚟緊喎。嘩，係咪就係呢架？但呢架車唔靚嘅，唔坐了。而同時又比我發現左去Boca的路口係嗰到， hm...咁我應該都真係租單車了明天。