My little detour - 《加插的小村， 莫名的喜歡 》

丫， 而家唔知點解日日都咁眼瞓， 琴晩其實如果許可，我8點幾都瞓得著， 只係我自行拖到10點。

如常又係4點幾起一次身， 仲發咗個夢添！ 我夢見自己唔知參加咩活動， 然後有得睇相， 個相士話我40歲後有重大轉變， 會轉從事音樂， 仲會有少少名堂， 又話住屋有出路， 我話梗係啦， 我都無買樓🤣；但仲有另一個夢， 就係一個不相熟嘅中學同學家姐情緒病發c左， 點解我會發呢的夢， 天呀！

好喇， 今朝6點9起身執野， 跟手好準時咁未夠8點去巴士站， 而嗰個viazul職員又真係好準時8點返工， 但8:10先開始應診。 yeah, 終於買左車飛 （7cuc)。 寄行李時， 嗰個人逼我比tips, 勁嬲呀， 仲嫌棄我2 cup, 係都要我比cuc。 我死都唔肯， 但又走唔甩， 所以最後比左10 cup, 我嬲呀！

Btw, 呢個巴士叔叔幾盡責， 佢係會數人頭架喎！ 到左Playa Giron又係得我一個落車。 一攞完行李已經有人approach租房， 我又再一次聽唔明記錢， 所以一嚟就話10cuc, 佢又ok wor。 於是乎伯伯就叫我上車去佢homestay。車程唔算耐， 10mins內就到達。

唔知點解呢到雖然鄉村d, 但感覺好好多， 所以如果巴士時間ok, 我都諗住住兩日嘅。 咁我同host伯伯講， 我睇埋巴士schedule先覆你留唔留多晚同食唔食晚飯啦！ 說時遲那時快， 我已經去左viazul問喇， 後日有12:35 同5:xx車去Havana, 咁fit晒啦， 但唔知點解佢叫我明天先再去買飛。 

跟住我就諗住去有snorkelling 吧地方，好信直覺咁向好多beach 嗰邊行， 即係face海的左手邊， 行行下都唔對路， 唔似有snorkelling 嘅。 於是我再望返係homestay影嗰張地圖， 再search下個位置， 錯晒，行左相反方向先真。

咁都行開囉， 咪行下囉， 行行行都行到一個叫El brinco cave 嘅地方。 well, 無人嘅， 的水有的污水feel， 算， 都叫到過。 至於嗰個海角真心太遠， 好似離我住的地方有12km, 而我又唔係真係諗住浮潛， 所以...放棄。 沿路行返轉頭， 行行下有人‘砵’我， 雖然雞同鴨講， 但好明顯佢想車我喎！ 今次唔知點解無咁扭擰， 好快已經上車， 但上左唔夠5分鐘已經到返viazul🤣🤣🤣， 我仲去左入油站的便利店買汽水 （0.6cuc)時撞返佢地，我地再say bye bye就分別了。 而我見對面就係museum， 咁諗住過去八下啦， 點知要2 cuc, 孤寒癌的我好𤓓咁走返出嚟唔想比錢🤣

見都只係4點幾， 我決定換衫去游水。 但由於太陽仲係好猛， 我決定五點零先出去。 我今次只帶了太陽油， key同泳鏡， 仲有20cup出去， 落水前連衫都除埋。平時嘅我一定遮遮掩掩， 但喺到肥極有個譜， 同埋阿水識我咩。 好開心呀， 我終於了左個心願， 係加勒比海游水喇！ 同埋我游到呀， 太開心喇， 我游左一陣之後因為飲左一啖仔咸水所以決定上返水。 然後去頭先間便利店買左橙汽水就返歸食晚飯了。

唔知點解homestay花灑水好細近乎無， 僅僅洗到個面就如同停水一樣， 礙於同host溝通難度極高， 我用到google translate, 但叫佢用佢又好似唔識咁， 今朝同佢講決定加埋早餐都用左我好多時間， 所以我決定仲有半個鐘食飯， 不如食埋先一次過問冷氣點開同埋花灑係咪有問題。

我坐係搖搖椅等食， 其實有風吹下都好舒服， 話咁快就食得飯。 痴線架？！ 條魚大過我手板呀！ 仲有煎蕉同飯， 再加一碟水果（菠蘿同西瓜粒），太surprise了， 其實幾好食， 的煎蕉有的似紅酒梨嘅味， 我估唔到又幾好食喎。我諗唯一美中不足係條魚咸得濟， 同埋隻杯只係用嚟裝飾， 不作盛飲品。

我食食下無啦啦對面屋有隻貓同我對上眼， 仲係我食魚時走過嚟添！ 由於我唔知host介唔介意我餵貓， 但我確實又已很飽， 於是我將剩低嘅魚夾起落餐紙到， 放左係屋外。

但貓貓見到完全被嚇退咁， 咁我先收起的魚， 然後執左碗入廚房， 仲問屋主係咪唔包餐飲， 當然佢唔明我噏咩， 但都斟左杯凍水比我。 飲飽食醉後， 我就問屋主點開冷氣， 最後都要佢個女先搞到， 而水的問題， 佢話10分鐘後ok wor。

咁我又趁呢個空檔攞返的魚餵貓， 佢都係唔吼喎。 咁為免屋主唔鍾意， 我最後將的魚放在hostal的垃圾筒。 跟住返去沖涼洗衫， 大佬， 洗衫洗左我大半個鐘， 好辛苦呀！ 我洗洗下衫聽到出面有貓叫， 先發覺原來有兩隻貓架， 頭先嗰隻瘦d, 另一隻肥嘟嘟架， 但佢地都好似係摷野食喎， sorry ar貓貓！

Btw, 我都唔知呢到邊到買到平少少的水， 又唔見有超巿， 但我今晚行時好似見到間細型鋪仔， 睇下明天開唔開先。 係homestay 買要2 cuc 呀， 嚇死人咩， 入油便利店又無大枝喎， 激死。

沖晒涼勁攰之際， 本來都諗住睇星， 但敵不過睡魔， 在掙扎與放棄之間， 佢竟然停電， 真係嚟古巴咁耐以嚟第一次。 既然係咁， 我索性出去望下星星， 痴線， 我諗過萬粒， 勁靚， 但影極都影唔到...再返房等多陣就有電了， 但已經夜深，樓上可唔可以細聲d?

今日共用： 33.85 cuc +  25cup

7cuc bus ticket from Cienfuegos to Giron

10cup tips😡

25 cuc 2 nights (10cuc/day) + 1 dinner (5cuc)

0.25 cuc lemon juice

1 cuc coconut

0.6 cuc 汽水

15 cup汽水