返新工、hea遊佛光山，重新適應的九月上半

身邊坐了一位好像高中或大學的女生，白Nike波鞋，墨藍色鬆身長褲，白短上衣，伸懶腰時會稍微露出後腰。整個早上她好像很不耐煩似的，一時滑手機，一時騷癢，一時用髮捲捲頭髮。上次開編務會議的學生編輯也是一邊開會，一邊拿髮捲捲頭髮，大叔我真的想不懂為甚麼⋯⋯

最近一個月的假期都持續着早上散步後去圖書館工作到中午，吃點東西，出門閒逛，晚飯後再到圖書館看看動畫，《夜櫻家大作戰》變了今季精神支柱，全家人的工作細胞超強，故事簡單溫馨，無腦服用剛好。

上半月的工作進度緩慢，因為居處沒有網絡，只好把圖片airdrop到ipad再去圖書館upload……都OK慢。再忍耐兩個月吧，應該會好轉的。唯有保持信心。我已經比很多人幸運，依只剩係經濟未完善，其他都處理到了。

登佛光山再殺落屏東

上上星期搵咗日去佛光山，出門前收到好爺電話，佢都想去。我第一個反應係：

吓？你都唔入廟，去嚟做乜？

結果用咗20分鐘傾行程，其實都唔係傾行程，係聽佢解釋點解要去。唔打緊，一趟很好的短程小旅行，遊記都寫好了，差啲相未upload，要啲時間。今次剩係寫點樣影相好睇，啲歷史嘢宗教嘢，無乜流量，自己睇完開心就算。

之後坐好爺車去咗勝利星村，繼續眷村考察。去過咁多條，呢一條係最有潛力發展成為景點。講開又講，差不多係時候完成南部mini tour行程。呢條應該會輕鬆啲，對荷包而言，因為有公共交通。

本來計劃好每星期出去一次，點知持續落雨。除咗颱風，台灣好少持續落超過兩日既雨，通常都落下停下。趁未有job仲算得閒，心郁郁想約model影相，但除咗做義工，我未試過約互惠，係咪要突破一下？

柯P傳奇落幕？

上半月台灣最大新聞莫過於「北檢約談柯P」，柯P者前台北巿巿長也。這單新聞是記憶中阿扁之後最大單的涉貪新聞。媒體報導有幾則很吸引我，〈正妹上台晶晶體力挺．柯小草茹素祈福、柯子吃牛排〉。喜歡這種天塌下來而色不變。

推薦正經的，日本資深記者矢板明夫提出兩點，一點是巿長能操控的金權力是否過大，二是政黨公然號召群眾挑戰司法。他的觀察一下子把台灣的政治和民眾概念點出來，台灣人普遍對司法的認可，在已發展國家之中偏低。

政治人物公然違法，也不是甚麼新鮮事情。套句舊時老師的講法︰人人都這樣做，所以他也這樣做，前面的人沒事，他出事了。這也是一種很日常「為甚麼他可以我不行」感受先行的狀況。

柯P會不會被定罪，言之尚早，我也不太關心。人們的反應我比較感興趣，因為我身邊很多人還是支持他，畢竟懶得去關心其他政治人物。如同直到現在依然很多人認為阿扁是無辜的。我覺得這種活生生的人們的反應，比起教科書上寫的東西有趣多了，他們認知的事實跟我們認真的不一樣。

買書

悠閒地在高雄遠百誠品看書，逛着逛着，好多書想買。數一數，前年和舊年只買了不到五本書，非常可怕的數字，恆常每個月買三本。所以我選擇回台灣，沒有博客來我會撐不住。

以前和書店同事做過實驗，一日內行遍深圳+廣州書城，看在哪一間買得最多。實驗證實書店陳列、選品是真的有差。「你有冇係其他鋪見到呢啲嘢呀？」我們那天買了一堆之後，總結天河書城最對我們胃口。

這些年逛實體書店都沒有購買意慾，唯獨敦南誠品還會留連往返思考要買哪一本才好。來到高雄這邊，難得坐下來看書(無得上網哭)，看完想買。我好想帶舊同事拉打過來看一下，她當年在書店就是想搞動漫區，結果被店長駁回，批評她品位不夠。這裡的陳列，將近2/3一間書店的量呢。而且選品緊貼當季動畫，《我推》、《藥師少女》均在當眼位。

今個月買了羅冠聰的書《時代推著我們前行：羅冠聰的香港備忘錄》，簽名版，未開封。以及加山傳播的《香港甚好的片刻︰加山傳播專訪合輯》。後者斷斷續續在讀，以專訪而言進步空間頗大，感覺是亂世中的受訪者啐語。看來是各種因素集合的成品結果，能想像訪問當時兵荒馬亂，出稿當下也是傖促。既然出過，就不太好大幅修改，只好用後記補完。我是視作史料收集。

這些書也算是一期一會，今年很罕有地，網媒好像互相溝通過，不約而同在重要日子PO「當年今日」。再過幾年就沒人記得了，先backup。

新工作

好采係經歷咗一年地獄之後，今次呢份新工睇嚟係正常工。終於無人一入職就問我有無女朋友、有無兄弟姐妹屋企人幾多歲等等等等。大家都好忙，一間好專心工作既公司。

暫時適應良好，因為我都係呢種人，唔太鐘意理同事既事。同事無必要做朋友，如果真係FD到，自己會放工後約食飯搵話題。都係一期一會，今期FD，轉咗工無話題就無聯絡，大部份都係。新公司準時出糧，一個月唔洗打去勞動部我就覺得感恩了。

