鬖絔睩拾｜緊箍咒怨

2022／二七零　

又嚟。我都知冇咁好死㗎啦，但冇諗過會咁癲。

呢頭放寬邊檢，係因為政府認為疫情唔再嚴重（以病毒為決定因素），斷估唔會係因為要吸引外資（以經濟為主要決定因素）而做呱。解放唔夠兩日，就唱返一下反調，打亂唔少喜獲解放嘅人民為嚟緊生活同旅遊嘅計畫。今日要講嘅，係我呢個「豁免書持有者」對呢件事嘅即時反應。太貼身，所以唔想咬文逐粒字慢慢啄，而且用母語先能夠百分百傳遞情感。

唔討論咁做係咪變相強制打針，反正以理性邏輯討論得出咩結果都唔會影響到賽程或賽果。剛剛高興搶到機票就快要去旅行的話，點樣打得切針出入境？

受影響市民可以向邊個追討因為對「假文書」唔知情嘅相關嘅診金同埋因短期計畫延誤而造成嘅損失？

▋我把烏鴉嘴準過天氣報告

不過唔值得表揚，最好就收返我呢種無用嘅超能力，我寧願食多碗超力，唔該。No no no，唔係呢種預知能力無用，只係我不學無術，發揮唔到佢應有嘅小宇宙作用。我亦唔明點解每次都總有人會叫我𦧲口水再講過。我啲口水唔會夠把烏鴉嘴砌。今次兼夾燒埋自己嗰疊𠻹你話死唔死！嗱咩０＋３吖，未能成功吸引到外資嚟參加一堆 trade show 同 conference，就已經封多一度門。緊箍咒都冇咁彈出彈入，直情係緊箍咒怨啦唔係咩呀。

▋好懷疑「０＋３」暗藏玄機。打橫嚟睇，係三個英文字，ＯＴＷ。

‣ Over The Weekend - 係吖，幾日之嘛，又有新花臣。
‣ OTherWise，就係 Off The Wall - 思路同大部分普通人有返咁上下唔一樣，唔獨立但夠特行，先可以揸到枝雞毛嚟揈。
‣ 咁都有人會認為係 Out of This World，處理得好 awesome。我當然尊重唔同聲音，但係我聯想唔出 awesome，肚屙完又滲尿嘅「屙滲」我就見到，又聞到。

▋每一張發過嘅豁免書都肯肯定係偽造／不付實？

未有查証結果、未了解晒所有 diagnosis，就急不及待片面公布責任全在醫生一方。如果唔係醫管局畀出呢個結果，咁係邊個部門有足夠嘅醫學知識去判斷？再者，crosscheck 嘅、發放權力畀醫生嘅人員又有冇缺失？系統本身係咪有漏洞而導致被「濫用」？

再諗下，真正需要豁免嘅市民數字唔會變，不過敢／肯發豁免書嘅醫生愈嚟愈少，所以先會有一個醫生需要開咁多張嘅情況，簡單小學除法。政府叫我再搵醫生睇，咁麻煩畀啲最新嘅資料嚟好喎，咪齋吹。

有人因豁免唔到而被逼打疫苗，令自身本來已有嘅病情惡化的話，邊個負責？

既然認為疫情差唔多過，咁為乜要逼晒所有對疫苗有疑慮嘅市民去打？前後邏輯對唔上喎，一時吶喊無事啦 welcome to Hong Kong，擰轉背就去塞返實自己曾經為民設想而打開嘅豁免窿。行徑如 Uber、food cart、新田購物城、五十年不變同出一轍⋯⋯先咪理，引入咗搞咗先算，一鑊又一鑊杰出貢獻。

▋無論豁免書係咪虛假，都唔會影響持有者過去中招嘅機會。

病毒未識字，要確診都中咗啦。咁耐都冇中嘅，突然因為豁免係假嘅就會中？同白衣城管嘅邏輯思維的確難分高下。

▋呀係，我嘅即時感覺⋯⋯

差啲唔記得講。雖然其實都過咗半日，即時感覺都自我打磨過⋯⋯我好很覺得係畀人摷起我條走肉行屍出嚟鞭咁款。除咗閃電鞭，原來咁樣整瓜人再鞭下屍都可以自嗨一番？真久仰。