蕎麥蕎麥，係SOBA都叫蕎麥麵咩

日本人習慣大除夕食SOBA，叫做「年越しそば （Toshikoshi SOBA）」，意思係過年食嘅蕎麥麵，仲要一路睇紅白一路食。

習俗可以追溯到鎌倉時代。其中一個講法，喺熊本嘅博多地區，有寺院向窮人派發用蕎麥粉整嘅「蕎麥餅」（以九州食文化推測，我估可能係一種放湯食嘅糰子。冇考究過，等人插），食過嘅人成年有運行，第二年又番嚟食過，就係咁流傳。

不過，蕎麥呢種食物，喺江戶時代之前都唔普及，俾人當係下欄嘢，貴族係唔會食嘅。主要因為蕎麥殼好硬，貴族覺得唔係食物，真正「狗也不吃」，得番草根基層會用蕎麥去煮嘢。有考古證實，蕎麥呢種農作物，喺9千年前已經出現，蕎麥果然源遠流長。

幾時由蕎麥餅變成蕎麥麵？

有考察話係室町時代，喺鎌倉幕府滅亡後，開始有人切蕎麥粉糰做細長嘅條狀嚟煮，而以前嘅蕎麥餅，通常都係用手搣做一塊塊做糰子或者餅仔，由呢一點都睇得出日本食文化當中用刀嘅演變。

到咗江戶時代，又係由寺院帶動蕎麥文化，喺茶席間供應蕎麥麵，終於令蕎麥麵喺全日本流行。而當時嘅蕎麥麵係唔會放湯，而係蒸嚟食嘅，而且仲係100％蕎麥粉製，同現代流行溝麵粉令麵身挺啲好唔同。喺日本某啲地區，而家仍然仲有人整「十割蕎麥麵」，即係唔溝麵粉，十成都係用蕎麥粉打成嘅。

江戶時代唔止除夕食蕎麥麵，正月十四、節分（二月八日）都會食。而過年食蕎麥麵背後嘅意義，亦都由「好運」，演變成「長壽」，同中國人食長壽麵嘅概念都幾似。蕎麥（SOBA）嘅發音，同日文「側（SOBA）」一樣，寓意一家人齊齊整整。「蕎麦切り（SOBA KIRI）」即係切麵，有切走衰運嘅意思。仲有唔同地區都各自有唔同嘅「年越しそば文化」，上網睇吓資料都幾有趣。

そば=蕎麥麵？

講咁耐，終於入正題。

大家應該知道蕎麥麵同拉麵有咩分別？但係好多自稱日本達人、日語譯者都好似唔知，個個一睇到「そば」就一律譯做「蕎麥麵」。

工作關係，我都成日睇啲電視台播嘅日本飲食節目。尤記得J2播《百年食堂》，就成鳩日將啲「沖繩麵（沖縄そば，讀做SOKI SOBA）」譯做「沖繩蕎麥麵」。大佬呀，唔查資料都望吓畫面啦，用小麥整成黃色嘅麵都當係蕎麥麵，係咪色盲呀？「焼きそば」你又識譯做「炒麵」嘅。嬲到我SEND MAIL去「反映意見」（至鍾意SEND MAIL去電視台，履行觀眾智囊團嘅義務）。

「そば」呢個字，唔一定係指蕎麥麵，而係麵類嘅總稱，有時日本人話想食SOBA，係指想食麵類嘅嘢。無論係湯麵、撈麵、冷麵、炒麵，都可以總稱叫SOBA。

B級美食出晒名嘅「富士宮やきそば（富士宮炒麵）」、「沖縄そば（沖繩麵）」、東京嘅「油そば（用粗麵撈嘅麵）」、「混ぜそば（撈麵）」，「そば」代表嘅，都唔係蕎麥麵。

手痕上HKTVMALL望吓，Search「蕎麥麵」，就會見到一啲完全唔符合商品說明條例嘅產品。

以前接觸過一啲譯者（即係我發稿俾佢哋做），一個二個都係將「SOBA」COPY & PASTE做「蕎麥麵」俾我，Proofread到想死。

鬼叫香港人唔識食蕎麥麵咩。

同樣係麵類，喺香港，拉麵同蕎麥麵嘅待遇真係天淵之別。想喺香港食拉麵，幾乎總有一間拉麵店喺左近。但係蕎麥麵呢？一係自己買番嚟整（要過冷河㗎，我咁懶），再唔係出銅記SOGO地庫有一間食蕎麥麵。

作為一個麵控，我都好想蕎麥麵喺香港有更加多人了解。

成日話食拉麵好肥唔健康，最衰係個湯底啦，豬骨雞骨魚骨，配料又一定有叉燒有肉（推介大家睇最近77台播嘅《勁食拉麵大對戰》，介紹東京好味拉麵。我譯+MyVoice。一路做一路餓…）。

而蕎麥麵一般點麵汁（「蕎麦汁（そばつゆ）」），已經冇咁油膩，而放湯嘅話都係清湯，配料就通常係「藥味」，即係葱、紫菜碎、WASABI之類，加塊腐皮，富貴啲嘅會配天婦羅。食蕎麥麵加肉？好唔夾囉。

蕎麥呢種植物磨成粉之後，含蛋白質、維他命B，最重要係「蘆丁」呢種成份，可以促進血液循環同新陳代謝，清除活性氧。即係點？簡單講，即係健康啲。日本有研究話，有長期食蕎麥麵習慣嘅地區，人均壽命係比較長，名副其實係長壽麵，又有人叫做老人麵，至於啲肥淋淋嘅拉麵，食少啲囉（咁又難啲），想瘦身的話，食蕎麥麵，點都好過食拉麵嘅。食拉麵預咗肥，怕肥唔好食。

我喺日本留學嗰陣，至鍾意單拖去「企喺度食麵（立ち食い蕎麦）」，又平又快靚正，真正係平民美食。當然，貴價蕎麥麵真係可以好貴，師傅打麵好辛苦㗎。

睇到呢度，肚餓未？

餓嘅咪食麵囉。我去煮個麵先。