成功追到舊公司出埋8月既糧，了結咗一件心事。咁岩舊公司一位資深同事話我知，佢俾上手老細炒，傾咗兩句就無再覆message。原因未知，不過我都幾替佢開心，因為佢有少少拖住拖住，唔想走。祝佢好運啦。我都仲唸緊，點樣組織呢一年既工作體驗，係咪好假咁，借用啲社會科學令自己睇落去中立啲。不過其實都好難中立。

好多年前聽一位業界前輩講座，佢形容︰「一個無故事的社會是很公平、很大同，人人和樂。你們覺得香港是很公平的社會嗎？怎麼會沒有故事。」不知是性格關係抑或我融入不了這個社會，我覺得願意認真討論的人很少，即使是記者、NGO高層，演講或發表時咪講吓囉，平時都唔太唸。

又唔知講咗去邊。有樣嘢我覺得台灣比香港好，收工就係收工。我啦，唔敢講其他人。以前係HK收工仲唸住返工嘢。可能因為我一路做自己鐘意既工作，好緊張好上心。返工砌稿，放工睇書，星期六PT校稿，星期日睇場地、行書局。

依家唸下點plan自己tour，下個月砌咩模型。公司明文規定(但不強制)休例假日唔能夠line同事講公事，好有型。

同SARS比？

近嚟大家都話香港經濟差，銀行貸款按歇剩係批比公務員同老師。有人就話點解都差唔過2003年，好多人揸住層數變負資產，又燒炭自殺又剩。我唔明點解要同SARS比，咁無變負資產原因好多，2003年好多人炒樓，手頭上有幾層樓。依家既人可能根本就唔夠錢買樓，而且本來有樓既賣曬走咗都唔出奇。

北上消費又係神奇。2003年之前，作為一個大西北居民，我同啲同學返深圳多過出旺角。好記得個時香港打個邊爐，98蚊任食。返深圳38蚊唔任食都食唔曬。我有個同事仲好笑，住華富邨，2018年我哋帶佢上深圳，佢好似打通咗任督二脈咁，返深圳買無印良品，同埋一大堆海底撈即食邊爐。唔知係咪佢推薦既關係，華富某斜路停車場對面間雜貨店(好似係華潤？)，海底撈即食邊爐係堆到1.5米高，佢一口氣就買十盒送比同事做新年禮物。

2000年前後，已經好多人返深圳同碧桂園買樓。叔父個輩娶個四川或北方姑娘，香港生仔，個仔大咗就香港讀書。過境學童咪就係咁嚟。2005年北部啲中學老師因為收生不足，返大陸搵學生。嚟到2024年無啦啦吹奏北上消費，仲要唔係官方，係民間媒體……我唔係好唸得明前因後果。

出機車？

隔離妹妹去食飯，望一望原來已經一點。今日午餐都係去超商解決，唔洗比現金，可以碌卡嘛。6月開始差不多都係出糧前10日就一餐比現金，一餐碌卡。之前嚴重到正職拖糧，接job又拖數，唔夠錢搭車返工，一日催老細三次佢先唔服氣過數(距離發薪遅咗18日)。星座話今個月會好轉，希望快啲啦，覆咗半日客，希望快啲有確實的回音啦，如果唔係又係百科全書，幫個客上半日格價堂。

仲煩惱緊開飯之際，朋友們不約而同地問我幾時出機車，問心，我麻麻。依家我用399 全月通響高雄趴趴走，唔洗計住計住，勁爽。個APP幾先進，可以指定日期，例如星期六買，星期一生效。唯一缺點係買完後再去捷運站過卡生效，但捷運站又無賣。

高雄交通好過台中很多，至少每個巴士站上面，寫既係每班車到達該站既時間，而唔係「發車時間」。台中張Tpass仲要貴100蚊。工作地方OK既，但去唔到啲咩景點，連商場都唔就腳。由高鐵站去大遠百既公車一個鐘一班。大遠百喎！點講呢，即係沙田既新城巿、大埔超級城、大馬Aeon。通常搭捷運到巿政府，再行十分鐘過去。高雄大遠百剛好係捷運站樓上，方便N倍。

公車、輕軌都去到景點。佛光山搭公車去到，呢兩個星期本來仲打算去一個秘境，可惜一嚟落雨，二嚟影完日落，尾班車就過咗。可能再等冬天先，日落早啲，但係就無咁壯觀。台中最出名既高美濕地，平假日公車得四班，全日四班……稍為叫得出名咩后豐鐵馬道，東勢林場，要開車去。都無既，根本個個都至起馬有一部機車。

我依家電話仲用緊預付卡，無簽約。最初因為居留證上台簽約要比押金2000。電訊公司已經改善咗，舊時需要找擔保人才可以辦電話號碼。不簽約係一種不安狀態。其實預付卡係平好多，台灣打電話係逐秒收費，仲分網內網外，似早年香港手提電話岩岩流行個時。依家九成九都係打line，我之前home office，連wifi，300 NTD 電話費用兩個月。

講返機車話題，一嚟我唔想擁有一舊嘢，又唔係成日用。二嚟，如果真係要用，去租就算。租就一定貴過自己擁有，不過我又唔會日日出車，係去玩至會唸。平日返工放工咪公共交通，仲咁好精神揸車咩。

同埋，重點中既重點係︰搵車位會搵到要睇精神科。無謂多舊魚。

每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】