改變，由take ownership開始

近期工作關係上咗個關於take ownership嘅工作坊，內容大致係無論係咩崗位、咩層級都好，都可以嘗試主導進程，由一個等上司發號施令嘅角色，轉變為更加主動咁去處理工作嘅角色。就令我聯想到好耐之前寫過，對何桂藍獄中手記【仲有咩可以做 就係唔好再等人話你知有咩可以做】嘅反思。

咩叫take ownership？好多時當我哋做嘢遇到唔清晰或困難嘅地方，都會將個波拋返比上頭，等候發落。但我哋都可以用另一種做法，唔需要好似一片空白咁要等人點醒，而係提出一啲可行嘅做法、下一步可以做啲乜，再尋求其他持份者嘅首肯。係華人社會嘅工作文化入面，咁做可能有風險，未必適合每個人嘅職場。

但其實take ownership都可以應用係日常生活，甚至對於長久以來接受馴化、奴化教育嘅我哋嚟講，可能係必須要培養嘅思維同行動模式。例如對自己嘅錢要take ownership，投資係符合價值觀嘅地方，而唔係亂咁洗或放喺銀行發霉；對個人發展要take ownership，花費時間去培育自己，而唔係停滯不前。對應返何桂藍篇文，就係唔再等人教、等人話要做啲乜，而係從日常生活上觀察同分析反思可以做啲乜。諗返起呢篇文，令我對過去一年嘅社會參與同行動有好大反思。

係Matters上潛水嘅呢一年入面，我不斷燃燒自己嘅時間同金錢去幫人。唔係因為我特別有能力或偉大，而係覺得點做都做得唔夠多，當然呢種「倖存者內疚」係另一個我要處理嘅問題，在此不贅。不過無論主導者嘅說詞係友善定粗魯都好，我都好清楚自己只係一個工具、一個手段，而係冇明確個人主張嘅情況下，我唔介意做一個工具人。

但係呢個過程入面，我慢慢開始發現，原來人哋定出嘅方向或agenda未必係我自己想跟從，原來人哋覺得我/任何一個人可以幫手嘅地方，同我擁有嘅長處或者經驗未必相符。朋友亦都點醒左我，其實做嘅嘢已經夠多，唔係好多人會願意付出咁多心力，而每個人有嘅時間都有限，必須做出取捨。喺呢個過程入面，我一步步磨煉想法，開始諗到有咩係真正想做而又可以做嘅嘢。

最大嘅反思係，係咪一定要等人提出某啲想法，跟隨某啲組織，再用輔助嘅形式參與？咁做係更靈活，要負嘅責任亦比較輕鬆，但又係咪真係做到自己想做嘅嘢？當嗰啲想法、人事同自己理念不符，又可以點做？當環境或土壞未成熟，與其苦苦等待志同道合嘅人，或者更需要嘅係首先成為一個主導者，去啟發其他人一齊行動？

諗到呢度，我就發現原來都有接觸或耳聞過一啲單靠一、兩人之力，甚至本身完全冇相關經驗同人脈，只係好想為香港做啲嘢，就發起唔同項目嘅人。儘管能力資源有限，成品未必如意，但都令我意識到，原來一、兩個人做到嘅嘢都好多，原來唔一定要儲齊一班人先做到嘢。當我改變心態，就發現原來有好多嘢我都可以做，唔需要等人叫我幫手、唔需要等個土壤變得成熟，只要我願意嘗試，就會慢慢聚到志同道合嘅人。

下次再出文嘅時候，希望我可以同大家分享到更多經驗，亦希望呢篇文可以鼓勵到同路人，堅守信念、砥礪同行，為自己嘅人生同香港繼續嘗試同堅持吧！